THUKHUH PAWINA

R Lalchanchinmawia Kll
THUKHUH PAWINA
(Fuihna khaw lo)

Thlirin bihchiang la thlirna mitin.
Chhiin ngai la ngaihthlakna bengin.

Ami zalêng zawngte min teh dan teh tawp hi.
Ka nihna phâk baka sang tehna hrui zam a ni.
Ka pawnlam nun landan tehngawt hi chu.
A ni ne'maw tehna hrui zam hnan chi.
Heti tehtlawnga min teh fo thin hi chuan.
Min teh dik ngai lovang ka nihna dik tak.
A lo ni si ka chhungril nun khawlo thuptu mai.

Kan zo zia em ni thudik pehhel kual hi.
Kan hril zo nun zemawi zinga to lur lur.
Min hum fot thintu thukhuh mawi thiamna.
Thudik hliahkhuhtu thukhuh chinna avangin.
Kan hre si lo an chhungril nun khaw lo.
An pawnlam landan maiah baptisma changin.
Kan inchiahpil burh burh thudik hre si lovin.

Pawnlam lanmawi thlahlel ve huam ngai lo.
Chhungril nun tak vawnga vuan tlat thintu.
An tehfung lek hrethiam lo nang mimawl hi.
Tehfung chi hrang hrang hmanga an teh chein.
Teh tlin zawh loh mitling lo ve mai i lo ni e.
Thlirin ngai la i kiang boruak inmun vel dan.
Zirin fing rawh lemchan nun zir thiam turin.

Pipu chena kan chhuan zonun ze mawi.
A kal her luai luai penhleh kawng zawhin.
Sang lo tur zawk kha a lo sang tawhin.
Mawi lo tur zawk kha a lo mawi tawh a.
Tlangtla lo tur zawk pawh lo tlangtla tawhin.
Nun tak hnawmhne changa hnualsuat a ni a.
An dingchang ta zel e der thiam nun neitute.