KHUANGRUAH

Ngura Changsan‎MIZO POETRY

July 21, 1997-a ka phuah. A sei deuh naa, anniversary pualin aw....
KHUANGRUAH
Khuangruah lo sur turni ngui karah
Thingtinzar duah nan siktuithiang
A rawn hlan e nichhunah;
Thlaihring zawngte an lawm ngei ang.
Thlir teh, a mawi zual e, tlang leh phai
khuavel zawng leh van boruak hi;
Romei iangin a paw rii riai
Leng zawngte lung kuai tur reng hi.
Thalah a mawi love lentu ramdai,
Lei rawng kai zo hring no nghial kha.
Senmai tawng sakhmel a kai
Hringnun pawhin ramro a iang zo ta.
Chungturni leh boruak vawt hraichawi maw
I lo nih le ruahpui maltinsawmtu ?
I lo chhuahna lamtluang a thui si maw
Nangmah lo chawitu reng chu e, Khuanu.
Khuanu chawia leng lengin,
Tum ram nei lo, hriatloh ram panin
Thla ka zar e thangvanah sang zual zelin,
Chutin tlang leh phaite pel zelin.
Ka zuk thlira in ram a mawi chuang e,
Lentu chhawl thawk chhuah virthli vawtin
Min lo ko, hnial thei hian ka mawi si love;
Ka lo tum ta e, mualtin huapin.
Thingtin ruang a bual ta e, tuithiangin
An sawi dial dial an hlim ngei e;
Hnahnemah tlanglam a zir, per chiai chiai-in
A dir tliah tliah taka a zarahte.
Parmawi zawng pawh saw an hlimlai,
An tle nghial nghial ruahsur lawmin;
An nui ker ker e, tual an chai -
Naunawn lenrual pawnto iang rengin.
Suihlung min len, aw i liam tur hian
Aw khawi'an liam che maw, ka dawn thiam lo;
I zara par ang vul hringfaleng hian
I tel lo hian ropui rel kan mawi si lo.
Ka lawi tang e, luitinfinna ka runpuiah
Ka fam ve lo kei chu hringmi iangin;
Ral zai ka rel ngai lo 'tuan ata tawh
A changin sakhmel zawng ka thlak ve thin.
Chutin, khuavel kiltin chu fang ta zel la,
Tuipuiral finna biahthu zawngte
Chawiin lam ang lo let leh la,
Tawnlehni chuan finna thu hlu min hlan ang che.