LENGI HLIMTHLA

ZH October Renthlei
Dramatic Monoloque
(Tawn-hril-hla):

LENGI HLIMTHLA

A khi chhaktiang khualpang zinkawng chhuia,
Zawhkawng lamtluang mahten ka chhui laiin;
Lamsial dungthul sakhmel ka tawng Ankanêmi,
Biak lai banin hlimten ka nui vur vur.
Tlang ka chuan e, tlai khua lo ngui hnuin,
Sei ram vangkhua mawitu zaleng an ngir,
Lamsul hawng e, tukram tuana mualte,
Zan tlai lunglen lungrun ber hi, tuar thiam ka mawi lo ve.
Khual mi hringnun chhâwntu an fel mang e,
Khual tha iang réng a ngur dungthul,
Ka tan an hlan, ka lung lawmna,
Hlim nui hiauin liankhua ka cham nuam e.
Fáng fa tlan a, puar el euh hian,
Min hlui zeltluang sa leh buh changrum,
Fiahfar ânka'n ngaihno a bei thin e,
Duhsak ânka min ban, vuaia lung lawmna.
Lam tlai a liam liankhua an chiar nghian a,
Tleitir lamsial biaklai ka ban hnu kha,
Zawngin thlertin ka suar tluan a,
Ka tawng ta e, hlimsâr a zâm ka hmai tlangah.
Sângpâr ka chuan khartung sâwnin,
Thliah loh thadâng rûn sângah chuan,
Ka rei! Pualhrâng an ngir, rûndung an mawi,
Lenchawm an beng, an fâwn dîm e.
Zankhua a tlai, tin zai ka rêl san a,
Laikhum thlehnêm belh zai ka rêl thiam lo,
Tleitir sakhmél darzân lunglai khamtu,
Fam mai ing e, zûn léng phur hian.
Zawltling vawn nat laikhum ka belh laiin,
Ka sakhming koh hriain ka thangharh a,
Chawi beng chhiin laibang ka thlir,
Lêngi au aw ka hre ta e.
"Tlangval, tho la min thlir ta che, rélthang huamin i tan,
Ka lo kal e, chhawn zai min rel ta che!"
Laikhum bilhpuan sirah hnáwlin tihian ka chhang,
"Pârte, i tan ka lo kal e, nghak la reh ri ring ber karah,
Tairâng vuaia a lo kal e" tiin.
Thangril laiah khartung ka sâwn,
Tleitir annêm ka tawng ta e,
Sakruang mawi hluan ka enchim loh pâr,
Pawm vawng vawng hian zanvâr ka hmang nuam e.

Note: Ka risk huai inti ngawt ang. Min han sawisel bawrh bawrh teh u. Ka inhawng zau teh a nia.