VALRIANGA THU LEH HLA

 

Ngura Changsan

  · 

VALRIANGA THU LEH HLA

I

Run ramrehah mahte'n awmkhua har maw,

Chham ang zalin ko kir ila hnutiang;

Dee, ka lo tawng ta kher kher che kha maw

Choloh lungrunah, senlai nau ka iang.

Lairilah hmun pakhat chauh ka nei a,

Tahchuan Lal in kumhlun i lo rem si;

Tleidang chhaia nuih chang ni her sela

Ka lairil an chhun pha si lo, Dee Dee.

I velah an her, ral zai rel leh thin,

Nang zobawm chhawkhlei sensiar tawnah chuan

Chulhnu vuaipar an chang zo leh si thin,

Dee Dee, nang chauh ka tan i par kumtluan.

Piallei famrun pawh nghak rawh i valan

Min ko la, ka thovang, aw Dee i tan.

II

Ka dawn ka dawn thina hringnun hi

Famkimna reng reng a lo awm si lo;

Neilovin neih duh an tlan zel si

Nei tawh pawhin chinlem an nei chuang lo.

Di chhai kawng chhuk chho reng pawh hi

Rianga inchhal beidawng an tam ngei e;

Chantawk khuarel pawm a har an ti

Chu chu Leilung pianpui lo ni si e.

Kei paw'n hellai lungrun ka luah zo lo,

Ka ngai kher mange Sawngkhar zawlaidi

Leh Lianchi sakhmel chhing zo reng awm lo;

Chuti'n bel leh nange, cho loh ka di.

Lungher hnu kha lungchhir lamang let maw?

Lungawina famkim chhar chhuak tak i maw?

III

Kan nun hmanlai a chang dawn ta mai maw

Keizawng ka ngaithiam lo, ka phal thei lo;

I hlimthla mai ka chantawk lo ni maw

Hringmi anka a tlem ka hril thiam lo.

Kum tam ral hnuah thaikawi kan zirna

Runpui fang leh ila mahriaktein,

Hriatloh dawntuai thar an vul tawh anga

Hrilhaival a nuar ang thinlai tapin.

I sakhmel tawng lo mah ila mi u,

I belh thin thingtetuahrem mai pawhin

Ka rauthla a tir ang, kan nun chul hnu-

Nang ngei a bawm ang che duhaisamin.

Chungkhuanu'n min thlir ang ka lunglam vai

Lungchimte hian a nul ve ang luaithli.

IV

Kumsul hailo tein thingtin thalah

Lengzawngte lawmah an lo vul leh ang;

Chhawrthla a lo kai ang vanzawlah

Siar zawng paw'n chhermei an chawi ve ang.

Kuhmum no nghil nghial parmawia vul tur

Zaleng lunglawm karah kei lungzur chu,

Parmawi chulhnu ianga ka uai mai tur

Vanlalrun nuam chauh ka lunglai hnemtu.

Zanlalnu engmawi dawntuaite hlimna

Sunna khawnvar lo chang mai tur ka tan,

Thil tinreng hi hlimthla mai lo ni a

Luahloh nang ngaia chhumpui zing tur nen.

Chuta'n, ka thu leh hla tur chu hei hi:

Hei ang nun min chantu chu nang ngei hi.

V

Hringnun lamtluang mak mi zawngte hel hnu

Ka zawh tikan naunawn lungmawlte chuan:

"Hmangaihna dai sual lo ni valriang khu,

Thai lak rel lo, a tan hringnun a chuai."

Lungfing inti te'n ka sakhming chu e

An la sel ngei ang nuihsawh anka-in:

"Leng zawng zingah dawntawia a chhaw ber e,

Khuavel entu atna-ah chantirin."

Hmuhsitna zawng ka chungah luang mai tang

Dee, nang vang a nih chuan ka lawm zel ang.

September 2, 1997 Ramhlun North.