Vangpui lenkawl eng mawi lawmin lelthang a kiu ruai e,

Elti Muana

‎(Nawmsam vak loh nen, chhungkaw buai nen, group-ah ka lut mumal hman lo em a, post loh aiah hman rem chan huna thual that atana ka tih, rilrua lang ang ang ka tlar thlak duat duat hi ka rawn thawh ngawt teh ang.)

Vangpui lenkawl eng mawi lawmin lelthang a kiu ruai e,
Suihlung tileng tur reng hian maw?
Tuar har nichhun awmhar hnem'an,

Rual duh hlimlai sulhnu chhui zai ka rel.

A tlang leh mual dang si lo hian maw
Nui hiaua kan tumtawi hnu lamtluang a thui lua e
Chawlhhmun lam thuam zuk thleng ila
Rual duh tiamthu chhiahna hnuhchhawl mai maw sulhmun nghaktu?

Bukthlam lam peng zawhin han thlir ila
Zokai thli hiau hnuaiah par chawi sawmfang an sawi dim e
Bukthlam sawngka hmai tualah
Hawihte'n Zozam par mawi lo vul
Thliah ka nuam mang e,
Sawmfang sul lo zawhtluang lamthuama lungdi thuai na'n.

Bukthlam bangthlang dawhtling hawngin han thlir ila
Tahchuan lo lang, rual duh hlimlai hlimthla, chhingmitthlaah -
Lem loin kan do, a sur a sa
Sirtiang kan sawn, hmatiang kan hlen
Zawlzawng kan tawng, chawlh zai kan rel
Ngilh hian ka mawi nem maw
Zukzial min hlan laia a seih sakhmel mawi mawlh te kha!

Mahse tunah kan suli hnu kha ruah tham hnu
Lunglen zai sain au mah ila
Dawngral lentu kara thuva awmhar zai sa mai maw biahzai min chhawntu?
Lunglen chang zai vawra nilen a awl mang e.

Khuavel thiam-fin nunkhua sang zelah hian
Lenlai chenin tawl tur nuam tin pawh zawng i
Tawng hian ka inring lo, kha ang Lal Rothangpuia lalna piah a
Thlan dartui ang luang kawltu chawi lawm rual hlimna hneh zo.

(Hla lem lem a nih tak ber hi a)