RUN NUAM MIZO!

Crimelord Khawlhring

RUN NUAM MIZO!

Kawlen in lungaih a kiang,

Na awm lo hringnun an;

Thlanfim a rimtui ngei e,

Thawkrim rah par tlan ten;

Tlang rel, thangmawina an awrh.

Nimin her liam in,

Liam pui se;

Relthang kamkha a tiau mahna,

Leilungaih zu an khiat si.

Tu'n sel maw, tun'n dem ve maw,

Val sen-mei vo zamtu hi!

Nunnem thinlai senhri par,

Nun nem thuro tualchianna;

Riahrun nuam an chan,

Aw, Zoram nuam tiin;

Piallei thuah sarih karan,

Hranghlui rawl an than darh.

Anka lah nem sakhmel mawi,

Valmawl thinlai tlawm lo chuan;

Ralkhel dar an kawngri,

Hreipui, chempui, hrei hriam nen,

An thantlawm ta!

Leiah tu an iang awm ve maw,

Sakhming koh Mizo tlangval,

A sakhmel mawi thangvan chen a fak - Mizo nula,

Phei khai rual siktui thiang Zofate,

Hmatiang kan sawn, kan pheichhe a rual.

Nung tin tual chaina kan thinlai,

Sei beihpui thlak ngaihna beitu,

(Beiseina thar petu)

Zofate kan tlawm ngai lo,

Sahrang hma an;

Kan pung tual tual,

Felna, dikna awm phaw nen,

Kan do zel ang doral.

THAN ZUALI

Thara Caution Lalthuthlunga
THAN ZUALI

Herluaii, pheichheh mawiin sawngka
rawn sawn e;
Rûn riang nghâk vàlan khartung
ka do zo lo.
Lungchim ten lo lâwi la, ser ang
châm rawh
rûn chhung tivulan.

Khuâvel mawina tifamkimtu
Sakrûang mawi hluani,
I seih sakhmel reng hian i lungril
puang se,
Kei ka tân biahthu chang mai tur
Ankâ biak loh paw'n.

Mahse phû loh sakhming than Zuali,
Lêm ang min der an zawng a pam lua
I sakhmel leh nun ze mawi;
I lûngrîl hlan rawh, duh lêng tawnah
I ankâ dungthulin.

ZO KORIAN..

Abrahama Aba
ZO KORIAN..

Tu'n min sel lo se ka hril dâwn,
Kei, Zohnahthlak val ngei hian;
Chimraltu dorâl dang kan ngai lo,
Chemsen lovin an la kan thlunglû;
Chengrâng lovin dairial min chantir,
Dârfêng dorâl an ngai nem.

Fam lo hian kan tlâwm duai,
Hlaua tlanchhe si lo hian e;
Sum leh pai reng min chhuh lo,
Annêm tea dilin min ngen lo;
Min dil lo hian kan pe kan zonun,
Min dil lo hian kan la an hnam zia.

Selin ankâ thur ka hlan ngam lo,
Thiam leh fing ber ka phâk loh;
An sakhmingah zo hnam vâl,
An nun leh silhfen reng a korian;
An sakhmêl reng zohnahthlak lânu,
An nun leh zia reng phatsantu.

Selin thiamchan an thiam ngei,
Finna rengah lêngdang khûmtu;
An thiamna reng ka sel phâkbâk,
Mahse tlawm ka tum bik nem le;
Ka ngaihlû kan hnam nun,
Ka ngaisang zo hnam zia.

Zo phelphual kan lo ni,
Kan thinlung uirê si hian;
Kan inchhâl bâng chuang lo,
Kan zia reng hnawl zel chung hian;
An kan duh kan engkim pe-in,
An sakhming reng pawh zo korian.

CHU PANGPAR CHU..

Abrahama Aba
CHU PANGPAR CHU..

Ka hmâa pangpâr mawi tak chu,
A pâr thianghlim leh no sâr;
Bawlhhlawh reng kai ngai lo,
Chatuana vul awm reng lah niin;
Thlasik vûr leh daite'n an bawm,
A mawina tizualtu Ni em tlet.

A parzu an tlan vahkhuaiten,
Phêngphe nunnêm nên;
Zîng, chhûn leh tlai an tlaina pârzû,
Pâr dang khûma pârvul lai;
Angel-te huan mawi reng a'n,
Kei, ka hmâ a'n a pârvul e.

Thliah hnu chhâwl uai ka ngai nem,
Thliah loh Pâr a vul lai ka thlîr;
Kan rûn zar hnuaia vul reng a'n,
Ka pâm lua dai phul mawi a'n;
Vâl lungmawla'n a thliak ang maw?
Lêng tuichawii'n a tawn ang maw?

Kan huan zau a'n vul mai teh la,
Ka chawm ang che zîng chhûn zânah;
An thliak lo'ng che uai mai tur a'n,
Kumtluangin vul mai zâwk la;
Lunglên luaithlî min nulpui la,
Hnêmtu pârmawi chang mai la.

Hahlai chhâwk a'n ka thlîr ang che,
Lungngaih hnêm a'n vul reng la;
Thai leh hrai chawi ka rel thlengin,
Chuti'n vullai bâng bîk suh la;
Rûnmawi pangpâr ka tân hian,
Damchhung pâr lo ni ang che.

HAWILOPAR..

Abrahama Aba
HAWILOPAR..

Kumtluang rinawm kan tiam laia,
Ânka dam leh seih pâr min hlân;
Ka thai rinawm min tiam laia,
Ngen nan luaithlî
i nûl kha;
Dî dang pawm loh min tiam kha,
Tunah an liam zo ta em ni le?

Lawm luatah ka nui nitin,
Chhailâwr vâldang reng ngai lova;
Chhûnni tâwk lo kan tih lai kha,
Zânkhua rei kan nghâk duna;
Vartian chibai hlan nghâkhlel rengin,
Muang te'n zânmû kan chhîn kha.

Thaikawi tam a tâwk zo lo,
Vawitam ka hlân che thaikawi;
A tâwk lo tiin nau ang i lo nuar,
Ankanêm hlânin ka thlem che;
Luaithlî hulin mawi te'n i nui hmêl,
Mitthlâ a'n a cham bâng thei lo.

Hawilopâr em mi thliah tak mai?
Kir rêl lo hnutiang min chhawn tak;
Hmânah vâldang tiam loh tiamin,
'A chhai' an ti che lenrualte'n;
Lairil a'n ka vai zo ta em ni le?
Nui ve-in laitual ka mawi zo lo.

Kumsul ka nghâk zo dâwn lo e,
Luaithlî nen mai maw ka zuam lo;
Lêngdang nui hiau ka thlir chângin,
Keizawng sennau iang ka lo tap;
Rianghlei vâl tân a na lua,
Sam ang then ka tuar zo lo.

TLEITIR LUNGMAWL..

Abrahama Aba

TLEITIR LUNGMAWL..

Khawilam tleitir nge ni ngai?

Bahsâm lênga thle no nghial;

Sum tam man inbel ngei saw,

Châwnbân vai no leh seihmawi;

Lamtluang phei a chhir nghial e,

Tu hrai duhlai tak ni ang maw?

Tlaikhua lo ngui lêngi tân,

Zântiang ei zawng iang a perchhuak;

Chhunlai mawitu hermawii,

Zânthim êntu em ni ngai le?

Ngal sâng mutia nen lung an rual,

A dî biak man tuak nan sum ngen e.

Vâltinte cho loh tleitiri,

A pheichheh mawi an hlimpui kha;

'Zânvâk' tiin an lo sel e,

Thai chang a'n an lo sâm lêngi;

Eng thil emaw a zuar leh ta,

Ka pam lua kei vâl dawntawia'n.

A di chhaina darzâm man chu,

A chûn leh zua dîl ngam si lo maw;

A sakruang mawi an zalh ta e,

Daikil kawmkâr hnamdang rûn;

A hnampui vâlte chen phal loh,

Karei maw.! a mak êm êm e.

Aw..tleitir lungmawl dâwn la;

I dâwn ve loh kan ram leh hnam,

A thangtlâwm lua hnam dang tawn a'n;

I zahawmna kan hnam tan,

I hloh tâk kha kan ram leh hnam hloh.

A tlai hmâ ngei hian sim mai rawh.

CHANG TA ILA..

Abrahama Aba
CHANG TA ILA..

A khî thangvan mawitu Si-âr-ah,
Chang ta ila min thlîr ve sê;
A lunglên biahnêm chang ta ila,
A tah chang nî-ah min bêl ve sê;
A puanbah nêm a'n chang ta ila,
A luaithlî nul chânga hulna a'n.

Chhawrthlapui-ah khian chang ila,
A lênna vangkhua leh rûn in;
Mawi te'n êng riaiin ên ila,
A êng nuam a'n tualchai se;
Nui hiauin ka hming than se,
A sakhmêl dârzâm chhun êngin.

