KUMPUI SUL

Sangsangi Pa
KUMPUI SUL

Sikpui khua vawt a lo her leh ang a,
Tlaikhua var huama kan lum dun hnu senmei kha,
Lumtu tawng loin rial ang a dai ang maw?

Thalkhua turni a lo her leh ang a,
Kan thliah dun hnu parthing kha lo vul lehin,
Tawntu tawng loin parlai an rel ang maw?

Tomir turni a lo hrang leh ang a,
Kan belh dun hnu zarthing zar hliap kha,
Beltu tawng loin a vai ang maw?

Khua hnawm furkhua a lo her leh ang a,
Nui hiaua kan do dun hnu khuangruahpui kha,
Nang tel loin luaithlipui nen ka do leh ang maw?

Vangpui lenkawl mawi a lo eng leh ang a,
Chan lai rairah chan hi chang lehin,
Sul hlui chhuiin Zophul hring mawi mah te'n ka hrut leh ang maw?

Kumpui sula hun hian a bi hi vawng zelin,
Nang ngaih ka tah khua tisei thar zel tur a'n,
Liam hnu nang nena kan nun a rawn hril thar zel ang maw?