MIN TIAM HNU CHHAWRTHLAPUI

TC Lalremsiama
MIN TIAM HNU CHHAWRTHLAPUI

Thlangah tûrnî lênkâwla’n a her liam,
Khua-tin leh mual zawng thlîr nân êng a kiam,
Thinlai tho zawng paw’n ngaihlunglên a hmuak;
Mahse chhaka’n chhawrthla a lo her chhuak,
A êngin lêngpuipâr sakhmêl a chawi,
Dâwn lêm nei lo malin a lam ka hawi.

Vân dumpâwl bâwmtu zochhûm pawh a kiang,
Si-âr lungrualpui nân khua pawh a thiang;
Dawhrem laikhum belh rêl lo te’n ka thlîr,
Ka dâwnin thliah loh lawhlêng min ngaihtîr.

Chhawrthla nên chuan ngaih rêng a na dam diai,
A kut-ka nêm dam lairila’n a châm;
Ka dawn khâwl dâwnin thinlai a zîng riai,
Zaman hmâwng min phuartu tângah a zâm.

Ngaih bâng lo chu vawn loh paw’n ding rih rawh,
Thlîr dunpui min tiam hnu chhawrthlapui pawh.