Huiva lênthiamah chang thei ila,
A khî van sângah thlawk dêl dêlin;
Fang ila an vangkhua ngei,
An rûn sawngkâ-ah fuin;
Mawi tein annêm hlan ka nuam,
A nuilai biangsum thlîr ngeiin.

A sâw lêntu hring dur-ah sâwn,
Chang thei ila ka nuam ngei;
Ka dî thlan dai a'n thlifîm chan nân,
Ka lairil biahthu va hlân ta sela;
A vanga ka tahna luaithlî nen,
Lungchhir lâm ang a lo let nân.

An vangkhaw sîr luite dam diai a'n,
Chang teh ila ka nuam ngei;
Ka dî sakruang bual nân ngei,
A dang hnâwn a'n min dâwn se;
A tan engkim ka huam si a,
Enge ka pêk ang ka dîte kha?

KHUANU SAMSUIH

Thara Caution Lalthuthlunga
KHUANU SAMSUIH

Nunhlui puan ang min hnawl tirtu thladovi,
Dawn har ka ti hmatiang hun i zar hlimah.
I kiangah chhunni leh zankhua a sei ngai si lo.
Chantawk khuanu rel a sual ngai lo ve,
Hlimni tawite kan tan pialral.

Lei malsawm kan dawn inchen loh vang leh,
Mualza tamin kar min dan chang paw'n
I hmangaihna chuan ramri a kham ngai lo.
Rulh sen loh thilthlawn pek mi hlan hi
Sakruang leh hmangaihnain ka chhang let e.

Khuanu samsuih di ngei chu nang hi maw,
Nghing ve ngai lo i dawn lungruk lairil kha
Hmangaihnain a khat i tanglaiah zun zam phuarin.
Rimawmna parmawi lo vul chhuak chichiai e
Ka thliak ang ka tan a rimtui si.

Hun tam liampuitu kawlah ni a her zel ang a,
A thlawn lovang i tan ka rinawmna leh i beiseina.
Vawng reng rawh tiam thudi leh nun par mawi,
I tan ka hlan ka vanglai nun leh hun duhawm;
Hmang chul dun ang aw i Thianghlimna nen.

11:20pm
01301206

'LENGI, HUNPUIA'N CHANHAIIN I AWM EM NI?' -KOHHRAN

Daifém Val Renthlei
'LENGI, HUNPUIA'N CHANHAIIN I AWM EM NI?' -KOHHRAN

Lengtuai chemte, i van ruainate,
Kan hria laitual i len chhan thinte;
Dawn kan phan pui thin che asin;
Hriatthiamna tinreng nen kan hel che.

Angkhatin nangnen Khuanu zara'n,
Sikni herin hunpui kan hmachhawn;
Dang nem'aw kawla turni her,
Zan thim chung siar leng zawngte pawh.

Khuah dìla lengngha lengza iang,
Tudang dawn lo chhungkim hlim laite;
Puan ang bang ta beisei bo chu,
Kumtluan ser siam nan chang zo ta maw?

Nunkhua retheihna chu kan tawng za,
Rei hlimna ni lo um-a panin;
Sual rawng bawl nan 'hlimna tluantling',
Chhiah ta zawk maw mahni insitin?

I bo khua sei tur kan hai si lo,
He hunpui lo thleng tur kan nghahfak;
Kan hlimna thlentu chang tur hi,
Hlimhlawp bawl nan mai a kim thei lo.

Lengtuai chemte, boin pil lul suh,
Daiféma intek hrang mai loin;
Hetah kan hnenah hmun a awm,
Kohhran, Amite rantlatna chu.

-sangtea signature@7.12.2013

SIKNI TUKA PHUL HMUN CHAM DEL

Daifém Val Renthlei
SIKNI TUKA PHUL HMUN CHAM DEL

Phul hmun cham del, khau-zuangte ram tuanna,
Zing daifim leh chhum lei vakte'n mawiin;
Sikni tuka'n hnâwmte'n an bawh liai e.

A mawi chiang ngei, vau luangte cham luanna,
Tuk nizung leh chhum lei-kangte'n mawiin;
Sikni tuka'n muangte'n an chawih chiai e.

Chu hmun fan vel, dàwn-thlate tam fuanna,
Tuak mileng leh chhawn biahnemte'n mawiin;
Sikni tuka'n damte'n an chawi tlei e.

Chu hun nan rei, vuan thutiamte kam muanna,
Leng lungril leh phum rohlute'n chawiin;
Sikni tuka'n hlimte'n an awi diai e.

-sangtea signature@7.12.2013

KA NGAI MANG E..

Abrahama Aba

KA NGAI MANG E..

Hmana ka panlai nun kha,

Ka ngai mang e a liam tawh kha;

Ram tuana valêng kan sai lai kha,

Sih tlan valêng kan awh lai kha;

Perhfung chawia ram kan tuan lai,

Awh nân thang kan kam lai kha.

Tlangtin mualtin kan chuan lâwr,

Zingtian daifîm kan pal laite;

Luidung kan dung chhir laite kha,

Thangfenpa leh Chinrang zuiin;

Kha'ng hun ngei kha ka ngai, 

Nunhlui chang mai an lo ni e.

Tunah hai ang kan lo thang,

Hnah hlui iang kan lo uai;

Hringnun ram reh kan lo dai,

Luaithlî lungngaih hriltu ngei;

Kan nun a dang zo ta e,

Hmana ka hlimpui an liam zo ta.

Theih chang ni sê au kir ila,

Thangthar mittui lam ang let sê;

Sulhnu fang thar lehin aw,

Ram tuan zai rêl leh ila;

Ruamtin tlângtin hrût lehin maw,

Lêngva zai sak ngai leh ila.

Ngîrtling zai hla ngai leh imaw?

Sawngsawngbawkbawk zai nen;

Kangvâr zai rem chêpchêp nen,

Khisa siktui ngen huk thawm nen;

Lunglën natna kir leh se,

Nui hiau zai vawr leh ka nuam e.

KA BENG A MENG...

Zira Chhakchhuak Hualngo

KA BENG A MENG...

Rimawi ngawiin,

Thangvan si-ar thar lo mah se,

Ka rau zuaiin a nguai lo'ng e,

Nang, i awmin.

Thuruk thuh ruk,

Mitdel tan chauha hmuh theih chu,

Thimna hlim chhim ta'n kawng entu,

Atna fing thuk!

Mit tan chhit loh,

Thinlung tana eng thin a ni;

Benga ri lo aw-rawl ngei hi,

Ka rohlu roh.

HMANGAIHNA..

Abrahama Aba
HMANGAIHNA..

Thlifîm, dam tea lo thaw iangin,
Hahchhâwl dawm nân em ni?
A lêng vel kiltin hrûtin,
A zûn a chhuang lua em ni;
A zûn a zamtîr e hringmi tân,
Khuangruah iang a surtîr e.

A chhem hiau e dam tein,
Dam nân a tha an ti;
Dorâl a tlawm thin an ti,
Hneh loh reng a nei lo an ti;
Tharum ngai lo râlthuam a ni,
Hmangaihna hlû leh thlum tiin.

A zûnah chhâwl ang kan uai,
Uai hnu a salbet zo zel e;
Chhuakin an râlban zo love,
A man hnu reng an hmin zo ta;
An tân engdang a awm chuang lo,
A zûn a châm an tânglaiah.

Duhsâm a pek a kim si lo,
Hmangaihna thikin dorâl lo lian;
Derna râwl mawi chhuang vein,
A râlthuam tha tir chhuak e;
Lairil lova hlântu a lamtang chu,
A hmêlmawi hliah a'n a tîr e.

Kan tahpui tur a'n hei ngei hi,
Hmangaihna-ah tahna lo lang;
Luaithlî a ngen e, hmangaih luaithlî,
Lânu leh vâlrual an tlâwm zo ta;
Tiam hnu sûtin an kir,
Beidawng an siam hmangaih natna.

THAWNTHU KUM SÜL VËL

Daifém Val Renthlei
THAWNTHU KUM SÜL VËL

Kha thu ka pawm duh loh kha,
Thiam anga ka lan takna a;
Mangtha tih thu ka sawi takte,
A thar leh thin siam thata mawiin.

Ka dawn kir thin hlim lai kha,
Nang anga ka lungril luah pha;
Awm lo duat thu i sawi thinte,
A thar leh thin koh kira mawiin.

Tawngkam khat vanga na kha,
Thiamthu sawi lo ngawih tak vang a;
Diriamna ka hlan tak chiamte,
Ka chhui leh thin lainata hawiin.

Thupha chawia mi ngen kha,
Engah ka lo pawm mai loh a;
Hmangaihna ka lo hnawl tak le?
Dawn thin che maw, riang chána chhirin.

I hmangaih ka nihna kha,
Za'khua chantu che a ni a;
Relthang kai hliam i nihnate,
Ngen ngam lo che mi ngaidam turin.

