Kumsul veiin sikni kawla'n a thar,

Zira Chhakchhuak Hualngo
(Naupang 'recitation' tura ka duan, a thupui mi'n dahsak teh u'n!)

Kumsul veiin sikni kawla'n a thar,
Lung tileng romei zam leh tlangsam par
Chhawn an thle e zozam saron chuialo,
Khel lovin Lal pian hun cham an hril fo,

Hringfaleng nghahfak hunpui kan vauchher,
Bethlehem zunzamin tangah a kher;
Naufa leng rual hlim rel rawl a chiar nghian,
Hlimna tuihnuk a nung mitin tan hian.

Aw, chun leh zua, lenrual lungduhte u,
Hlimna tlhlifim chhimin hlim ang che u;
Mahse, kan tan riang taka piang a khan,
Tlawmna thuam silhin malsawmna min hlan.

Kan tan tlawm huam chawimawi nan tlawm ila,
Kan tan damna a niang a thihna kha.