Chhawrthlapui

Chhawrthlapui By c Vanhmingtea

Turni thlang lenkawl a liam a,
Kawl a lo ngui a, sirva zaivawrte
an tin a,
Fuliafate lamin run belh zai an rel a.

A mi leng zawng ten riahrun a bel a,
Thimna chuan chhimhleipial a rawn run a,
Lei hi khakna tui nen a rawn bual a.

Chungtiang van rengpui erawh chuan,
A phal lul lo hringfa lengte,
Thim hnuaia anchhe phurhhlan,
Siama phur rit phur mai turte. (10)

Chu zan thimna puan hnuai ata,
Thim lal thlazar thawpikna kar a,
Lawmna chhermei chhi kai tur chu.

Chhaktiang kawlah a lo her chhuak a,
Thim hnehchhiahte chhanchhuak tur a,
Remna palaini awm reng kha.

Mawina thuam tinreng inbelin,
Tangkaraw luan sakhmel a rawn chawi a,
Vangkhawpui lawm nan enna sinin,
Zantiang lalnu renga mawi zuk ni a. (20)

Chu zantiang lalnu zan inlar chu,
Thangvan lasi a ngai bil lo,
Siar lengtin hnuai rawn chhiahin.

A zan lalna a puang chhuak a,
Leia hnam tin zaleng zingah,
Lawm lo fa reng awm tak ang maw?

Zan rorelna thu a puang chhuak a,
Hnamtin zalenna thuthlung chu,
Turni chhaktiang kawla a hran hmaa,
Damdiai kam chhuak lawmna thu chu. (30)

Ngai teh, chu chhawrthla engah chuan,
Lengi, Vala, hrinhniang naunawn,
Laitual mawiin an hlim ngei e.

Vala’n perkhuang zai nen,
Sawngka dawhrem a zau laisah,
Zai tin lunglen zai a chawi e.

Hraileng an chai sumtual nuama’n,
Sappui nun reng an ngai bil lo,
Hlimten zan khua an tumtawi a,
Zankhua rei tin dial an tih hma chuan. (40)

A ni chu chhawrthla engah chuan,
Chiapcha, nungcha, chiri rualte,
Zai hla remin an chai zankhua.

Zun ngai chhawl ang uai lengi chuan,
Chu chhawrthla engah thung chuan,
Lunglen tho tahkhua sei a dawn khawl.

Tar leh zur lenlai ngai an tho a,
Vanglai ngaiin chhawrthla engah chuan,
Hnutiang an dawn kir vanglai nite,
Chulhnu nunhlui mual liam tate. (50)

Chhawrthlapui, aw chhawrthlapui,
I lenna thangvan sangah khan,
Min chawi la min han kai teh la.

Hmuh ka nuam ngei e piallei zauva,
I eng lawma hlimlai par tlan,
Hringmi zaleng te tual chai chu.

Engtin awm maw, engtin hmang maw?
Hlimte’n tual leng kim tak ang maw?
Thu ruk, phiar ruk leng tak ang maw?
Rukru koham tual leng ve tak ang maw? (60)

Duh thu leng ka sam erawh chuan,
I eng mawi par thiang karah hian,
Piallei hi e, mawina tinrengin par se.

I zan thim chhermei eng chawi chu,
Zantiang rimawi zai tin remte chuan,
Rem thlifim leng rawn chan sela.

Laikhum thlehnem bela zalte tan,
Zantiang tawnmang pialral kaina,
Dam tea zan mu an chhin nan,
Hmang tehlul se, aw Chhawrthlapui. (70) 14.11.2012