Heng thawnthu kum sül vël ta,
Phul hmun zing daifem bawh iang a;
Cham thin thinlai beiseinate,
Her sang turni en kiam leh iangin.

sangtea signature@9.12.2013

Thuhar:
Kum sül vël - kum khat pumhlum (vëlchhuak)

DUHTAK

Sangtea Blacksmith Chhangte
DUHTAK...
I tan rose par ka thliak a,
I hnen thleng dawn lo mahse,
Vul ni rei dawn lo mahse,
I lawm hlawh dawn lo mah se.

I tan hmangaihna ka hlan a,
I lairil thleng dawn lo mahse,
Hringnun par hi vul tawi thin mahse,
Duhtak kumtluang atan...

KA VAI RIAI..

Abrahama Aba
KA VAI RIAI..

Vâldang tawna i biahzai râwl ka hria,
I tawna a lairil biahnêm ka hria;
Suarpui lo chim ka tuar a'n,
Khuanu'n eng a'n min dan loh?
Luaithlî far tur ka chhiar nitin,
Hlen loh a'n min tiam mai hi.

Zânkhua sei sê zânmû chhîng lo,
Damkhua sei sê vaihkhua sei;
Khuarei kumsûl a rei em e,
Khuanu ruat reng a hril kim;
Ka tahni reng ka tawng tawh,
Kumsûlah an dang chuang bil lo.

Tiam lo khân min hlân zâwk la,
Sel tur reng ka vai zâwk tur a;
Lairil min dîl lo zâwk mai la,
Hlânin ka chhiah lo tur che lo ni;
Kumtluang then loh min tiam lo la,
Thai a'n ka nghâk thlawn lo tur che.

Pal ang dantu i lairil luahtu,
Thian a'n ka thlan ngei pawh;
Min hualin tahna ka tân maw?
Ka thinlai ata aw.. Ka bo si lo;
Keimaha keimah kha ka tahna,
I nihtîr e ka vaih nân reng hian.

Famkhua ka hnaih chângin,
Tawng che ila nui hiauin;
Min tiam ka thai chang teh la,
Vaiin ka riang bîk lo'ng duhlai;
Tia ka sâm bân loh ngei pawh,
Ka dorâl nitin mai an chang si thin.

RAM REH RIAI RUAMA LUNGLEN

Daifém Val Renthlei

RAM REH RIAI RUAMA LUNGLEN

Vawmvate 'chi hlawk, chi hlawk',

Ram reh riai ruam ka fang a'n;

Ka ngaithla, thlang mawng lam thlirin.

Phengphe eng unau phe phe,

Ruam kam turni zung zam a'n;

Ka thlir e, 'Khawi tuan maw?', tiin.

Hung kar thlauh tuk ri kauh kauh,

Nget-lung tangro chen kher a'n;

Lung ka vai, pawh loh ram fangin.

Hnahnem thlifim phet sen sen,

Nem dam diai alo thawt a'n;

Lung mi len, kai thleng maw iangin.

Thlawh fai mual bawha thai thai,

Rammi arva muang tla thawn iang;

Nuam thawn bo, lunglen khawhar hi.

-sangtea signature@10.12.2013

THLIHIAU TLANG KA CHUAN

Dawithiam Lalruanga
THLIHIAU TLANG KA CHUAN

Thlihiau tlang ka chuan e, chhuihthangvala’n
Sialkhawpui mawitu zo bawm thing rihnim,
A zing riai dai phulleng cham diai sira’n.

Len lai kham lo zai kungpui fam tawh hnu,
Leh zai vawr za ‘Awmhar champion’ valte,
Thin lai a nghawr dim e, an sul an hnu.

A lang tlang reng a tam ngei kawlrawn saw,
A mi leng zingah he tlang han chuana,
Awmhar zun ngai lo awm thei tak ang maw?

Hellai di tawng lovin riang chang mah la,
Khawtlang zun leng tal i tahpui mahna.
(10.12.2012)

HE TA HI LE!

Daifém Val Renthlei

HE TA HI LE!

(accrostic-cum- telestic)

Hawihkawm lenrualte'n an hlim zawh loH

Eng sawi lo lunglen inhnem tum vE

Thiam si lo rual han pawl, hlau thin an huaT

A leng, rian khua tu'n min hriat loh khA.

Hril thiam chuang lo tlingin ka khuaH

Iang ne'maw huleng val, ziak mah I

Liam zai relin letliam daifém ka paL 

En teh! Ka chhar e, ka hlimna tawk bawktE

-sangtea signature@9.12.2013

''Aw, lungduh lenrual then hnute'n,

Eleazer Hmar Biate
''Aw, lungduh lenrual then hnute'n,
Ngai ve maw kan lenlai;
Tlangtin mual tin a chuan zelin;
Thlir hian ka ring ve e,
Khuarei kum sul lo vei mahse,
Awm khawhar lungllenin;
A ngur nun iang lungrual lenna,
Nghilh ni a awm lovang kan hlimlai ni zawngte.''

CHRISTMAS CHIBAI..

Abrahama Aba

CHRISTMAS CHIBAI..

Kumpuisul lo herliamin,

Sikni engmawi lo chhuak e;

Mitin nghah hun lawmawm chu,

Sikni êng leh zân Vûr leh daifîm;

Lunglen hril reng a'n Thlasik kawng,

Vân thiang kâra lo paw chiai nen.

Lêngi leh Vâla di chhaina,

Chhandamtu pian ni champhâ nen;

Urlâwk zân nuam leh rapthlâk,

Hringmite sualna zân chu;

Thlarau thianghlim fa pian ni,

Falak siamna zân a'n kan lo siam.

Lal ropui a tahna ni-ah kan chan,

Hmangaihna Lal kan hnawlna ni;

A piancham kan suasam chiam e,

Silhfen mawi phêna awm chu;

A rûn kan lawi mawi takin,

Thinlung dai pâwn hnai siin.

Hun lawmawm kha hun rapthlâk,

Chatuan hremna lamtluangpui;

A fakna hun kha kan rawk e,

Nawmchenna kut kan chantir;

Lal ber lung a awi zo dâwn em ni?

Kan hlim nân a der mai kan lo hlân.

Engtin nge unau nang ve le?

Piancham neitu duh ang zelin;

Thianghlimna zah nan aw ka thian,

Chuti'n lunglai i chhir lo'ng e;

Duhsakna nen hun lawmawm,

Christmas chibai dik tak aw.

Sulhnu leh nunhlui thar nan renga,

Imanuel Cvl
Sulhnu leh nunhlui thar nan renga,
Xmas lo her tur hi,
Hringmi rel reng nise,
Chhuak lo turin kal lai ka kham tur,
Nunhlui puan ang hnawla,
Nghilh zai rel reng turin.

I AWM TA SI LO

Elti Muana
I AWM TA SI LO

Thangvan chhawrthla mawina a kiam a,
Tiamthu thlunna si-ar hlutna a tla hniam a,
Uaia vuai loin parmawi an chul zo a,
A thlirtu chhingmitin luaithli a nul si a.

Ka dinna hmun apiang nang ngaia ka dinna hmun,
Ka dinna dinhmun hi nang vanga ka dinhmun,
Chhemdam thli chhem dam zawh rual ka ni lo a,
Damna dawi dawi dam zawh chi lah ka ni hek lo,
Ka ta kha ka tan i awm ta si lo a.

PIPU SULHLUI CHHUIIN...

Zira Chhakchhuak Hualngo
PIPU SULHLUI CHHUIIN...

Pipu zun phur tlang bawm romei,
Kuang ur khu zam a thang;
Tlangzun tang vuan hrualhrui a fei
Dai hnai mahte'n ka fang!

Laisuih mawi an sulhlui ka chhui,
Suihlung thlohmu a kir;
Rauthla'n an sul i hnu ka zui,
Nun mawitin mi zirtir.

Neih theih phung loh 'time machine' hi,
Nei i, kha'ng hunah khan-
Zawhza zoin hring thanlai ni,
Awi! 'Huai no' ngei ka tan!

Kawlkei hmaah ka zam bik lo'ng,
Chengrang ka hmachhuanin;
Zahlei zawl val ka inchhal nang,
Khabe phawsial purin!

Laimi khuavel thang pasaltha,
Lei ang ka theih pui tur;
Zomi lungdum sensiar tin kha,
Kei, kawlkei tan' kur tur! 

MIN RÛN

Abrahama Aba
MIN RÛN

Hmanah kan ram tan kan hlan,
Kan hnam tân kan pe kan rohlû;
Kan chakna leh theihna,
Huaisenna leh tumruhna;
Dorâl hlau lova lu kan lâkna,
Ram leh hnam tân kan ti.

Chengrâng chawiin ram kan vêng,
Kan humhalh kan zia leh tawng;
Thlahpawlh nun reng kan dorâl,
Hnamdang rûn kan ngai lo;
Hei chauh kan duh kan ram ngei,
Muanga kan chen ve nân.

