Khiangte LR Lra
KA PA CHU KA ‘HERO’ A NI.
Ka pa chu,
Fit 5 leh inchis 10-a sang a ni ,
A awm chu teh kualin inchis 45 a ni a,
A kawng len zawng chu inchis 36 a ni.
Taksa hrisel leh pian tha tak mai a ni,
Miten hmel tha ti lo mah se ka tan chuan,
Ka pa chu ka ‘Hero’ a ni.
Ka pa chu,
Mite angin thiamna leh finna,
Degree sang pui pui a dawng ve lo,
Lehkha zir sang lo tak mai a ni,
Pawl ruk chu tha takin a pass ve a,
Mi mawl (simple) mai ni mah se.
Ka pa chu ka ‘ Hero’ a ni.
Ka pa chu,
Kut-themthiam tak mi a ni a,
Kan thutthleng, almirah, khumte hi,
Ama siam vek a ni, kan in-a kan neih te hi,
Hnang hmanga thil siam a thiam bawk a,
Dawrawn, emping, arbawm te a tah thiam em em,
Ka pa chu ka 'Hero' a ni.
Ka pa chu,
Nitin lo-ah hnathawk turin a chhuak thin a,
Chawhmeh tinreng iptepuiah alo ak haw thin,
Tlaiah in alo thlen pawhin a awm mai mai ngai lo va,
In chung tha lo leh thil tul apiang tiin a buai thei em em,
Kan nghei leh mualpho hi a hlau em em thin,
Ka pa chu ka 'Hero' a ni.
Ka pa chu ,
A dam phawt chuan biakin kal a thulh ngai lo,
Zu leh ruihtheih thil hi a hmelhriat ve lo va,
A tul lovah pawisa a hmang mai mai ngai lo,
Thu ho mai mai leh dawt hi min hrilh ngai lo,
Damlo leh miharsa zawkte ke-a kalin a tlawh fo thin,
Ka pa chu ka 'Hero' a ni.
Ka pa chu,
Ka va’n tluk-lo nasa tak em !
Eng kawngah mah hian khumna ka nei lo va,
Tun dinhmun hetianga ka thlen theihna chhan hi,
Ka pa vang chauh a ni tih ka hria,
A mah hi ka tan chuan thian tha a nih bakah,
Ka pa chu ka ‘Hero’ a ni.
