R Lalchanchin Mawia
HMANGAIHNA THINLUNG DIK TAK
Ka duhamna thinlung hian i lakah sang tak phutin.
Ka hmasialna thinlung hian a tha ber dawn a tum thin.
Mahni chauh inngaihtuahin i harsatna ka hmu thiamlo fova.
Chin lêm neilo ka pamhamna hian ka hma chauh a thlir thin.
Ka hlawkna nan i theih bákchham thlengin tihtir che ka tum fova.
Ka chapona hian beisei ang ka hmuh lohin min tilunghnur fo thin.
Huatthu holam leh thémhlèmtê tê hmanga chhipchhuah thin chein.
I thinlung pawisawi lo hliampui tawrhtirin i rilru ka ti na fo thin.
Tunah erawh keimah ang bawka mihring famkim biklo i ni tih hi.
Hmangaih thinlung dik takin ka mit tivarin ka lo hmuthiam ve ta.
Ka hmuhthiam ngai loh thilte ka lo hmuhthiam ve tak chinah chuan.
I hnena ngaihdam dil lo thei lo dinhmunah ka lo ding ta a nih hi..
MI NGAIDAM ANG CHE
Inngaihzawnna emaw, nupa nun zawk pawh nise, mi pahnih inkâr nun hi thiam har tak mai a ni a. Buaina chingchihlip takin a tlakbuak chang phei chuan, laduang hnawk chingchivet nuaih ang mai hian siamfel a har tawh thin a. Kan dik loh zawkna ngei ngeiah pawh chapona thinlungin mahni inthiam chawpa chhuanlam holamtê tê dapa hmachhuanin min fuihpawrh a, kan pawng tual tual mai thin a nih hi.
Chung hunah meuh chuan, kan lungawi lohna nasa tak leh thinurna sosang tak thawidam thei tur a vang pharh tawh mai thin a. Heng thil zawng zawng hi hmangaihna thinlung daih tawh vanga thleng ni vek lo mah se, hmangaihna thinlung tidai thei tur erawh chuan a chakin thil a tithei em em lawi si a. Hmangaihna ber a daih tawh si chuan, a sawp chu nasa tak a ni tih ang maiin, intih taurau bàk hmabàk a awm tawh hauh lo ni...!? Chuvangin, rilru fim nena inngaihtuah a, kan thinlunga kan vawn hmangaihna dik tak chawkharha phochhuak leh lantir tura chet kan lak zawk fo hi a pawimawhin a tul takzet a ni.
