ZAI BAN KA BANG LO'NG...

Zira Chhakchhuak Hualngo
ZAI BAN KA BANG LO'NG...

Leng-hlei-hluanpa len luat vangin,
Tlang rel leh sel phur mah i e;
Zai ban lai ka bang chuang lo'ng e,
Zai zel na'ng fam run lawi thlengin

Len luata fam mah an chan chuan,
Zam zel ing e len-hla mawi hluan.

Tlawm mak' Vanzem a fam an ti,
Len luat kan hril ve a nih hi.

VAWIIN TLAIAH KAN IN KIANGA

Angu Angu Pi

per
VAWIIN TLAIAH KAN IN KIANGA BUNGAH THERENG KHAWRO KA HMU A......

Fur khawthiang chungtura ni thlang tlai zamual herin lenkawl a sen riai e.
Van zawl mawiin lung muangten murvate chair nghiane.
Virthli si lo maw ri vung e chum leh chi hruaiin kualin.
Riakmawiang zantiang laikhum ka zalna siang rawna phunbungpui,
Thalfavang ni khua thawta Leltepan baw ar chhingmit tet zai a tuah na;
Kawlngo mo thar lam sul chhawmang a ri hluap hlaup e.
Di vel bu leng khai pel Lalduailopa’n lam sulah ka pelh ni chuan.
Leltepa’n zai hla a vawr lo sakruang tian e damte’n,
Chhunrawl cha lo a laisen sakruang zalna phunbungpuiah.
Ka chawi nangche Lalduailopa’n sakmhingah Fam Leltepa zai tuah thiama.
Di ka chhai nun hnutiang mual liam hnu ka thlir changin,
Fam Leltepa hnehin lung reng a awi lo khua tuah ka hringnun chheu hi.
Ka nuam thin e damlai ma a Chalkhaw dai mual mawia chhamang zal hi.
A lem lo fam chan hnu phunlung thianga zuapan a tar tur chu,
Lenlai thlafam lusun di tianlo ka hrai buang Lalduailopa.

Perhkhuang nen kan rawn fang l

Rl Zomawia

Perhkhuang nen kan rawn fang leh i zalna hmun tual,
Biahthu kamkhat te mah min hlan lo'ng maw!
Zai kan vawr e, i thlan hmun tualah,
Hrilh zawng a hai ngei e, val rual leng USI.

"Mangtha, mangtha, mangtha, mangtha,
Piallei thuah riatah zal la:
Kei a riang chu i thlan hmun tualah,
Zai kan vawr e, damte'n" ti in.

D'd'

Pa Marema Thaibawih

D'd'

Kâi ka nuam i lâwina rûn sang lii liai,
Min lo hawi ang che maw khârtung sâwn dîm ila;
In dawhtling leh laichhuat a zâu lai mawiin,
Thutin dî kan tiam rem tak ang maw, O Parte?!

Ngaih lunglèn a nêm diai hi engtin tuar bîk che maw?! 
Tinkim dâwn chu chhîng bîk hian ka ring lo che, D'd'!

Dawn ti sei lengdawntawii

Faka Tlangte

Dawn ti sei lengdawntawii pawnfen pawh kha ala ngai reng e..
A bawp khawkherh khan a zahmawh pianhmang lang tur a khuhbo hram2 a..
A mawngtam erawh khuavang awm chuk nen a lang reng mai si..
I nunzia i ka in a thup a,
i incheina in min hrilh thung..
I chun nun a zilh hun che ka nghak reng a
Mhs i buan hnehlohteah i intawng fing chawp zawk dawn anih hmel..
Val dawn i ti sei lua i kimtlangin anchhia a thlen zo che!

Lotus!!

Lalthuamkima Khawlhring

Lotus!!

Lawmna chu pangpar a ni.

A par mawi chuan mit ah,

Thinlung ah, hnar tan a rim,

A chawih tawk te in lei chungah;

Hringnun khaikhawm mawi tu,

Luitui tawp lai ber leh tenawm;

Khuh a, tum mawi tu par

Lotus tiin sakhming mawi ka vuah nang che.

Mitthlaah i thla ka tawng tawnmang iang,

Hruaia Vandiau Tlanglau

>Mitthlaah i thla ka tawng tawnmang iang,

>Di dum, dâwi ang dîm min dawm dân;

>Rairah rún reh riangah Rairah ka riang,

>Lâm ang lo lët leh la, léng lung lâwm nán.

. . Rhyme.

