KA ZAWNG RUAI CHE

KA ZAWNG RUAI CHE

Ma-i Fanai

Ruamah ṭhal vaube te paw´n vul lai an chhuang a,

Nipui pâr te meuh pawh an vul a hun leh ta,
Tlangsam te pawhin pâr an la chhuang leh ang a,
Piallei zauvah ka la zawng leh dawn che asin!

Sikni kâwl leh Lal piancham a lo thleng ang a,
Rualduh unau zawngten hlim lai an chen ang a,
Lal piang chibai bûkin mi tin an hlim ang a,
Phulleng fangin ka la zawng leh dawn che asin!

Khua lo ṭhalin lelte an lo kiu leh ang a,
Thing lenbuangah zai an la vawr leh ngei ang a,
Rengchal kiuin i sakhming an sa leh ang a,
Pialleia ka ṭah khua a sei leh dawn asin!

Turni lo sangin nipui a lo thaw ang a,
Meivap leng kara´n zuzi an lo hram leh ang a,
Ṭuahpui leh vau paw’n vul lai an chhuang leh ang a,
Khua chuanin ka la zawng leh ruai dawn che asin!

Ṭo lo hawin furpui a lo thleng leh ang a,
Khuangruah surin rimawi min la hlan leh ang a,
Dai far ri chuan i sakhming an sa leh ang a,
Ngaihluat vangin luaithli ka nul leh dawn asin!

Khuanu ruata dairial ka chan hun chuan,
Pialral lamtluangah min lo hmuak ang che.