Ka nu ka hmangaih che.

Mrfair Zela Pachuau
KANU KA HMANGAIH CHE

Natna leh lungngaihna in a hriam a lek a,
Tlakchhiatna chhipchhuan leh mangangin,
Lungngaihna saltang mai ka ni fo thin..
Hlimna leh lawmnate'n mi kalsan lai khan...

Ka nu, nang chuan mi tiansan ngailova,
KA NU, KA HMANGAIH CHE.

ka tan khawvel hian parmawi mi chhiah sak lohva
Dai ngailoh ram ah, hriatloh khual ang mai a,
Mite nuih zat leh hnutiang chhawn ka nih lai leh,
Bumna tenawm leh phatsannate'n mi riam lai pawn

Nang ka lamah i tanga, huaisen turin mi fuih thin.
KA NU, KA HMANGAIH CHE.

Tlai leh puar a ka awm theih nan,
Nghei leh riltam i hnial ngai lova,
Ka chawlh theih nan nangin i thawk a,
Ka nawmsak theihnan i rethei si thin..

KA NU, KA HMANGAIH CHE...

Enteh u,....

Lei leh a chhunga nunna nei te hmelma kumhlun,
Choloh awmlai lian lo hrang e- kan run ah...
Vaivuta siam chu vaivutah kirtiang rel turin,
A hruai ta hringnun zinkawng tawp ah,

Enteh u..
Ka Kumtluangpar par chu a vuai zota,
Ka Chuailopar meuh pawh a chuaizo ta e...
Ka chun nu a fam ta e, ka hmangaih ka chan ta e,
Hringnun hnutiang a chhawn,hawilo par a tawn,

Ka hmabak a thim, ka beiseina a bo zo ta.
Ka eng a zuai, ka duhaisam siar a chuai,
Nui ri a tawp,thlankhur chhungah mittui a far.
Hmangaihna mittui leh pangpar ka surtir nang e!!

Famro lungmual i liam ni khan,
Ka hringnun rimawi a chuai zo va,
Kohna chhanga i chawlh rual khan,
Ka kulhbing sang chim zo ta.

KA NU, KA HMANGAIH CHE