(19052013 -VH)

Ka awm khawhar rauthla,

Mafela Lyno

Ka awm khawhar rauthla,
Chung Mu iangin aleng e hringlang tlangah;
Tah chuan alang e hringnun,tahna leh chhing mittui inkar chu,
Ami lengtinte'n hlimnaa hnawhkhah tumin,
Amte'n hreawm tuar zai kan rel a,
Chelhdin theih hlimna kan hmu silo..
Nau ang nuih kan duh laiin,lungngaih chhum alo zing a,
Lei,pialrala chantir tumin tuan kan rel a,
Chawlhna daihlim reng a awm si lo!
Thawhsa ring,nuamtin tlante paw'n,
An tlan thui poh leh hlimna hlatin an inhre si!
Hlimna thawh chhuah tumte'n laikhum an ngai a,
Tho theilo kumtluanga chham ang zalte tan,
Laikhum thlehnem pawh lung hmun a chang zo si!!
Suma lei theih hlimna kumhlun awm se aw,
Ami zawnga riang ber kei ve pawh hian,
Hmai thinghawng vuahin bat zai ka rel mai tur..
Khisa ianga a tlaw chhar tur tal awm se'ng;
Kawl nichhuak chhiara fan ka nuam ang,tukloh ram,
Mahse,beiseina paw'n hmu hian ka ring silo;
Khawi nge hlimna tak chu?
Ka zawng ruai a,ka tawng lova khuavelah,
Tihian ka thinlungah mi hrlh a,
'Hlimna tak chu Lalpa lei leh van siamtu hnenah a awm' tiin;
Chu chu hriain Rengpui Davida'n,
'Keia tan erawh zawn Pathian hnaih hi a tha e' a tih ni.
Leiin ei tur chhuah lo se,
Vai Bawng leh Arte'n kan ram thleng lovin,
Lengpui Air Port bovin,Silchar kawng ping mahse'ng.
Habakuka tingtang hrui ri mil a,
Hlimzai kan vawr theih nan,
Hawh u,Lalpa hnenah i kal ang u.
Chutin,hreawm zawng zawng lawma tuarin,
Hringnun hlimna thuruk nena vuiliamin;
Chatuan pialral thleng pawhin,
Hlimin kan leng dawn zuk nia.

Biahthu antiam rinawmna nen,

Imanuel Cvl

Biahthu antiam rinawmna nen,
Run hmuna len an rel,
kumtluanga tan anti.
Fanau malsawm anchawi e.

biahthu kan tiam rinawmna nen,
run hmuna len kan rel,
kumtluang atan kan ti.
tahzai lunglen kan chawi e.

ZUNLENG NGAIHHRUIHNA MIN BÀN

R Lalchanchin Mawia
ZUNLENG NGAIHHRUIHNA MIN BÀN

Hmanah sumtuala lung ka rualpui thin.
An kim ta si lo vangkhaw
lêta fan leh niin.
Tawn loh nan lenna tlang dangin kar min dan.
Ka ngaithiamlo zûnleng ngaihhruihna min ban.

Aw suihlunglen a thar ngei tinkim dawnin.
Hlimten nau ang nui zain lenrual duhte nen.
Vangkhaw mawiin âmten kan chen hlim laini.
Tunah erawh in sul i hnu mahten ka chhui.

A her leh na e khuanu zarah tawn leh ni.
Fam bil lova dam hauh reng ta na chu.
Mahse, hlimlai ni rei lo hun tawi te.
Rin loh karin ral leh mai si e samang then nan.

Chelh rual lohvin her zel e aw hun leh ni.
Suihlungrual lungkim parlai vul za zawngte.
Lung ngui nghi nghiai chhawl ang uai nan e.
Herchhuak leh thin e luaithlinula inthen ni.

KA CHUN NUNNEM

Lng Siakeng
KA CHUN NUNNEM

Tlaikhua a ngui thin lai a
zing,
Zo chhum a kai chung
khua a hnim;
Turni a liam thlang tiang
kawl ah,
A liampui lo ka suihlung
len.
A zual zel si awmhar
lung len,
Lo sul an haw i tel ve
silo;
Khawnge i awm Ka chun
nun nem,
I tel lo chuan hringnun
reng hi.
Ka chhiar thiamlo ka ngai
em che,
I liam ta maw fam
vangkhua ah;
Hring lam hnutiang i
chhawn ta maw,
Min thlir ve lang
hringlang tlang ah.
I hrai leh zua ar ang vai
hi.
Mahse kir tiang rel lo
hian maw;
I thliak ta maw hawilo
par chu,
Lungloh tui dawn a
hawilo par tawn in,
Rih tlang mual i liam ta si
Ka chun nun nem ka ngai
em che

KA CHHUN MUMANG

Elti Muana
KA CHHUN MUMANG

Ka chun run hliap ka belh ve hlauin,
Tual char ni sen sa laiah min hnutchhiah a,
Thlipui leh ruahpui hnuaiah min sezawl chhuah a,

Tanpuitu dapa ka phar chhuah phal loin
Min hnungkhirhna hrui chu suih takin an suih a
Ka laizawnte'n min hransan a
Ka nutate'n min tuithlar a

Kei hi sual hlawma piang ka ni mai lo a
Kei min tanpui pawh hi thihna khawp hiala sual lian a ni asin

