HMANGAIHNA HI

Khiangte LR Lra

HMANGAIHNA HI

Mi tinrengte zawn leh mamawh,
A tello chuan hringnun hian awmzia a nei lo va,
Lungrual leh hlim tlang taka min siamtu,
Khawngaihna leh lainatna te min neih tir-tu,
I sakhming mawi hi kan sawi bang thei lo,
I chanchin lah ziah zawh sen rual a ni lo va,
Nitin a thar a, a tharin kan dawng leh zel thin,
Puan anga chul ni reng i nei ve ngai lo a,
Nitinin a thar thin chuai ni i nei ve dawn si lo.

Hmangaihna chu a a tem tawhte tan chuan a hlu a,
Bul a nei lova leh tawp chin reng a nei bawk lo,
Hausa leh rethei a thliar ve chuang lo va,
Harsatna leh bawrhsawmna te’n a ti buai ve ngai lo,
Buaina leh thihna pawhin a ngam hek lo,
Chhim leh Hmar, Chhak leh Thlang hian a thenhrang lo va,
Mi dum leh ngo, mi eng leh var te'n awmzia a nei chuang lo,
Mi lian leh mi te, piangsual te pawh a thlahthlam ngai si lo,
Engkima kan engkim a lo ni hmangaihna hi zawng !

Tui tam takin a ti dai thei lo hmangaihna hi zawng !