Ka chhanna

Rinzuala Khawlhring
Ka chhanna

Chhanphak rual loh zawhna fing kha,
Nang mifing khan min zawta;
Kei, tlang sel thaifa ve mai hi,
Val lungmawl mai ka ni si.

Hmuhphak piahlam thil min zawta,
Hmuhchin pawh hrethiam lo hi;
Kei zawng thlalera mi vakvai,
Hriat nei lo ka ni si a.

Tu nge i zui i ti a maw?
Khawi nge Pathian i ti a maw?
Ka zui chuan tu nge min hria a,
Khawi nge ka awm tih a hria.

Zawhna eng pawh min zawt mah la,
Ka hriat loh vangin nui la;
Hriat loh vangin ka tim lo a,
Nuih vangin ka zam hek lo.

Hmangaihnain min kuangkuaha,
Khawngaihna kut min hlana;
A tan tling lo mah ila,
Ka duh ber ang a hmangaihna.