CHANVO RUATTU

R Lalchanchinmawia Kll
CHANVO RUATTU

Hringnun dam chhung ni tawite chhiar a.
Ngaihngam taka nunkhua kan chen lai hian.
Lempiltu leilawt chuan a ka a lo âng reng a.
Hringnun kailawn rahka rappiala daipelhin.
Rinloh dar, muangleia kan thut der der lai hian.
Kan la tlapil thut ngei ang hringfa lêngte.
Chutin, chelh ruallohin mual kan liam dawn si.

Kumhlun lo tura khuanu lêngin a lo ruat sa.
Ral tur renga dinchhuah rial ang an ralna ni.
Nungtin tawpna thlentu aw, thihna ngei chu.
A ni si leilawt ângchhung min thlentu tur.
Chutin thihna ngei chuan kan mit chhingin.
Kumhlun lo leinun hi kan la pel ngei dawn si.
Kir leh rual a ni dawn si lo kal tawhte tan.

Aw nang mihring, he dam lainia i thiltihte hi.
A awm si lo hriat loh tura thupbo hlen tur.
Lei hian chhinchhiahin a lanchhuah tir ang a.
Finfiahin a la rel ngei dawn si van khian.
Thiamloh chantira hrem theitu che leh.
Chawimawia chawisang theitu che chu i thiltih..
A ni, chu ngei chu a ni i chanvo ruattu tur chu.

Aw, nang chinlèm nei zo lova inleng thin.
Duhtawk sa zo lova chanai tha hui duak duak.
Chan loh hlauvin chanvo tha bawh ruak ruak.
Mi awkhrawl pamhamna thinlunga khat chu.
I lo ni e khawlohnaa din aw, hringmi ngei chu.
A ni, a tlawm sitin i hnawl lei dam chhung niah.
Mahse, i thliar thiam si lo a dik leh dik lo pawh.

Aw mihring, he dam chhung reilote hi dawn la.
I tih i nih engpawh nise i hun liam tawhah.
A der nun kanglang hnualsuata sirah hnawlin.
Nun tak chu thlang ve ta che hring damchhungah.
Chutin, thlah tawh lova nghet taka chelh zelin.
I tunhnu nunkhua leh thlarau khawvel thlengin.
Parfung chawi turin phun na'ng che nunna par.