TUN HUN

Tea Renthlei Tianghawl

TUN HUN

Ka thlir vela tlang tin mual tin,

Hmatianga lang Lalpianchampha;

Hmuh hmaih rual mah chang si lo hian,

Sikni engmawi hnuaiah ka tham vel e.

Min dem lo u zaleng zawng ten,

Thiam lo tea ka pau ve hi;

A lang si a lunglai rila'n,

Nunhlui hmatiang ngaia ka lunglen hi!

A dang si lo tlang leh mual tin,

Hringnun lumlet a dang zo si;

Hmana hlimna kan tahnan maw?

Kawlah hunin nun-sul a liampui si.

Tawng leh ila raltiang Piala'n,

Beisei chhanna a tling ngei ang;

Ka nghakhleh ngei chu hmunah chuan,

Leilungkham leh lungngai ka bang ngei ang.

Tun hun hlutna hre lo hian maw,

Ka lo vui e nunhlui ngaiin;

Hmatiang hlutna bosal hmain,

Tun hun ngei hi hlutin ka hmang nang e.