Tlawmngaihna leh hawihhawmna,
Aia upa zahthiam leh Nunmawi;
Huaisenna leh chakna,
Kan hnam rohlû leh himna kulh;
Dorâl hmâa kan chhuan ber,
Ramdang kan khûmna ralthuam.

Thangthar finna sâng zelah,
A chuai mai dâwn em ni le?
Kan hnam kulhpui zoram ngei,
Ze hrang leh hmêl tinreng;
Chawhpawlh nun kan chhuang ta,
Hnam nun zia reng khawiah nge?

Chengrâng lovin dorâl kan tâwn,
Kan ram ngeiah kan tualthi;
Kan ram ngeiah kan tlâwm ta,
Ramri kham a thlâwn ta em ni?
Khaw'ng zonun dik tak kha le?
Auh kir zai kan rêl dâwn lo'm ni?

A SO CALLED LOVE...

Zira Chhakchhuak Hualngo
A SO CALLED LOVE...

Love, such a blissful agony,
Thorny rose of sweet nectar;
A dreamt mansion that's near afar,
Oh! What a completing lonely!

Love, thou art are a sinking sand,
Flocks of rocks where no men can stand!

Love, a fire upon the snow,
A killing floods that ever flow

HRINGNUN BUMBOH..

Abrahama Aba
HRINGNUN BUMBOH..

Mîm ang piangin piallei-ah,
Hringnun chhiar zir tur reng a'n;
Luaithlî, Nui hmêl chhiar reng a'n,
Hlimni tawia tah ni sei kan chham hla;
Nun nân thlantui leh Luaithlî,
Nitin chaw-ah kan lo hmang.

Hunbi kan chhiar hmatiangah,
Duhtin kan thlang hmingthan nân;
Sumpai kan um hahchawlh nân,
Di chhai kan rêl nui hiau-in;
Mahse khaw'nge kan zawn chu?
Tawn ni her lo kan her suau suau.

Zawh zel tur a'n hringnun kan her,
Beidawn hnu-ah beisei kan thar;
Kum leh thar tiam-in ni kan vui,
Mahse khuarei an lo chang;
Fam chan nân hun kan thleng,
Tum ram reng thleng ta lo chuan.

Tu leh fa tân kan chhiah rohlû,
Thawhrim rah hlû hre lo chuan;
An chên thatchhiat zuiin,
Chhiahtu thawh hah an hai;
Chûn leh zua duhsâm a thlâwn,
Hrai riang siamtu ro mai lo ni.

Tawnmang iang a chuai hringnun,
Hlimthlâ ianga ral leh mai beiseina;
Lungngaihna thlentu hlimna der,
Tuhrah duhawm lo siamtu nun chu;
Hringnun rei lo hlimthlâ kan chên,
Pialral tling lo kan vultir thlâwn e.

CHHAWRHTHLA ENG MAWI

Khiangte LR Lra
CHHAWRHTHLA ENG MAWI

Aw, chung chhawrthla eng mawi,
Suihlung zawng i ti leng ngei e;
'Mang-tha' pawh atu reng hlan lo va,
Min liam san tak mai chu le !

Nang tawn leh hi maw ka nghakhlel e,
Kan vangkhawpui tual lenna reng saw ;
A thim lua e, i eng ka'n ngai lua e,
Tunah khawia'n tak tuan ta che maw.

Zaleng zawng zawngte lungdumtu,
I ngaiin chhawl ang ka uai hniang e;
Ka vai ruai e nang vangin ar-ang,
Kan hlimlai zan te kha rial angin adai zo ta.

HMUN MAK CHU..

Abrahama Aba
HMUN MAK CHU..

Hmâsâng ata din tawh leilung,
Chhiar sen loh thil mak awmna;
Tlâng sângte leh ruam tinte,
Tuifinriat leh khawmual;
Hringmilêngte leh nuncha tinreng,
Chawrtin hnah nêm leh tuifîm.

Boruak thiang leh Daifîm,
Lêngnghate leh chungleng vatin;
Vêngtu pakhat hnuaia lêngza,
Leilung ropuina an puang e;
Chhiar sen loh a mawina nen,
Leilung fate kan lo ni.

Engkim an hmun zelah ze hrang,
An zia zelah thil mak chitin;
Ropuinaa thuam dan zela danglam,
Chhui phak loh thil mak inphûm chu;
Siamtu'n a lo duang kim ngei.

Tuifinriat hnuai thil ropui,
Mifingte thluak buaina râl;
An chhût an zawng an hmu lo,
Mak tiin a ngaihna an bo;
Engtin nge a mak an hre lo,
Thlunglû hai reng-in an thle.

Leilung ropui mak leh dangdai,
A chhûnga hriat loh dangdai;
Thiam zirte thinlai thawngtu,
A chhanna zawng mahse an hre lo;
Lutin lai mahse a thawiin an hril,
Thil mak dang tam tak nên chuan.
Siamtu ropuina a lo ni.

KA RAM RIANG-TE HI

Khiangte LR Lra
KA RAM RIANG-TE HI

Hrut del del-in,
Leng der der ila,
A lang ri riai e,
Zofate tual lenna,
Tlang hring dum dur saw,
Zing daifim leh zan boruak thiang te'n,
A tuam vel e ka ram riang-te hi.

Fang zel-in,
Chuan zel ila,
Tlangtin chuan zel ila,
Zofate lenna tlang leh vangkhua saw,
Kei ka awmkhawhar min hnemtu lo ni,
Zo nun mawi tlawmngaihna te'n,
A tuam vel e ka ram riang-te hi.

Ka ram riang-te,
Hmangaihtu reng i nei ta lo'm ni,
I chhunga cheng zofate hian maw,
Lem changin a uire san ta che 'm ni ?
Mi dik chu khawnge a awm tak le,
Hleprukna, duhamna leh suahsualnain,
A tuam vel e ka ram riang-te hi.

TURNI IANG KA LIAM...

Zira Chhakchhuak Hualngo
TURNI IANG KA LIAM...

Turni a liam,
Thim hlim zunin mi hliam;
Rinawm rinna 'thu tiam',
Tunah a kiam!

Zun hlun mi chhiah,
Ngaihban seih-par mi thliah;
Chu chuan hlimna mi hliah,
Thimna a fiah!

Hlimni i hmang,
Kei chuan sulhlui ka fang;
Thaleng dang par i thlang,
Keizawng ka riang!

Mawina khim la,
Hlimna thlifim chhimin,
Vanglai chhai rawh nitin,
Kei ka liam ta!

NANGMAH HI HLA MAWI CHU I Ni...

Zira Chhakchhuak Hualngo
NANGMAH HI HLA MAWI CHU I Ni...

Ka-a sak loh hla mawi i ni,
Ziak-loh-phek ruaka chuang ngei chu,
Thlifim rema rimawi siamtu,
Khuarel zaikung te zai chhan hi.

Hrui rimawi hian i rawl a chawi,
I tan si-ar te'n van an mawi.

Van Angel zaipawl te pawh khian,
D..., i tan fakna hla an hlan. 

ZORAM THAR DIN TURIN ZOFATE'N MAWH KAN PHUR

Hruaia Vandiau Tlanglau

ZORAM THAR DIN TURIN ZOFATE'N MAWH KAN PHUR

Khawvâr puanin zíng tian bawár a pau,

Zoram din thar turin Zofa min au.

Chhak tiang lenkáwl turní ngaite'n lo chhuak,

Zoram din thar turin Zofa min hmuak.

Chung thangvânzáwl zawhin tûrní a kai,

Zoram khawvâr nghâkin Zofa kan vai.

Zoram hruaitu belhfâk leh chelh tlák tur,

Thlang thiam turin Zofaléng mawh kan phur.

Kumsûl nga veia lo thleng leh tur chu,

Chiangte'n dáwnin mi tha i thlang ang u.

KA HMÊLMA

Abrahama Aba
KA HMÊLMA

Engkim hi ka ta ni se ka hlim tur a,
Lungngaihnaten min ngaina;
Hlimnaten min hlauh rawn,
Ka tân pârmawi an chuai;
Sakhmêlmawi ka dorâl an chang,
Beiseina pawh ka tan beidawnna.

Chauh châng nî ka tan nitin,
Tahlai ni ka tân kumpuisul;
Luaithlî pawh ka tan hringnun,
Hringnun pawh ka tan vaihna;
Hmangaihna chu ka tân vanduaina,
Lainatna pawh chuai zel e.

Thiantha pawh ka dorâl,
Khawngaihtu pawh a lang chin;
Ankanêm pawh natna thang,
Chhûngril eichhetu ngêt lung;
Pâwn lam zawng Angel kawrfual,
Suamhmang puanvâr sintu.

Ka hmâah nui hiau thlemna,
Ka hnung lamah thihna hruihrual;
Chhûng lamah an hrâng lua e,
Fuihna tinreng nen min nawr;
Ka kalna atân hlîng chi an theh,
Ka hmaah an zîng chhûmpui iang.

