HMANGAIHTU LEH HMANGAIH.

K Rohmingliana Valpuia
HMANGAIHTU LEH HMANGAIH.
(phuah ni 25.8.'13)

Hmangaih tana hahdamna lui chu,
Hmangaihtu thinlungah chuan a luang a,
Hmangaih leh hmangaihtu lawmna kimah chuan,
A ni, lelthang iang zaiin an äwi thin.

Chu tlang thianghlimah chuan natna a awm tawh lo va,
Dikna leh rinawmna lal tiangin ro a rel thin a.
Inngaihsakna puan nêm sin dunin,
'Lunglenna sirah an hnawl' an ti asin!

Khawharna chu inhmelhriat tir an duh lo va,
Nun thlaler ramro paw'n a hnaih ngam hek lo.
Duh taka khunu'n sam a suih te an ni a.
Hlimna thing daihlim hnuaiah nun an chhai thin.

An khawvel tan chuan leilung hi a nung sar a,
An tan zantiang a thim ve ngai reng reng lo.
Hmangaihna dik chuan chawlhna a pe a,
Chu chawlhnaah chuan hlimna thu ruk an chhar thin.

Vanduaina kara vanneihna fang khat chauh pawh,
Zawng chhuakin mal an insawm tawn a,
Hmangaihna chuan engkim an sual a,
A ni, intanpui tawnin an sual chhuak thin.

Rinawm turin an intiam ngai lo va,
Tiam chawp rinawmna aia hlu hmangaihna dik nen,
Ri chhuaklo thinlung rimawi chu tum dunin,
Chutah chuan tiam sa rinawmna a awm tih an hre si a!

Rinhlelhna thlipui ten a nuai ve ngailo va,
Thinlung hmunkhat an put tlat avangin,
Thlipui pawh thlifimah an chan tir thin a.
Chu chu a ni, hmangaihtu leh hmangaihte thawnthu chu!