THIM ATA ENGAH

R Lalchanchin Mawia
THIM ATA ENGAH

Zawlnei ianga hrilhlawktu chung van sârzãm,
Chhiattu leilung chhinchhiahna samsar nei
Hrilhlawkna nemnghettu hnuailêng ramsa kui.
Pipu chena tihkhai hringfa lengte bawrhtu.
Hmelma kumhlun hringfate doral lian hrang.
A lo ni e chhiatna ai zualko thuchah kengtu.

Rindan dik lo ngaihdan zam serhsang thil.
Thiang leh thiang lo kar nun thaw ipik
Khuahkhirh khar hnan puithuna atthlâk.
Tuboh leh dolung kar ripchhung rapthlak.
Zalenna hahthlak hlauhna thuanawp nun kimki.
A lo ni e hriat chian loh mawlna rahchhuah mai.

Atna a ta finna lamlian chhuitu chanchin tha.
Mawlna a ta finna hnuk thlungtu chanvo ai tha.
Hlauhna ata muanna kim thlentu thuchah ropui.
Thinlung thim entu thiam thil chhawm nei.
Khawdur chhumdum kara nichhuak eng mawi
Thim ata enga hlangkaitu thinlung chhung enna.

Hun thar herchhuak enna tian kawl zungzam.
Chanchin tha kentel zir thiam finna leh sànna
Thim lal hnehtu enna nunnem rorel hun.
Zalênna dik hun thim tihbaiawm hnawlkiangtu.
Chan bika vannei thangthar nunna par vul.
Amten chèn ve u mawlsawmtu hre rengin.