Hlimna min pêkin an tichhia.
A thawm nan tûr min lo pe;
Dam nan anka der min fah leh si,
Ka hnung lam a'n nuihsawhtu;
Angel iang dam tein min chawi,
Ka chhiat nan engkim an rêl.

Ti leh chhin..

Crimelord Khawlhring

Ti leh chhin..

Hmangaihna chu -

Luitui luang ang a ni!

Hnar hran, tlang hran nei;

Hranna hnar, hranna tlang.

Chawlhna hmun, hahdamna in,

Damna in hahchawlhna nen;

Hmangaihna hi -

Ropuina, hmingthanna a ni.

Thanropuitu hming ropui chu,

Hmangaihna a ni.

NGHILH HAR CHANG PANLAI

TC Lalremsiama

NGHILH HAR CHANG PANLAI

Dâwn lêm awm lo panlai nun ngaihawm ka ngai,

Tû dang ngai loa hlim têa kan lên lai;

Koh kîr rual si loha zamual liam tawh hnu,

Ngaih a thar zual châng hian mitthlâin ka hmu.

Nghilh har chang panlai,

Âw, ngaiin ka vai.

-Mârema @Ngaihlungdum Shots & Poetry Institute® — feeling old.

Khawvel kan sawr zim a,

Crimelord Khawlhring
(Hla thu hman tur ka hre lutuk lo a, ka rilru a awmdan in ka ziak tawp a. A duh tan a siam danglam theih a nia)

Khawvel kan sawr zim a,
Kan kar zau zawng erawh a ngai reng,
In khat, khum khat, dawhkan khat,
Engkim kan tih a nia,
A karah 'Mahse' tiin
Thu a hmer bung leh si thin a.
Mit hmuhna aia tui luang kawr;
Beng hlimthu aia tap rawl hriatnan,
Hachang thial bap bap in,
Hmai sen ur ur chung chuan,
'Liam mai rawh' kan tih a tul leh thin.

SIKNI ENG ZUN ZAM

Jo Kima Colney
SIKNI ENG ZUN ZAM

Lung ti leng sikni eng zam ririaiin piallei char a rawn chhun leh ta,
Hringnun boruak hlimawm ber tleilai tuala kan awih ang kha.
Duhthu leng phak chen kan sam lenrual tualkai zawng khan;
Chunnu zua leh pipute banah kan vuan rualawh kan ban,
Chutin tleitir biangah chek a kai tan duhleng vala sam.
Hmatiang dawn lo leng kan hlim za khua zawng leh
Sikni eng zun chhim zai rel leinungpar zawng te.

Tuaktin remthiam vanzawl kal lai liam lo vin cham reng mai la,
I zun par mawi rimtui hlimte a kan chhai liam tawh a kha,
Hringmi lawm reng nan chhaktiang kawl chhuahpui leh la;
Biak awm reng i lo ni kan ti ta ve ang i lung lawm ve an,
Chutin i ropuina chhim zai vawrin piallei hi a khat ang.
Vantukverh inhawngin Bethlehem a rawn thlir anga,
Edenpar chul mawi lai ber rawn chhim ve tur in.

Tlai khuaah phan duar duarin a lumna zawng nen buannel a pel a,
Vanlawng zin kawng ianga senmei ang sen cham phei dur in,
A chung van zawl zawng chuan maw leilung an mawi ngei;
Zan tlaiah siar a rawn tira Sikpui kawng rawn sial zel in,
Chutin hunpui thleng tur an awi Siar thlawk vel ten.
Vanleiram inrem lehna zai sa angel an ngui riai a,
Lei lawmin a khat leh dawn i siamtu zarah ngei.

Khi sikni eng khian lunglai mu hnu kim ten a kai tho leh thin a,
Min ngaihzual tira hmana sakhming kan lam kan lam te kha;
Chelh din tum lo reng a sikni eng thlang kawl kan liam leh,
Auh kir tum duhthu leng kan sam tur reng hi dawn lova,
Kum hlui kan thlah kir lo tur renga khuanu leng ruat.
Chutin Sikni eng leh boruak leng vel ngaihawm khan,
Dawn bik lo reng hlimlaipar thliakin zamual a liam.

SANS INTITULE

Ruata Da Little Dictator
SANS INTITULE

Chawlhnaah hlauhthawnna, beiseina inah beidawnna .
Lawmna kuhmum a tliak a, a par hmain tihchhiat a ni a,
A mawina a lan hmain leiah rah sawmin a awm ta.
Hmathlir a zuihral a, thimna in ro a rel leh fo thin.
Buaina a ta zalenna, zalenna ata thawvenna chu khawnge?
Tawp chin nei lo, hlimna thamral thei lo chu kan zawng a,
A leihlawn a lawn ve lo nih chu kan thil hlauh ber a ni,
Kan tlan tanna chu kan tlan tawpna a ni leh tho thin.
Tlan chak ber leh tlan muang ber an tawpna a in ang thin.
Lawmman dawn tur chu a tlan a te rinna a innghat a ni.
Hrehawmnaah lawmnna chharin,
Lungngaihna ah lawm avangin nui thei thin ni I la,
Ka lu atan hian lallukhum dang reng ka phut lul lo ang.
Ka hnungtawlhna hi ka hmasawnna, ka tlukna ka ngheh zualna,
Tihtluka ka awmna hneh theih loh nun min neih tir tu ah chang se,
Ka tan hian par thi dang reng a ngai tawh ngai lo ang.

THANGTHAR NUN..

Abrahama Aba
THANGTHAR NUN..

Kei, vâldawntuai mai hian,
Thangthar nun reng ka hne;
Thangkhat nun tem ve mai hian,
Tar nun ning iang ka lo phun;
A lêt hnih tal dam leh ila,
Thasiama iang ka chang awm e.

Kawng bîk nei lo kan kûrpui,
Nawmna rei lote mai kan chen;
Kan khek ruai ruai duh zawngin,
Kan zawn ber hmu siin kan tap;
Kan duh ber tawng siin kan kiu,
Nawmchenna fam kan chanpui.

Kan nghah chânin kan sûn,
Kan hloh hnu ngaiin kan tap;
Kumkhat daih mai kan thlahlel,
A bâk reng dawn hian a phâk lo;
Vawikhat nuih nân kumtam kan tul,
Kumtam tah nân vawikhat kan nui.

Hmêlma atân mai thian kan siam,
Kan duh chin lain a bâk kan hnawl;
Zankhat laikhum zalpui atân,
Kârtam kan chhai di thlâwni;
Rei lote hlimna mai atân,
Derna luaithlî a hlân valmawia.

A hlâwk nan thian der a siam,
Nui vun vunin a phiarru e;
A hmuh veleh hnawl mai zel e,
Lêngdang luaithlî reng a dâwn lo;
Nikhat a nuih nan a tahtir zel e,
Mahse hlimna reng a kim chuang lo.

KA VAI E..

Abrahama Aba
KA VAI E..

Enge ka hril tak ang le?
Ziakfung chawiin ziah tur ka vai;
Lunglen thu ka hril dâwn e,
Mahse ka hril tam tawk ta lua;
Hringnun ka chhiar dâwn nge?
Ka thiam tawk ka puang zo tawh si.

Lêntu hnahnêm leh Sîrva,
Tuiluang leh satin tualchai;
Partin vûllai min zem nat zia,
Ka hril tam ta a bâng chuang lo;
Ziakin lunglen bâng thei se la,
Ziakfung chawiin ka thai ngei ang.

Panlai nun hrut zai ka rêl dâwn e,
Ka hril tawh a tawk loh takah;
Dâwnin ka chhût lairilah,
Ka vai lua e, hril zai ka rêl thei lo;
Ram ka vei leh dâwn em ni?
Zawm loh chham hla ka tiang vûm e.

Lêngi hel thu ka thai leh dâwn e,
Hei pawh ka hril tam ta lua;
Hmêltha leh chhia ka hril kim,
Hnawl leh pawmlai ka kiupui fo;
Engdang nge ka hril leh dâwn?
Hril tam hian a ngai mai ka hril.

Hril turin hril tur ka vai ruai,
Thlunglû ka her sawi vel a;
Suangtuah nan ka thluak a thâwl,
Hriatna dang reng ka nei love;
Tu'n min mi sel lo se kei ve hi,
Ziakfung chawiin ziah tur ka vai.

SIKNI LEH HRINGNUN

Zira Chhakchhuak Hualngo
SIKNI LEH HRINGNUN
(Ka post nawn tawh em le...!)

Zingtian sikni eng en tleu daifim ten,
Ka thinlung chungril tur ang hian min run;
A mawinain ka tan hlimna a phen.
Rawn thual leh e, hlimlai leh hlui hnu hun.

Ngelchetin dawn kai zel e hringmi leng,
Pialleia tawn ngai loh tur kan zawng fo;
Khuanu'n hringfa leng tan a ruat loh heng-
Duhaisam kima hlimna leh nun tlo.

