TLAITLA ENG MAWI

R Lalchanchinmawia Kll
TLAITLA ENG MAWI

Awmhar zunphur ka tham vel e sumtualah,
Sulhlui chhiahna tlang leh mualtin chuanin;
Kawlkung ngui ruai khi aw, ka han thlir a,
Uaia chul hnu hmana kan nun zawng kha;
A lo lang si suangtuahna chhing mitthlaah,
Nau ang tlei zai ka rel love nunhlui ngaiin.

Lenkawl eng no riai aw, thlir ninawm loh,
Zaleng lunglawm kim nan renga mawi chuangin;
A lo êng leh ta e thlang tlaitla êng mawi,
A fan zo ngei e rairah riang lungril thinlai;
Chutin chhuahtlang hmun hlui thawi damdiaiin,
A chhun riai e thadang no nghiala an lenna.

Chelh rualloh zamual liam tur mah ni se,
Chelhdin ka nuam e thlang tlaitla eng riai;
Mual liam mai lovin màwi rih la kawlkawt tual,
Hlimlai par tlan lanu leng leh chhuihthang valrual;
Darang chhaia vanglai an chenna tlang li liai,
Chhunin chelhding rih la hlim laini tawite.

Hlimna thu a chah em ni leilunga nungtin tan,
Ngaiteh, an bàng bil love chiaptin dang pawh.
Lawmlai par tlana lungtin rual hringfa iangin.
Vanglai hun chen kawlngo thla khawng ri.
Chawihin hramthiam va rawl a chiar nghian.
Lungrualna tlang tiamram ngei chu hei hi.