Ka nu chuan ngawi rengin, tap chungin min thlir a
Chuti ang huna pawha ngawi thei ka nu chu,
'I hrai ka ni, ka hmangaih che ka nu' ka tan tih a har a
Ka ka an hnawhna hi phawrhin ti thei ta dawn mah ila
Keia awrawl ve em hi zawng,
Suara Tiau luipui luang riin a chhilh khah leh tho ngei ang

Ka bawhchhiatna chu hmuh kanin awm suh se la
Ka phu tawk hremna pawh dan chuan ka chungah lek mawlh rawh se
An chawbel ka zen ve an rem tih loh paw'n
In hrang pawh ka chang mai ta lawng

Ka nunkhua hi a fawngah vuanin
An duh lam hawi hawiin an chaih vir thei a ni mahna
Hei hi erawh an thlak danglam thei ngai lo ang -
Kei hi ka chunnu chawi hraileng ka ni!

D...

Elti Muana
D...

Dai ang min dantu lenna tlang leh tuanna mual a dang,
Dar ang chhaia hlim te'n len dun hun hi a rei zo lo;
Duhlai tang bela len lai hun hlu 'hun lothlawn' chantir tur chuan,
Di, nau ang nuarin chhingmit luaithli zawng nul lul suh aw!

THINLUNG RETHEI...

Sangtea Blacksmith Chhangte
THINLUNG RETHEI...

Aw ka thinlung...
Tinge maw i hriat reng a,
Tinge maw i ngaihtuah reng le.
A thlauhthlak che a,
A phatsan che hi.

Aw ka mit...
Nang paw'n i hmuh vek kha,
Hmel tha ber a nih loh a,
Nalh ber pawh a nih loh a,
Zei ber pawh a nih loh kha.

Mahse aw ka thinlung..
Tinge ila nghah tlat a,
Tinge i beidawn theih loh;
Nangni ka hriatna te u,
Mi'n phatsan a ni.

KHAPDIAUA THU CHANG.

Lch Rokhum

KHAPDIAUA THU CHANG.

20/5/2013

A kualna chu kohhran phenah a ni a,

A vir velna erawh nangmah chauh i ni.

Khawiah nge Kohhran hrilhfiahna kha,

Isua meuh a inrawlh ka hlau mang e.

Phakar inpuang chuan tarlan thil a nei a

Hlawkna chauh um anihna a lang lawi si.

Thenawm dah bova sumdawnna kha,

Rulh chak an awm ang tih ka hlau mang e.

A ri hian danglamna a siam lo fo a,

A ropuina sawi tham a lang lo em ni!.

Khawiah nge in laihchhuah thinna kha,

Bumna rangvachak maw i at pui le.

Nuihna ve ngawt hian thinrim a hliah lo a,

Lemchan i thiamna erawh a lang a ni.

Thiam tawk te pawh a chhawrnaawm kha,

I khawl vang bawk chuan maw ngai kan awh le.

Midangte tuarnaah hmingthat tum lo la,

Uan chi anih lohzia chu rapthlak a ni.

Thiltha ti ah inngai mawlh lo la,

Tuan a thleng tur i hmaih ka hlau mang e.

Vehbur ka khawn ngai lo min lo hrethiam la

Ka uang ve ngai lo, ka chan thin zawk a ni.

Rapthlak taka lar i tumna kha,

Kei chuan ka dem zel che, ka ngai mawh e.

Min melh khum a, ka hre reng a,

Boruak a zam, hunin a hnawhtawng hi;

A tihtirtu che ka hre chak ve mang e.

KHAWVAR HMAIN

David Lallawmawma

KHAWVAR HMAIN

Khawvar hmain,
Rinawm takin;
Hnathawk la,
Hah chawl ang che.

Sualsimin,
Thingthi la;
Tawngtai la,
A ngaithla ang che.

I duhzawng ti la,
Rinawmna nen;
Taima takin,
I nihlawh ang.

I hmangaih chu kuah la,
Dawt hrilh lo la;
Thudikin tuam la,
Damchhung a daih a ni.

Khawvar hunah,
I hringnun thawnthu keu a ni ang a;
Kawngkhar mawiah,
A lo hmuak ang che.

HMANGAIH ESTHER.

Fam zun leng ngaih, aw ka tuar zo lo;
Min hnem lang aw ariang hi.
Suihlung phang in ka tap ruai e.

I ngai reng hian tleini a awm si lo,
Tawnmang mawlah chauh hian maw,
I rauthla hlimten ka tawn ni.

Zingtian hai ang thang chuan maw,
Hmuh rual loh in i liam leh si.
Ka ngai zualche chhawrthla en chang hian.

Min dawn tur reng I awm tawh silo,
Nauang nuih ni a tawi lua e.
Minlo nghak langPialral an.

In tawn leh ni a her mahna... 
Ka ngai a che, HMANGAIH ESTHER.