Sih nau ang nui ri sul ang zuitu chu,
Lungngaih beidawnna rum ri a ni chawk;
Sam san luatah tahna ruamah kan tlu,
Sik khaw nuam pawh thal va ek char nen bawk.

Beisei bo ngiat lovin i chan lawm la,
Vangpui chhaih te'ng aw, chen la nun, i ta.

YE

Zira Chhakchhuak Hualngo
YE...

I long for not such worldly fame,
But, oh! for thy name;
'Need not endue with such pleasure,
Long'st thou'rt my treasure.

E'en if I berif't of hope,
Let ye me cope;
Then, hell, well, turn to heaven,
Where dreams happen!

Thou art my fort,
And my comfort!

ZAWL TLING VAWN NAT

Khiangte LR Lra
ZAWL TLING VAWN NAT

Vawiin meuh chu, vawiin meuh zawng,
A leng em mai Aw, a leng em mai,
Ka suhlunglen hi, kei ka suihlunglen reng hi,
A zual chuang em ni, zual chuang em ni le,
Hnem thiam awm maw, hnem zo awm tak ang i maw.

Ka nuam mang e, ka nuam ngei e,
Huiva len thiam ianga thla khawng a,
Kawlva lenchham a ka di siangah lawi ka nuam e,
Hlan ila biahthu tinkim leh luaithlipui nul reng hi,
A dam ngei ang, kei ka zawl tling vawn nat hi.

LENGHLUANPA KHA...

Zira Chhakchhuak Hualngo
LENGHLUANPA KHA...

Zai zam na'n ban a kham zo a,
Thim a zing, lung a hnim ka tim;
Ka thlir a saw hmar chhak thlang chhim,
Ka leng ngui riai e Lenghluanpa!

Khabe zunfei lallai a chuai,
Seih hmel a hnim, sakhmel a vuai.

Vanglai chena lawhleng thlang thin,
Mi thlim ta lung tirun hunin...!

EN TEH HMANGAIHNA SAW.

Khiangte LR Lra
EN TEH HMANGAIHNA SAW.

En teh ka Lal zalna saw,
A tlawm rii riai mang e;
Ran in tlawm tak hnuaiah,
A chun Mari'n a chawi e.

En teh Bethlehem dai reh,
Thlasik vurin bawm chii chiai e;
Van Lal-ber nau ang alo tap a,
A tlawm ngei e, a zalna ran thleng.

En teh khawchhak mi fingte,
Lal chibai buk turin an lo kal e;
Berampu te'n an ro hlu an hlan a,
Enge kei ka hlan ve dawn tak le !

En teh Pathian hmangaihna saw,
Bethlehem leh Kalvariah alo lang ta;
Hetiang em a thuk hmangaihna hi,
Ka phu lo ve kei misual ber hian.

En teh Bethlehem hmun khawhar saw,
Ka Lal pianna a ni, in ropui reng a thlang lo;
Hmangaihna vangin hreawm tinreng a tuar,
Ka fak ngei ang che Aw, ka Lal Isu duh tak.

AN CHAWI ZO LO..

Abrahama Aba
AN CHAWI ZO LO..

Pârtin zing hming mawi hluan,
Kumtluangpâr an vuah;
Rinawmna hming chawi tur a'n,
Chuailopâr tiin a sakhming;
Nitin vul zai a rêl theih nan maw,
Tuktinpâr an lo ti.

Sakhming mawi an luah zo love,
Kumtluangpâr meuh an sa;
Thla bial pawh bân zo lo hian,
Chuailopâr an lo ti maw?
A chuai leh thuai si thin e,
Lemang der a'n a sakhming mai.

Tûktin pâr se a mawi awm e,
Thliak ila, vul lai a bâng dâwn si lo;
Uai mahse a vul leh dâwn si,
Mahse tûktin a pâr nem le;
Sakhming chang a mawi hluan,
A takah eng chang si lo hian.

Ni rei vul atâna chawi ve loh,
Derhken, Ainawn leh Naubân;
Chawnpui, Dingdî leh Senhri,
A hunlai mawia vul thin Tuangtuah;
Ka hlân zawk nang e tiamthu a'n,
An chawi zawk e an sakhming.

A mak ka ti ka hril thiam lo,
Sakhming daih hmâa chul thin;
Duhsâm chan nân an lo hmang maw?
Keizawng ka chhâl lo'ng e;
Sakhming phû lo a chuai mai a'n,
Ka tiam hril nân an tling love.

HUN LO HUN A HER TA.

Hmachhuana Hmar Zote
HUN LO HUN A HER TA.
(In loving Memory of T.Lalremruata)

Lungrualna tlang chuana hlim zai kan vawrna,
Zir rûn thiam a ngawi a, chhing mittui a hul lo e,
Sulhnu hmun hlui chhuiin a lang nuih lai nite,
Engtin i thlan Lungloh dâwna hawilo par thliahna.

Valte, Valte, thlafam chang maia'n i pam hmai lua e,
I lenrual leh nang hmangiahtu i chhung te'n,
Kirtiang i rêlna'n neih lung khawn kan nuam em e,
Mahse hun lo hun a thlen maw Remruattu'n?

Sakhmel hlim khan nuihzai i rel thei loa,
Kan tah zualah kam khat pawh min chhawn si lo maw;
Kohna aw mawi vangin ka râwl a i hre loa,
Kan tah mittui min hnêm theitu kan thian a liam ta maw!

Khua a nuar e kan tuar min dâwnpui lo hian;
Nungcha lengtin leh khawtlang an tap a,
Thang van sang kai chung turni mah khian,
Sûnna'n par tin thang a hêm chuai zo ta.

Lalpa, lo lawm ang che kan thian kan hmangaih kha,
A ngaiin kan sûn liai khaw tlangpui zaleng te'n,
I hmangaih ângchhunga'n lo lawm lul la,
Kan hmangaihin, kan thlahlel tih lo hrilh nâng che

VUL VE SE..

Abrahama Aba
VUL VE SE..

Hringnun kawng hlîng hmun,
Parfung chawiin vul ve se;
Ka tahna luaithlî zawngte,
Thlanah liamin luang ral se;
Beiseina thâm hnu ka auh zawngte,
Kirtiang rêlin ka lam lo hawi se.

Duhsâm chu an liam mai zel,
Chan loh phûtin duh ka sâm;
Ka sâm sâng nge? ka zo si lo,
Ka phû lo nge? Min pawm ve lo;
Hmatiang thlîr a'n min tir,
Hmatiang ka thlir rah ka tahpui.

Hnuchhawn ngai lo a'n min ti,
Ka ngaihlai zawng an awm si;
Ka hlimlaite kha hnuchhawn ram,
Panlai nunte kha ka ngai leh thin;
Puitlinna kawng zawh a'n min tir,
Sennau iang tah zai ka rêl leh thin.

Ka kawng chu duhsâmna,
Duhsam a thlâwnin ka lo tap;
Min hnêm a'n an zuam si lo,
'Thleng se sâm a ngai lo'ng' an ti;
Sâm ka zuam tawh lul love,
Ka tawn apiang ka chantâwk.

Enga'n hring ka lo chan le?
Fam changin kai ve ila rihsângmual;
Chutah chuan a ban ka ring thin,
Ka duhsâm thleng ve tawh ang maw?
Hringnun kawng zawh har ka ti,
Nun reng mai ka tân tahkhua sei.

TLAILAM LUNGLEN HLA

Jimmy Vala Chhangte
TLAILAM LUNGLEN HLA

Mu ah chang i la, lêng i la,
Tlainemah lenkawl hrut i la,
Thlawk a leng phar der derin leng i la,
Tawng ang i maw hman a lungdum,
Thliaklo a a par kan thlir,
Zalam dan a vul chhingchengi.

Kawlah tum ka nuam lenkawlah,
Thlir i la sumtual a nuimawi hawi vel saw,
Virthlilengah changin lem thiam i maw,
Saw biangno a nui a kal riak riak,
Chhai phaklo tleitir nuimawii.

INSAWMNA

Daifém Val Renthlei
INSAWMNA

Tan ila thu a awm thin ang hian,
Tan ila kan kara thuawm tur chu;
Tan ila 'thian' tih piah lam thlengin,
Tan ila an sawi hmangaihna chu.

Tan ila thu kan sawi thin ang hian,
Tan ila vawitam kanin auhna chu;
Tan ila a-milengte iangin,
Tan ila hlima insawmna chu.

Tan ila chen anih thin ang hian,
Tan ila thlahlela inpawmna chu;
Tan ila tuihna dir reng iangin,
Tan ila kumtluanga lendun chu.

-sangtea signature@22.11.2013

KUMPUI SUL A HER LIAM RUAI RUAI.

Khiangte LR Lra

KUMPUI SUL A HER LIAM RUAI RUAI.

Kumpui sul a her liam ruai ruai,

Hnutiang min chhawn ta fam khuaah,

Rihtlang mual liam hnu ka ngai zual thin,

Tah hluan zai ka sa e nilenin.

