PUINI RUN A LAWI...!!

Zira Chhakchhuak Hualngo
(Kan group member un leh hlun, nu ngainatawm Pi Ma-i Fanai pualin le...)

PUINI RUN A LAWI...!!

Kawla awmlai chu lo hrangin,

Ka bungdawntuai banah a kai;
Kei, a chun tel loin ka hrai,
Ka tiam mawlh lo, fam chang turin

Puitu ngaia a au lai khan,
Lalpa, khaw'nge ilo awm le?
Chhantu nei loin maw, hraite,
Thihna khartung mi lo sawn san?

I thiante kha ilo thlir em?
Nang ngaiin tah hla an chham kha
I chunnu'n hnem ka rel thiam nem
Tho la, rawn hnem ta che, Mama.

I chunnu hi mi han thlir teh,
Nang ngai rengin ka nul luaithli
Ka khal kham ne'm i sulhnu hi,
Riangte'n ka nghak e kan run reh.

I sulhnu zawngte hi tharthar,
Tah na'n phunbungpui a chang ta
Nui hiau i panlai hunte kha,
Ka chhui kir thin a sin tharthar.

Theih ni se fam tumkawng zawhin
Ka hrai riang sul ka zui tur a;
Chun tel lo-a thlei ngai lo kha,
Duhten ka kuah na'ng hmangaihin

Kan tan hringnun a rawng bik nge,
Hrinhniang hrai chawi ka chan tak hi
Lungmawl tuara'n a na a ni,
Hnemtu Lalpa ka dil a che.

Kum sul buh lu chuh hun thleng se
Mi hraiten sawmfang an lawr ang
Hlimin thawh rah chu an seng ang
I chunnu'n hrilh ka hai awm e!

Chutin kum sul a vei leh ang a,
Hlim kim taka chawnban vuanin;
An hrai an lawm ang mi chunin,
Engtin awm ve maw i chun kha!

Lalpa, ka enchim loh te kha,
I ang chhungah lo kuangkuah la,
Nakin' min la hruai ve hunah,
Ka tawng leh ang i ram nuamah.