I HNEH HLA

Johny Chawngthu‎
I HNEH HLA
.
Thim zingah aw chu a chhuak zo lo va,
Thinlung insual thawm chu a reh thiap a;
Mittui chuan hnama bual nawn leh chein,
I tho mai tur chu i tlu leh thin maw!
.
I hriam khandaih kha a inring reng a,
Thisen thianghlim chuan a ko thin che a;
Chhinsan tuma i zalsan chung pawhin,
Mangchhia hlui chein a zualtir zel maw!
.
I nun phurrit chu a kiang mai lo va,
I beiseina mit pawh a vai riai a;
Hringnun khawvar hun tur chu thlir kanin,
Thlan kohna zui mai chu i tum thin maw!
.
Thlan piah chawlhna dar ri chu chhawn tura,
Her liama nun hrui ang i chhah hmaa,
Nun ruak chul rep kha par vul leh turin,
I tana ka hla chhiah hi han dawn la.
.
Nun suar leh buaia bo hlen lo tura,
Thim chu bosan tuma i vaih ni kha;
Tawpsan thinlung kha zui lo la chuanin,
Hulhliap puan mawi chu i zar tawh ang a.
.
Uai hnu kha tharin lo vul ve tawh la,
Hliam ser pun belhchhah reng bik lo se la;
Fianrialah hla mawi ri chu zawm vein,
I hneh hla mawi chhiah thliai kan chhawn dawn nia.