Rikuo Kurusaki
Arr. Lch Rokhum

KHAWVEL MAWI.

Valpuia Fapa Duat
KHAWVEL MAWI.

Khawvel mawi hi hla mawi hlàn ula,
A pianken chawiin zai hla sa rawh u.
Lei mawina par fung hai chhuakin,
Hla mawiin awì ang aw, khawvel mawi hi.

Thlangtiang thlifim leh khuarel mawina,
Tukloh ram daì thawm rimawi nen.
Zun ngai Lelthlang aw mawi zawmin,
Hla mawiin awì ang aw, khawvel mawi hi.

Mawina thlir a hringnun kan chhaì lai hian,
Suangtuahna thla zarin thlawk vel ila,
Lentu thinghlm hnuaia chawlin maw.
Khawvel mawi hi hla mawi i hlàn dun ang.

NI TLAK DAWNIN

David Lallawmawma
NI TLAK DAWNIN

Ni tlak dawnin mi hmangaih la,
Khuangruahpui sur mah se,
Ka thinlungah cheng ang che.

Thal va ekchar lo thleng mah se,
Nang ka kiangah awm la,
Ni tlak dawnin mi kuah ang che.

Dam mawh hritlang lo thlengin,
Taksa chak loin khumbetin damlo mah ila,
Ni tlak dawnin ka kiangah awm ang che.

Taksa thiin, lei thuahthipah zalh a nih pawhin,
Luaithli nulin thinglung keh mah se,
Ni tlak dawnin mi hmangaih ang che.

Vana kan intawn theih nan,
Kan tan Khuanu hnenah ka tawngtai ang a,
Ni tlak dawnin ka lam lo hawi ang che.

NANG CHU I VANNEI BÎK A SIN!

Pa Marema Thaibawih

NANG CHU I VANNEI BÎK A SIN!

Theihna leh engmah neih nei ve loin,

Theihtâwk tal pawh sawi tur hre lo mah ila; 

I mangan ni a lo thlen chânga i lungngaih lai te,

Harsatna i tawh hun a lo thlen palh châng a awm chuan,

Sawi chhan tur beitham tê pawh hmachhuan nei ve lo mah ila,

I tân tih theih leh i tân ṭangkaina nei ve mial ila ka ti ṭhin ngawt a sin!

Kei ka tlin leh theihtâwk tlêm hle mah se ka hlân ve n'ang che,

Thinlung chhûngril atanga duhsakna lo luang chhuak chu;

A tam lam bithliahin mi'n bûksak dâwn hauh si lo a!

Mahse kei chuan engmah ka neih miah loh laiin,

Mi tâ ni lo i ta ngei 'chêng za' tal i paipâwn a, 

Ka thian, nang chu i vannei bîk a sin!

Note : Poetry 'hmawlh zum form' a nih hmel hle mai!

VALLUNGLENGA KA NI -

Lalrammawia Chhakchhuak

VALLUNGLENGA KA NI -
( Acrostic verse cum Sonnet )

V-Vangkhua êntu chhawrthla vanzawl lo kai,
A-A riang kei zawng suihlung min len ngei e;
L-Lalngo i ngai suihlung leng in ka zai,
L-Laikhum belh zai reng rêl lo hian in e;
U-Uaihniang in maw i tawna'n ka lo uai,
NG-NGaih lunrûn thinlai luahtu nang nen;
L-Lamtluang chhui dun ila a saw phei duai,
E-Engruai làwmin i tum lo'ng aw ban rêl;
NG-NGîr dûn ila'ng vangkhua hulùm sira'n,
Â-Ânnêm hmangaih biahthu chu hril dun in;
K-Khiangawi min tiam teh la kei ka tawna'n,
A-A thiang te a damlai hmangdun tur in;

N-Nau ang tahlai ban zai ka rel ang a,
I-I ngai suihlung len pawh a nêm mahna. . 

(Rhyme - abab cdcd efef gg)
190520132350

KA DAWN NGAM LO KAN RAM HI

R Lalchanchin Mawia
KA DAWN NGAM LO KAN RAM HI

Chawlkái ningzu tui mah dâwn si lovin.
Kan ram leh kan hnam hmakhua ka dâwn.
Penhleh tumkawng zawhin a kalher liai liai 
Ka dawn thui ngam lo thlunglu a hai chiai chiai.

Pipu chena hmasawnna than tithutu hmasialna.
Roreltute rorel hleih nei taka hleilênna.
Mahni sahmim tihpuar tum duhamna tha lo.
Ram thanmawhbâwk rorelna rualkhai lo.

A rel sual em ni khaw nge ram roreltu dik.
A kal sual em ni khawnge zawh tur tumkawng dik.
A thei leh chak apiangin rorelna laltiang lekin.
Kan sapa tal ta maw a ruhno no chhuakah tiin.