Kan run rial ang a dai rii riai e,

Mahriakin kei zawng ka tlei thei lo,

Riakmaw iangin ar ang ka vai si,

Chantawk daikawma run nghah chu.

Kei zawng vanduaiah ka duai chuang e,

Khawvel zawng samang then a bang si lo,

Nau ang tah ruai ruai a awl mang e,

Hlimten min awm leh la run nuamah.

KA THINLUNG HI

TC Lalremsiama
KA THINLUNG HI

A inthumrawn ulh ulh a,
A so bulh bulh a,
A sa hulh hulh a,
A buai tulh tulh a,
A mit sulh sulh a;
A chau telh telh a,
A thaw helh helh a,
A inchhût melh melh a,
A mit belh selh selh a;
A chiang lo tial tial a,
A hawi vial vial a,
A tawngvai bial bial a,
A phun mial mial a;
A men piai piai a,
A mittui a luang ngiai ngiai a,
A lû a hai miai miai a,
A zawi riai riai a,
A zâl zal diai diai a,
A tâwpah a mu siai siai a;
A rim lutuk atin ni,
A ni, ka thinlung hi.

- Marema @Chhûrbûra Aium Depression Diagnostic Centre & Poetry Institute® — feeling Khum laizâwla mu dar dar chunga hah ve hle ringawt! — listening to Homeles

DAIFÉM VÂL

Daifém Val Renthlei
DAIFÉM VÂL

Daifém vála'n thupui hawn tur nei loin,
Ziaka mawi tur lah a nei ve hek lo;
Tlachawp thu hla lah a sakhming iang,
Daifém pal tan zawng sir hnawla'n anchan;
Leng Zawhzazopa nun kái mit-mei si e.

Daiféma'n tawna hril tur reng a awm lo,
Kei chuan paichem lekin chhâwlbu keu e;
Pa táwng tur awm tia lek khawrin,
Bukthlam ka chan lo rún sang chan ve e;
'Tu tãwng loha ka vul mai theih nan' tiin.

Vah leh ramtuan relin sul ang ka haw ve,
Khawrbu mah nise hah dawi ang mi dawm;
Zan tlai siar chhiar hunin damte'n,
Zal zai ka rel ve ami-léng iangin;
Tu'n an awt lo ka nunram retheia riang.

-sangtea signature@30.11.2013

BORALNA LAMTLUANG A CHHUI E

Daifém Val Renthlei
BORALNA LAMTLUANG A CHHUI E

A tawn liam sel phu miau hek i,
A chan leh ta riang hlei hluan;
Insit nepin lenrual a pawl chawk,
Tu-ah dang beisei anka tawng si lo chu.

Hlimlai thawma'n inseh ruhin,
Lenrual hlimna pawl si lo;
A dawn leh thin liamta nunhlui chu,
Nulin tahkhua a pan tharni a nei lo.

Inhnemnan kawmkil kar chuhin,
Fangtui hang a hawp leh thin;
A phang chial thin e thin ràm maiin,
Chu vang e atan a hla hlimna ni chu.

A chan tur ka dawn vai siin,
Tia'ng reng a nih zawngin e;
Piallei daiin boralna lamtluang,
A chhui ngei ang chatuan hlimna hloh hlenin.

-sangtea signature@30.11.2013

ZAHPUIAWM

Abrahama Aba
ZAHPUIAWM...

Zahpuiawm takin luaithlî ka nûl,
Tlângrel kârah zah ka dâwn zo lo;
Nui hiaua hlim zai vawr ka thiam lo,
Tawrh dan thiam reng a har lua;
Luaithlî nûla ka tah changin,
Tawrhna hmêl ka lantir si.

Fuihna thu tha tin ka dawng tam,
Beiseina chauh nunpui tur a'n;
Ka sûlhnu nunhlui ka dâwn kira,
Beisei ka san vang a ka tah a tam;
Luaithlî huikiang a'n min ti,
Duhsâm mah ka tahpui si.

Hringnun kawng a nia lawm,
Piallei dan ka zawh mêk chu;
Rauthlâ tal pawh chang lo hringmi,
Ka phurhlân a rit lua êm e;
Chakna thahrui reng ka ngai,
Tah nân luaithlî min hlân si.

Zahpuiawm a ka awm ka hria,
Ka hriat vangin a bâng si lo;
Fuihtu lenrual ka zah zozai,
Zawmin pawm duh hle chung si;
Turtu vanduaina vanga ka tah,
A tul si thin a riang ka tuar a'n.

Fam chan mai ka dâwn changin,
Chatuan ka chan tur dâwn siin;
A har tih piahlam ka nun,
Tu'n an hrethiam bil lo'ng e ;
Zahpuiawm nun ka tân tahna,
Pawisa thei lo nun siamtu ka nun hi.

BAWNG PU A PAR.

Hmachhuana Hmar Zote
BAWNG PU A PAR.

Kumsulin a her pui sikni engmawi,
Mual tin thualin par tin vûl an rêl,
Awmhar tlai hnîm Chaltuaia'n ka awi,
Turni'n lunglen zual lenkawla her;
Lung ka rualpui khawiah tuan che maw!?

Hrinhniang lêntu chhawl nêm thartuai leh,
Thuro di auh na'n zar ro a thlang,
Hnah hlui rap riin kan suar ram reh,
Rual hlim rawl ruam tin luaha'n a thang,
Suihlung rualna khawiah liam che maw!?

Mahte'n berhva iangin vanglai ka chhui,
Tuk ram tuan kan relna leh sumtual,
Nunhluia'n tah relna'n liamin a chûl,
Ar ang vaiin riang ka iang chhingkhual,
Lungrual pui khawihah tuan che maw!?

Perhkhuang chawiin ka awi kan vanglai ni,
Kawlngo iang inliam maw ka rual te,
Lamtluang mawitu bawngpu par mahin,
Kum thar heih loin par a chhuang e,
Rualduh hlimlai khawiah tuai che maw!?

# Hmanah eng thiamlo nihna reng ka bote;

Daifém Val Renthlei
MIZO POETRY -GROUP KA TAN
HLAWKNA.

(He group atanga ka mi hriatte FB chawlhsan tum an awm leh zauh thin, a pawi tia uibeh ngawt theih an ni si lo! An duhthlannaah sawi phak ka nei chuang lo nachungin ka ngaih dawn thu tal hi sawi teh ang)

# Hmanah eng thiamlo nihna reng ka bote;
Vaisi iang lengbo mai tur ka len lai,
Ziahfung chawia hla run zofate tan;
Bil liau e; ka tun hun reng ka dawn phak loh tawnna.

#Leng ve maw tawn pangte'n run nghak mawiin e;
Kei val daifem palmi tan thu ze mawi;
Vai ruai bang lai thiah kei ka chuh ve thawr,
Uap puipate'n zahngai kei ka lungmawl harh nan chuan.

#Ka chharta fo nun-ze-mawi leh finnate;
Val upa leh puitling zawk an chan vang,
A ni; kei zaia thiam ve lo nafam;
Ngawiin fuihthu hla min au pui zawk chung thlen ve nan.

#Hring ka chan chhung ka nghilh loh tur heng hlate;
Tawkú tur vawn iang ka liam pui mai tur,
Tu khaw hriat loh tura ka lo dawn thin;
Mawi mah suh e; nepa lang ka tan a mawi zual ngei.

-sangtea signature@11.10.2013

HAWILOPAR

Abrahama Aba
HAWILOPAR..

Kumtluang rinawm kan tiam laia,
Ânka dam leh seih pâr min hlân;
Ka thai rinawm min tiam laia,
Ngen nan luaithlî
i nûl kha;
Dî dang pawm loh min tiam kha,
Tunah an liam zo ta em ni le?

Lawm luatah ka nui nitin,
Chhailâwr vâldang reng ngai lova;
Chhûnni tâwk lo kan tih lai kha,
Zânkhua rei kan nghâk duna;
Vartian chibai hlan nghâkhlel rengin,
Muang te'n zânmû kan chhîn kha.

Thaikawi tam a tâwk zo lo,
Vawitam ka hlân che thaikawi;
A tâwk lo tiin nau ang i lo nuar,
Ankanêm hlânin ka thlem che;
Luaithlî hulin mawi te'n i nui hmêl,
Mitthlâ a'n a cham bâng thei lo.

Hawilopâr em mi thliah tak mai?
Kir rêl lo hnutiang min chhawn tak;
Hmânah vâldang tiam loh tiamin,
'A chhai' an ti che lenrualte'n;
Lairil a'n ka vai zo ta em ni le?
Nui ve-in laitual ka mawi zo lo.

Kumsul ka nghâk zo dâwn lo e,
Luaithlî nen mai maw ka zuam lo;
Lêngdang nui hiau ka thlir chângin,
Keizawng sennau iang ka lo tap;
Rianghlei vâl tân a na lua,
Sam ang then ka tuar zo lo.

