KAN NI EM PATHIAN HMANGAIHTU?

KAN NI EM PATHIAN HMANGAIHTU?
~Mami Da'Mare Khalthang
Chung Pathianin saisen tet ata min hre reng e
Hringmi zawngte, he lei anchhe dawngah.
Nauno chawi lian tura’n chun min pe e,

Hleikan nan chun leh zua te’n an thawk thin, lo lamah.

Zosapte’n an lo keng maw chanchintha meichher chu.
Zoram a chhungtinte tan malsawmna,
Retheihna kar a hlimna thuruk chu;
Lal Isua’n min hmangaihna chu kan tan lungawina.

Tunah zawng chung Pathian malsawmna kan dawng hnem ta,
Khawvel hmasawnna in min tuam ta e,
Lalpa hmangaihna kan hai der tan ta,
Sualna chhumpui zing chuan chhungtinte min khuh tan e.

“Mama, min liamsan maw..” tiin chunnu a tap e,
Beidawnna ruam a mahni nun lak chuan,
Lalpa khawngaihna a hmu ang em le?
Then leh rual chhang thei awm si lo, Pathian chauh lo chuan.

Krista zuitu, Kristian Chhungkua chu kan din em ni?
Harsat mangan leh buaina tawh changin,
Hrai duatlai hmangaihna a tlem em ni?
Engkim tlu a tung ding thei Pathian hmangaihna in.

“Hmangaihnain a dawhthei a, Ngil a nei bawk thin;”
Hmangaihna a min enkawl seiliantu,
Isua Krista chanchintha kan zir thin,
Thinlungah vawngin, kan ni em Pathian hmangaihtu?

”Chu ramah chuan hlim takin va chawl nang che, Mama..”
Chhingmittui karah an lawmpui si thin;
‘A ropui e!’ tiin van a au a,
Lusun karah Pathian hmangaihna in a hnem thin.

Bawih ni lo tura Krista min chhuahtirna zarah
Fa a vuah in kan lo awm leh ta maw,
Runmawi a awm, Isua lalberna ah,
Innghirnghona zawng bovin kan nui kim ta maw.

Chhungkim te’n a biakbuk thianghlim kan pan leh ta e
Inkhawm peih lohna thlarau a bo ta;
Rinna ngunhnam nen kan kal zel dawn e,
Sual hnehin Kristian chhungkua te’n hnehna kan chang ta

Huaisen takin thih thleng a rinawmin awm ang u
Chanchintha meichher chhem alh chung zelin,
Tawngtaina talhtum chu chawikang ang u,
Vanram kawngkhar kan luh hma loh zawng ral bei zelin.