Hun leh ni hril chhiatna ai zualko thuchah.
Ram leh hnam inrelbawl rorelna felhlel.
A thena nisa a thena ruahsur inthlei bikna.
A hrang lua e Lalpa zawn chhuah ram Zoramah.

Phun leh chiar a tam ngei duhkhawp zo lovin.
Sawi leh sel a tam ngei mittlung zo lovin.
Ân hun lovah kâ ânga tawng zuah zuahin.
Ngawih hun lovah ngawi leh duk si e roreltu.

Thawk r'u ram leh hnam mamawh phuhru turin.
Tho r'u dik taka rorelna laltiang vilik turin.
A hun taka hmel pholang ngam lova biruin.
An bibo zo ta em ni rorelna fawng chelhtute. 

Rorel khawl chu bun ve na e ram riang ruangah.
Hluihlawn khawlhlui dahtawl mai mai iangin.
Ramin chhawrbâwkna nei lo mahse a hun takah.
Thehthang zai rel chuang i maw ram mipuiin.

MIN CHHAN RU

Bda GM Pachuau Kop

Ka thual tha hman tlat lo.

MIN CHHAN RU 

An leng siau siau e

Lanu chhuihthangval rual

Thangkhawk rum rum e

Rawlthar mangang awrawl chu

A thim mup mup e

Hringnun lamlian a daithiam lo

A pai tuang tuang e

A nun chawnban vuantu awm lo 

A au ruai ruai e

Hmangaiha chhantu tur

A zawng char char e

Damten kuangkuahtu tur

An thu veng veng e

Lenrual kut a kawm tlat

Mileng tho thuai thuai e

An tan khua a tlai hma ngei

MUAH...

Zira Chhakchhuak Hualngo
MUAH...

Hliampui bakah riam zui,
Deuhsawhna tinreng nen;
Ka chan a tan mi hlui,
Ka pawm vek e lawmte'n.

Hlimna'n a bosal che tikah,
I tan hmun a awm a ngaiah!

DARK, HARK THE LIGHT

Zira Chhakchhuak Hualngo
DARK, HARK THE LIGHT

Hringnun hriamin mi hliam fo a,
Beidawn parthi mi hlan;
Hmuingilnain mi hran san a,
Duhaisamte'n mi tian.

Sasaw hmuna hai mal ding iang,
Pan tur vaiin ka van;
Thlan sa dawmtu zote tui thiang,
An kang zo ta ka tan.

Beidawnnain mi kaikunin,
Chhiahbawih' mi siam mah se;
Khua hnawn furpui sur ban hunin,
Thal khua thiang na ngai e.

KA ROSE

Khiangte LR Lra

KA ROSE

Ka rose,

Ka hmangaih em em;

Enchimloh ka duat ngawih ngawih,

Kumtluang rinawmna kan tiam kha;

Rial tui angin aluang ral zo ta.

Ka rose,

Ka tan chuan lo chuai tawh pawh ni la e;

Nang ka hmangaih em vang che hian,

Chatuan thleng pawhin ka hmangaihna che hi,

A chuai ve dawn si lo. 

KA ROSE.......KA HMANGAIH CHE A SIN.

KA LUNG MI LEN E!

Lalthuamkima Khawlhring

KA LUNG MI LEN E!

Ka ngai em che tih hian

Kawlvalenchham thleng mah suh se!

Dar zam chuan a hual ve chiam e.

Lengna tlang ka D thinlai,

Rinawmna, aw, rinawmna,

Ka thupui ber ni zel se.

Chuailopar thliah ka nuam;

Kumtluang par tluk zetin!

Mualza tam thlen, lungruk a ka D te khan,

Engtinge ngai ve ang maw!

Thaikawibawngte thleng tak ang i maw!

Beisei ram reh, i riah run, zanna, thlehnem puan nen-

Zawng zawng tihin liang chen suh se.

A za vai tih tak ka nap e.

Ka tuar van kuangruahtui far leh 

Suihlunglen, chhawl hal-

Sawi remsan biathu zawng ten;

Kei ka lung mi len e!

DAMLAI RETHEIH KA TAN HLIMNA

Khiangte LR Lra
DAMLAI RETHEIH KA TAN HLIMNA

Ka chun nunnem mi tir-lui lo la,
Thlangkhuandima mual liam mai chu;
Ka zuam lo kei ka zuam lul lo ve,
Kei ka lungdi valmawia then ai chuan;
Famdairial chan mai zawk pawh ka thlang e. 

Zal mahila,
Ka chhing lo zanmu,
Ei mahila,
A puar lo pum,
Nui mahila,
A tap si lairil,
Hnem thin mahse,
A dam chuang lo thinlai,

Ka zuapa kei mi tir lui lo hram la,
Lungsi lo taka lianchhunga runrem ai chuan,
Ka lunglai di hmangaih tawng lova len ai chuan, 
An sawi harsatna tinreng leh hreawm chu,
Ka thlang zawk e damlai retheih ka tan hlima chu.

