Hringchan piallei i mawi lai khan,

Zirtei Mangpa
(Kan thian, min duhsaka min lainat thintu Ma-i Fanai, nu nih tling, a fate a hmangaih bik emaw tih tur khawpa ngaihsak em em reng thinin a fapa duat, 'ka naute' ti ngata a koh thin a chan ta mai hi na a va ti dawn em! Naupang hawihhawm leh fel tak a ni a, ka ui ve takzet. Thiam lo hle mah ila heti hian ka thlah ve teh ang)

Hringchan piallei i mawi lai khan,
I chun leh zua lunglawm tikim thinin,
I sakruang leh kimtlang mawi nen,
I nunze mawi leh sakhmel mawi khan,
I lenrual zawngte min tihlim thin,
I vullai ni a tawi lua e.

Theih chang se thihna nunrawng hi,
Dan theih ni teh mial se thihna kut hi,
Doral anga beih theih ni teh hlauh se,
Kan huam asin i hmaa din,
Kan theih tawk tal kan thawh ve tur.

Thlei bik nei lo thihna nunrawng,
Dan zawh rual loh thihna kut chuan,
Par mawi vul tir a thliak ta a,
Chun leh zua leh unau rual duh zawng pawh,
Kan tliak asin i liam ni hian, 

Mahse, Tharthar, i va mawi em!
I vul lai ni rei lo mah se,
I nun mawi leh sakhmel mawi kha, 
A chul dawn lo kan thinlunga'n,
Chatuan atan i vul dawn si!