NGAIIN KAN AU CHE ZUAPA NUNNEM

R Lalchanchin Mawia

NGAIIN KAN AU CHE ZUAPA NUNNEM

Rûn chhûngah sial ang tuaia thanglian vein
Zuapa tangnêm bêlin hringnun ka chhiar

Hlim leh lawma duhthu tinkim sâmin
Ka ngai bik lo a mi zalêng tuaiduh zawngte

Khawtin sak rêlin hmathlir ka siam zuapa uapin
Hun harsa lo thlengin hringnun tuifáwnin min chim sela

Chhim thlipui ianga hrângin min nuai vêl thin mahse
Lawmlai tuaiduh ka zâm bil lo zuapa thlazâr hnuaiah

Lianchhûng naufa uapa ro tinkim rêl thintu lawmlai zuapa'n
Nghet takin min phuarkhawm hmangaihna hrualhruiin

Duatte'n lainatna kut nêma min kuangkuah thinin
Nunkawngah min hruai thin zilhna thu tha tinrêng fahin

Mahse fam túr rênga khuanu duan hringfa lêng chan
Hlun tûra piang naufa rêng awm si lo he lei chinah

Hlim leh lawma chhûngkimten dârang lênlaiin
Run chhûngah lo hrâng e cho rualloh awmlai lunglian

Kan dang zo ne'maw awmlai nunrawng thihna tûr
Lungloh tui dâwna hawilopar mawi tawn tûr leh

Rih tlângpui zamual liama hring khawzâwl hnuchhawn tûrin
Dan ruallohin hruai lui ta e chim loh zuapa châwnbãn kaiin

Tuar zo hian kan mawi ne'maw kan tuarah vânpui lo chim
Kan phal thei lo fam chang maia'n a na asin kan tawnah

Lung kan vãi ruai e min hnêmtu tawngin kan mawi si lo.
Kan zuam lo, kan zuam mawlh lo zuapa tel lova hringun hman

Fam khawpui sianga lâwi hnu ngaihlai zuapan min dâwn lo rêngin
Hlim leh lawmin a bêl hmangaih Lalnunnêm tanglai

Tapin au mah ila zua nunnêma'n a rêl lo ve hringlam kir
Nau ang tlei zãi kan rêl thei ne'maw zua lo lianchhung naufa'n

Riang hleihluanin tapin kan chhui i sûl i hnu zawngte
Kan thlir ning thei lo i hlimthla rianghlei kan chantâwk

Ngaihlai puan ang kan bâng dawn si lo zuapa nunnêm
Puini lêmang derin hringlam kir zâi rêl leh mai rawh...