ZO HNAHTHLAK ( LANU ?) NGEI ANIA..

Mafela Lyno

ZO HNAHTHLAK ( LANU ?) NGEI ANIA..

A Riang Chhingmitin tawng e ,Sakhmeltha duhaisam khumi,

A sakhmel rangkatui luan ianga mawi chu;

Thlang Sappui leh kawrvai leng zingah pawh chhing zo awm hian ka ring nem maw,

A tawnah parmawi tinreng, thliah hnu chhawl ang chul zo ve,

Chung chhawrhthla leh siarte khi a zara enna hmu a mawi an ni si;

Tihian biahzai hlan na'nge,

Pu Rokunga 'Lei mawina' em i nih le?

A riang Vala cho rualloh leng mah nila e,

Lairil khur chung hian zawt nang che,

Pawmlai leng nge i nih Thainu leng?

Duhaisam e,a Riangte hian,

Chung Murvate ianga thlawk lai ni la,

Aw,lo dawng teh la,ka lungril hmangaihna saihlum;

Lei hreawm hi van pialral a chang hian ka ring e,i kiangah chuan,

Chutin, hreawm zawng2 lawmin ka tuar ngei ang.

KA NUTHAI TAN

Mafaa Hauhnar

Hei le thil hlui, ka lehkhabu kara lehkha themah ka ching chhuak nawlh mai, nuih tiza-ah tal:

KA NUTHAI TAN

(1997 - acrostic verse)

Mariaka lunglen ka chhiar ni hian,

A khi chhak kawlrawn turni ang khian,

Mamawii a her chhuak e, Zawlkhaw per puiah,

Awmhar Val suihlung ka vaihna tur rengah.

In lo nghak ang che,” tiin biahnem min hlan a,

I zunleng zam velin tûr tui ang min fan a,

Kan run rii riai ṭhal tui ang nghah a ṭul nia maw,

Awmlai lunglian hranna run ram a iang ngei e aw!

Lo kirin khua tlai hmain lo haw thuai la,

Nui hiauvin runah buan ang inpawm dun ila,

I ngaia Valnema ka ṭah a bang mai tur nia.

KEI CHU

Pa Marema Thaibawih
KEI CHU

I mi hriat angin angin KEI CHU

"Single Teacher kutchhuak, 
Sikul kai ipte tret hni hnê ak chhuak, 
Lunglehkha hmanga A AW B zir chhuak; 
Thluak thâwl leh thinlung ruak, 
Khawhar lunglênnain a vuak, 
Mitak satak lo leh suak!"

I tâwna lungmâwl satliah ve mai chauh ka ni!

A bak min zâwt zui mah la,
Sawi tur ka hre tawh miah la(h)!

TLAN R’U…THO R'U…DO R’U

Khiangte LR Lra
TLAN R’U…THO R'U…DO R’U…UM R’U…PUI R’U…LAWMPUI R’U…BEI R’U…

Tlan r’u, tlan r’u, tlan zel r’u,
Muan a hun love, din a hun tawh lo ve;
Nang lehkhal tumin an lo pung tual tual e,
Zoramin a mamawh che nang ngei hi;
Tlan rawh khai, tlan zel rawh i ram leh hnam tan.

Tho r’u, tho r’u tho thuai r’u,
I mut a i mut leh hlek chuan maw;
Sipai angin an rawn nang ching ang che’nga,
I ram hi mite ke hnuaiah rahbehin a awm mai ang;
Tho la, tho la, tho thuai la, thawk zel rawh.

Do r’u, do r’u, do zel r’u,
Beidawng lova do reng hi hnehna chu a ni;
Eiruk ,inruk, zepruk, tihruk, ngaihruk te,
Zu ruih, nuamtawl,hurna, pawngsualna te;
Do la, do zel la, do tlat rawh.

Um r’u, um r’u, um zel r’u,
Kan ram tichhe tu kan hmelma te hi;
Cancer, Aids, Drugs, vaihlo zial leh sahdah te,
Malaria those pai leh BPL chhungkua,
Um ang, um ang u, um bo vek teh ang u khai.

Pui r’u, pui r’u, puih ngai chu,
Lungngai, mangang, bawrhsawm leh damlo te;
Eitur leh sintur neilo mi rethei zawk te hi,
I hnenah kutdawha an lo kal chang nite hian,
Pui la, pui rawh, tanpui ngei thin rawh.

Lawm r’u, lawm r’u lawm teh u khai, 
Kan ramah finna, thiamna, a sang zual zel e;
Khawvel hmun tinah i hming mawi a thang vel e,
Zuangin harin tho r’u, kan Zoram hi a nuam ngei e;
Lawm r’u, lawm r’u, kut bengin lawm rawh u.