RALTIANG A TA NGAI E

Daifém Val Renthlei
RALTIANG A TA NGAI E

>Haiku (Hokku) Form<

Saw raltiang kai ta,
Chhui maw e thluan duai duaina;
Lai ram chuan a ta.

Thuthmun mi relh-ru,
Val dang phena mi huitu;
Relthang dawn ne'maw.

Dawnin khua a har,
Hlimin a siam chu kan kar;
A ni, chuailopar.

Zam chiaia nghakin,
Tuan a tul si ngai chungin;
Zawhpui loh fangin.

Ngai ve awm ril a'n,
Hlima nuih dun avang khan;
Ka ring lai cham a'n.

Lunglen khawhar hi,
A na e ani ngaih hi;
Inthlah lo mah i.

-sangtea signature@4.12.2013

Kumsul veiin sikni kawla'n a thar,

Zira Chhakchhuak Hualngo
(Naupang 'recitation' tura ka duan, a thupui mi'n dahsak teh u'n!)

Kumsul veiin sikni kawla'n a thar,
Lung tileng romei zam leh tlangsam par
Chhawn an thle e zozam saron chuialo,
Khel lovin Lal pian hun cham an hril fo,

Hringfaleng nghahfak hunpui kan vauchher,
Bethlehem zunzamin tangah a kher;
Naufa leng rual hlim rel rawl a chiar nghian,
Hlimna tuihnuk a nung mitin tan hian.

Aw, chun leh zua, lenrual lungduhte u,
Hlimna tlhlifim chhimin hlim ang che u;
Mahse, kan tan riang taka piang a khan,
Tlawmna thuam silhin malsawmna min hlan.

Kan tan tlawm huam chawimawi nan tlawm ila,
Kan tan damna a niang a thihna kha.

SAKHMELTHA

Abrahama Aba
SAKHMELTHA...

Sakhmêlah tu khûm rual loh,
Si-âr sang tam zînga mawi ber;
Siali sakhming ka chawitir mai,
Senhripâr mawina khûmtu;
Sal a'n min vuan sê ka vui lo'ng e,
Siang a lawi nân e rûn ka hawng.

Suar ang lo chim ka thinlai-ah,
Sawilai biangno-i zûnzâm ngei;
Sawngkâ kânin lo lawi sê rûnah,
Sakhmêl lawmlai nau ang nuih nân;
Sam ang then loh biahthu hlânin,
Samsei lawmin lenrual an kim ngei ang.

Sâm ila ka sâm sâng em le?
Sensiar-ah pawh ka phû loh;
Suihlung kan rual si loh chuan,
Sennau iang nuih a har awm e;
Sâm ang then a tul leh si anga,
Suihlung ka chhir leh dâwn asin.

Sêlin anka hrâng min vur leh anga,
Sâr ang a zâm ngei ang ka tâwn a'n;
Siang dang a lawi ni-ah chuan,
Sensiar-i tia ka duatna ankâ;
Suihlung ka chhir nân lo ni dâwn si,
Sêlna ankâ reng ka do zo lo'ng e.

Sawiin ka sêp ning ta lua e,
Sial ang lawi lo tur dî mai chu;
Suihlung kan rual chuang lo'ng e,
Sim zai ka rêl mai zâwk tange;
Sâm-ah sâm sual a tam mai thlâwn,
Suihlung chhir ka tahpui ning zo ta.

ENG HRIAT SI LOH ZAN-VAR PUI

Daifém Val Renthlei
ENG HRIAT SI LOH ZAN-VAR PUI

(abba, cddc, effe, ghhg)

Zan dang iang ka tawn leh 'thil',
Ka chhui ngawi renga hrilin;
Fiah ngei tuma ril kaiin,
Eng ka man si loh chu 'thil'.

Thawm erawh a dang thin a,
Zawn loh liamah tlang dangah;
Awmin ka ngai si rilah,
Chhui hnu let leh fo thin kha.

Zat let dang han dawnin e,
Eng ka va chian thei si lo!
A ni lo thumawl leh ho,
Tha tur kamkeu tal awm se.

Zan tairek thlenga men pui,
Chharchhuah tlak rohlu a nih;
Ka ring, a na a mi vilh,
Eng 'ang' si lo dawn a thui.

-sangtea signature@6.12.2013

TAWNMANGA MI LENPUITU KA ZUAPA

Daifém Val Renthlei
TAWNMANGA MI LENPUITU KA ZUAPA

Zalin chhinga tawnmang ram ka fana'n,
Chatuan siang ang lawi kei ka zuapa'n;
Phek keu loh tial turin thu mi hlan.

Hei e maw thlafam a chan-ni chiah chu,
Chatuan nun ngai rih lo a nihna;
He leia 'chinlai' a thlakhlelh thu.

Tu pawi zawng sawi si lo pawng 'rawt' vangin,
A hraileng zawngte leh chun nunnem;
Thlah theihna khawp hial hliam a tuar si.

Chu vange lei damna run sang a kai,
Tawrhchhuah rual loh hliam tuar si chu e;
Damna reng thlen si lo beidawngin.

Run tlung zawk beiseia pan mai loh zawng,
Tih theih dang reng kan nei lo tapin;
A uih zawn ang vut ui lai kan pawm.

Lirthei chiaunghian a'n zala mutin e,
Kan vai liam tawnni herchhuak leh a'n;
Chu zawng hringmi duhaisam mai maw!?

A chiau nghian nghian khawtin daitin pelin,
A thum ri vung vung a zawi si e;
Dam lo fam lu chu a awi ta si!

A ni, tawnmanga mi hrilh chu hei ngei,
Hringmi vanglai kut-hnu tuar hliam kha;
Zalin maw a piankhua a luh tak!

'Bawiha, ka rau a phang ngei asin aw,
Ka chunnunnemi'n min kaihna chu;
Ka lut dawn si maw zal-lu zawngin!'

'Ka tawng ngam lo chhinzai rela phangin,
Ka rauin a zui muangchang fãnin;
Siksawi run lum changta ka lawi si!'

'Hmanah chuan e hlimte'n dama thlengin,
Min chhawn thin anni paw'n rualchhingin;
Khai bawk-lèng thlengin chuh ka nih kha!'

Hril leh mawiin chakna reng a nei lo,
Rau lung a puam chhingmittui a luang!
Mi kian san ta, hrilh reng a hai ngei!

Zal lai tawnmang ata thoa harhin,
Ka chhui let kei ka zuapa lungliam;
Tuar a har chuang chhingmittui a far!

-sangtea signature@4.12.2013

(Nizan (4.dec.'13) khan ka mumang lamah ka pain he hla hi min rawn pe a. Hlarua ka la hriat ngai loh leh ka ngaihtuah phak ngai loh chu min kawhhmuhin a thih hlimchhawn vela a thlarauin, a seilenna in ruanga a luh tur a hreawm a tih thu mittui tla chungin min rawn hrilh a ni.)

HRINGNUN CHHIARTHIAM MITE

Daifém Val Renthlei
HRINGNUN CHHIARTHIAM MITE
(Haiku Form)

A milengte'n e,
An hril leh e thu thlum chu;
Lawm an vai si lo.

An lenrual tawna'n,
An vawr leh ta hlimna chu;
Lenrual kim thin si.

Chhailai Di tawna'n,
An hlan leh e biahthu chu,
Tu an ngai si lo.

Hawihkawm lenrualte'n,
An nawn leh ta ngaih thu chu,
Panchan an ngam si.

-sangtea signature@6.12.2013

PATHIAN ZARA BELH TLAK NI THEI TURIN

Daifém Val Renthlei
PATHIAN ZARA BELH TLAK NI THEI TURIN

A saw hmar tlanga chinlai lengte,
Lungduh a thlum a al ka kil pui;
Kar hla ka cham san tak zawngte,
Veng zel che u e Chung Khuanu'n?

Ka dawna'n in cham reng thin asin,
Tawngtai hla ka chhama'n in bang lo;
Tawn-ni hlimte'n kan len theih nan,
Ka dil Chung Khuanu hualhim zel.

Pheichheh in mawi zel theih nan tiin,
Theih ve tawk ka chhuah hna lam umin;
Tunah chhuanchham dawn dawn mah i,
Chan tawk 'awi thiamin hma ka thlir.

Si zangkhua bungbu thin thlir chungin,
Thing delh loh lung delh loh ka nih chhung;
Chakna Petu zara'n chhelin,
Ka bawh ve lawm thin beiseiin.

'Lungphang s'u aw', tia hnem che u,
Tunah hril bak eng ka nei si lo;
Kumsul veiin ka chiang vala'n,
Theih puitlin heng suangtuahnate.

Khawnge dam han hauh zel phawt ila,
Chung duhaisam thlen thei Chung Pathian;
Thlen hlawh erawh dawng tlak siin,
Rinawmna vawngin thawk zel ng'e.

-sangtea signature@7.12.2013