ZANTIANG RIMAWI

ZANTIANG RIMAWI By Lawma Khiangte
Rhyme scheme: aab, bbc, ccd, dde........

Thlang tlai lenkawl a hnim turni a liam,
Zan thim a zing, than tum kal lai a siam,

Chhun eng hmeh beh zan rawl a kai chhuak e.

Chu! Ngaiteh mah, pâwnga zai chiri e,
Khuangbâi leh chherkhau ten zai an vawr e;
Lei hrik zâawng nen zantiang zai hla an bân.

Bak valeng ten hliap thla zah rei an hlan,
Lungleng valin zunleng zai hla a bân,
Vabak pawn thir chher zai a rel leh ta.

Chingpirinuin râwl chhuah zai a rel a,
Chhimbuk tuibiirh riin ruam a khawk a,
Suih lungleng hala u rawlin a chhawn;

Râla khisa huk thawm pawhin lo chhawn.
Thangril a her bawâr lungleng a sâwm,
Zantiang awiin an pau, zai hla chawiin.

Zantiang a her reh ri than tir turin,
Reh ri a thang zai hla a chawi nuamin,
An zain zantiang rimawi an lo ni.