Bei r’u, bei r’u, bei zel r’u,
Bansan mai lovin bei reng mai la;
I hlawhtlin hma loh chuan bei la bei la bei nawn rawh,
Kan Zoram hi enge maw ti zawng talin maw,
Ti vul turin bei la, bei la, bei zel rawh.

I CHUN NU A AU

Machhani Jahau
I CHUN NU A AU

Chilna kephah vut thinthlak nan hian maw!
Ka lo chawi che hun kha leh chen duat ten,
Ka nghak thin thuam mawi thar silh hun tur chu!
I chang zo leh thin ka thuam tur zawng pawh.

Mawite’n min awi thu leh hla chuanin,
I mawi zolentu thingtin rihnim nen,
Zo-thlifim leh zobawm par zawng chawiin,
Lungdamte laitual lenna iang rengin.

Ka chan loh min hmangaihna aupuiin,
Mualtin tlangtin chuana tlangtlir thinin,
Ka hmel mawina Zonun zemawi i hnawl,
Sem sem dam dam eibil thi thi i hloh.

Mahni tanghma haina-a khat liamin,
Mawi leh mawi lo dawn lek lo reng hianin,
Lal i len ka thisen dawt chung zelin,
I dawt dak i chun ka chang mai dawn.

Nakinah lungchhirin awm mah la e,
I tlai si ang i chun chhan tur hianin,
Ka chakna ten mual an liam mai dawn,
Ka nghak che i kut dinglam phar hun,

Dikna thuam inbela ding ngam turin,
Huaisenna leh rinawmna taivawn chungin,
Lo ding chhuak la i chun chhan tur hianin,
Thuam mawi theih hun ka pelh hma ngei hian.

ZO

Khiangte LR Lra
<<<<....ZO......>>>>>

Zo nun mawi ,kan ze mawi,

Ka ze mawi, Zo-ze mawi,

Zo-ze mawi, kan ram mawi,

Ka ram mawi,, kan hming mawi,

Ka hming mawi, in hming mawi,

I hming mawi, an hming mawi,

A hming mawi, Zoram mawi,

Zoram mawi, Zo-fa mawi,

Zo-fa mawi, kan hnam mawi.

LUNGHLUI A FAM TA...!

Lalthuamkima Khawlhring

LUNGHLUI A FAM TA...!

Lung-duh ka tawng a,

Lunglai a phang thin;

Suihlung an len in

Lung hlui a fam ta...

Tawn hnu D hlui lah -

Hliam tum phelh tumin

Karah 'Damdawi' te nen

A lo lang ruau ruau a.

Kei zawng lungawina:

Tawn thar D tan ka hlan ta si;

Suihlung mu hnu tho lo la.

Tawn thar D nemrang puan zawn dun zel

ang.

Khawvel ram zau, thangva sang che in;

Hmangaih biathu infah tawn zelin

Leng ang, tumah dawn lo ten!

Rinawmna leh chuai lo par ka thliah nang che!

NUN A NI

Pa Marema Thaibawih
NUN A NI

Zân pawh a lo rei leh ta a ni ange, 
An sawi reh-rî paw'n thâwm dimtêin; 
Aw-râwl a rawn chhuah ve leh ta. 

Mahse kei chuan ka vawng reng ang,
Hei hi:

"ZONUNMAWI hi nunphung a ni a, 
'Dân' a ni lo; 
A zawma zawm tur a ni lo a, 
'Nun' a ni,"

tih mai tê hi!

VANGLAI CHÊN LOVA

Tea Renthlei Tianghawl
VANGLAI CHÊN LOVA

Vanglai chên lova ka vanglai hian,
Kumsul engzah nge vei tawh ka hre lo.

Vanglai chên lova ka hlimna hian,
Turni engzah nge a thlah tawh ka hre lo.

Vanglai chên lova ka lawmna hian,
Vawiin engzah nge a vailiam tawh ka hre lo.

Vanglai chên lova ka nuihna hian,
Vawiin engzah nge a thlah liam tawh ka chhut lo,

Vanglai chên lova ka lungawina hian,
Kumsul engzah nge a thlah liam tawh ka hre lo

Vanglai chên lova ka nunhlui hian,
Tum engzah nge kawlkil a hrut ka hre lo.

Vanglai chên lova ka lunglen hian,
Chhawrthla pâr engzah nge a thliah tawh ka hre lo.

Vanglai chên lova ka natna hian,
Zan engzah nge a tlaivar tawh ka hre lo.

Vanglai chên lova ka mittui hian,
Hâwktui engzah nge a fin nut tawh ka hre lo.

Vanglai chên lova ka lungngaihna hian,
Muttui engzah nge a hrinchhuah ka hre lo.

BEISEI BO

Pa Marema Thaibawih
BEISEI BO

Ka lo kal asin,
Ka rawn zawng che;
Zawn hmuh rual loh chu,
Beidawng chunga beiseina chu!
A rem lo’m ni kan thliah dun hi? 
Nghilhlohna pâr tal chu!
Mahse ka lo zawng,
Beisei bo chu!

