AW HUN*

Akimi Sailo
AW HUN*

Aw, hun leh ni te u,
Mang iang hlimna min sihhmuh a;
Manganna thuam min bel leh si!
Hlimna khualbuk min lawitirin,
Tahna thian chuan min chhuahpui si.

Aw, nang hun leh kumte u.
Ka thlenna tur khua ka chuan lai khan;
Rial rum thawm reng i chhuah si lo,
To leh thim kara ka khurh lai khan,
Ka mit hliahin khaw eng tur min hmuh si lo.

Aw, hunbi tin te u.
Hlimna ka tana awm chu;
Lungngaihna puan i sintir a,
Tahkhua ka tana dahin,
Nuihna lamtluang min hlui leh si.

Aw hun, bumtu riangvai,
Enga'n hringmi zingah i lo pian le;
I hun ruat a thlen tikah,
Raltur khuawvel a tawp hun chuan.
I la ral dawn asin.