HRIAT LOH

Abrahama Aba

HRIAT LOH

Eng ka ti nge ka ngui ruai?

Thinlung ruak lua ka sûn em ni?

Hriat loh hian min hnawh khat si.

Nunhlui ngaih vang lah ni si lo,

Tah ruai ka nuam ngei e;

Tlangrel phurh ka zuam si lo.

Ar pûl iang ka ngui luap luap,

Pheikhai reng ka zo dâwn lo;

Thlunglû ka tân a rit lua.

Luaithlî lovin ka rum,

Rum ri thang lo thinlaiah;

Riakmaw-ah tal chang ila.

Min chhâng thei awm tak maw?

Ka vaihna thurûk chhânna;

Awm lo ngaiin ka rum em ni?

Phâk loh lamphei em ka zawh?

Min mawlhtu ka hril thei lo;

Ka hawi vual vual lungngaiin.

Aw.. hlimlai, ka zûnah uai la,

Nuihmêl min bân mai ta che;

Aw..ka thinlung chau hnu.

Kawng thar sial ve mawlh teh,

Rumin i nghâk rei ta lua êm e;

I phû ve em e i tân hlimna.