CHHAWRHTHLAPUI

K Rohmingliana Valpuia

CHHAWRHTHLAPUI

(Oct. Full Moon pualin)

Mahni maia énna neilo i nih inhriain,

Dawhthei takin khawvel thim i nghak a,

A ni, thim nunrawng lal lai par tlan chu,

Hnehin zaleng vangkhua i én zo ta!

Chhimbal zungkaihna ram i tualchaina,

I chatuan par thliakin ni ropui kan thlir thin!

Zanpar-rimtui zingah i mawina tahpuan i khawng a,

A ni, hring leikapui mawiin perhkhuang i chawi si a.

I éng lawmiin thu tin biahzai kan hlan a,

Suihlung mu ang a leng si chhailai runah.

Thren thinlai a vai, riang thinlai chu.

Sulhnu leh hmunhlui ngaiin an kur zo ta!

Puang chhuak thiamlo lairil chenin i luah khat a,

I chhingkhual channa thinlungah i cham reng si,

Aw, mikhual zaidam leh nunrawng,

I mawina leh ropuina hi engtin nge maw kan tih dawn le!

khawvel mawiah par i chhuang a,

Nungcha rawl mawi paw'n i hming an lam asin!

Rimawi tin ten i lal ram an awì a,

A ni, tuipui thlifim chenin i tan zai an sak ták hi.

Lunglenna rauhthla riang i vaih tir a,

Khawharna riahrùn kan tan i ti maw!

Vanzawlah te khian vangkhua i din a,

Aw, Si-ar nui ri pawh i hneh zo ta!

Chhûm zingah te khian nunkhua i chaih a,

Lei fate tan khuang i chawi si a.

Khawvel mawi tana hla mawi hlànin,

Ri chhuaklo rimawi ber i tum asin!