:'( — at Ngaihlungdum Poetry Institutes.

Zawlkhawpui a zim

Tza Chongthu

Zawlkhawpui a zim lua em ni lenlai chen val tan..
Chung khawpui ri ianga rum vung vungin, 
Lampui tin an zawh lenlai an chen,
Hlim zai an vawr tu dang an ngai lo ve.
Riakmaw ianga lunglam vai kei ka tan hian..
Hlim ni kawl lo eng chhuak ve tak ang maw..

AZINGRIAI E

Lng Siakeng
AZINGRIAI E

A zing riai e ka thinlung
zo chhum ang hian,
A bawm chiai e kian ni
awm si lo;
An sawi tlang lunglen
zawk em ni,?
Aw virthli chhem kiang
rawh.

Engtin mah ten ka tuar
ang zan tlai lunglen,
A zual chuang bik em ni
ka tuar an;
Engtin tuar ve u maw D
ngaih lunglen hi,
Min hnem zo lo eng mah
reng hian.

An sawi fam Lalzoa ing
in,
Ka kiu rel rel dawn e zan
tlai ah;
Chung siar leh
chhawrthlapui pawn,
Min hnem chuang lo a
zual zel e.

Engah khuanu reng
pawh hian in,
A lo duan che khua
hmun loh D;
I ngai reng hian chhun ni
zan khua,
Ka hmang liam thin ka
ngai em che.

Theih chang ve se nang
nen hlim ten,
Khua hmun leng in a
thiang te in;
Len dun ka nûam buan
ang pawm a,
Hlim zai vawr a tlai khua
var in.

I dil ang aw chung khua
nu leng,
Nang nen run hmun kan
len ve nan;
Chu tin tu dang len dang
ngailo reng in,
Damchhung hun bi chhiar
dun zel in.

27.5.2013 10:15

For Ti

Masi Naupangsual Luhlul Chhakhhuak
For Ti

Vanneihna khua chu herin
Hringnun mawina tifamkim turin
Nang ka tawngche sakhmelmawi
Ka hmangaih che 

Leilung mawina chuaiin
Partin ten par chhuah thei tawhlo mahse
Ka hmangaihna che chu
Chuailo in a par vul zel ang.

ISAM143
Masi-a Chhakchhuak

KA BEISEI THIN

Tea Renthlei Tianghawl
KA BEISEI THIN

Laisuih bu-ah heti tê hian,
Ka han tiala lungrûk ka dawn;
“Ka tawntirh ni atang rêng khan,
Ka hmangaih che asin” tiin.

Ka thler thla a leng thei turin,
Biahthu tin bawm lamtluang sira’n;
Ka hnutchhiah ta lungrûk ka dawn,
Thleng tak ang maw ka hmangaih rûn?

Ralkhat ata ka thlir reng a,
Tuantul kal lai ‘puar ak kuala’;
Vangkhaw rûn tin a vêl chhuak a,
Hnung min chhawnin a liam leh ta.

Laisuih bu-ah heti tê hian,
Ka tial zela lungrûk ka dawn;
Hmangaih biahthu beiseina nen,
“Lawi tak ang maw, ka D sianga’n?”

Hei ha, hui ha! a liam zel e,
Puar ak kuala zalam kawia’n;
Lunglawm ve nan lo lawileng che,
Kan rûnsangah biahnem kengin.

Beisei bo mai an chang zo ta!
Thaikawi ziahtial palai leng te’n;
Chhawntu dawng lo a thâm zel e,
Ka hmangaih thu vut leh vâia’n.

A thleng lo nge a thâm zel le?
Min chhang si lo biahzai nemten;
Suihlung dam nan “Ka Hmangaih che”,
Tia min chhan ka beisei thin.

LAILUNG FATE

R Lalchanchin Mawia
Khawi'nge kan khua Khawlailung hi hlain kan chawi ve reng reng teh ang.

LAILUNG FATE

Ami'n min sêl bik lullo u lailung fate,
kan hril dawn e hrilh hmang rengah.
Kan duai billo lanu valrual zaleng zingah,
Kan sakhming than lawi ang thang zel e.

Rualtin chhinga chawi lai lailung faten,
Kan nghawr dim e zoram khawvel.
Kan theihna leh thiamnate'n zoram tân,
Hlawhchhuak zel e chawimawina nopui.

Chutin hmatiang sâwna fâwn zau zelin,
Kan thiam kan finnate lo sang zel se.
Pheilai vawra ram tan ti chung zelin,
Kan chim zau zual zel ang zoram pelin.

Kan khua, Khawlailung khawtlang hi, hmangaihna avanga duhthawh luat vang nge..!? Nêp riau leh a tiapui khawdang pha lo riau nite hian ka hre thin a. Nimahsela, ka lo hawi zau tawk lo mai chauh a lo ni. Zoram kohhran lian ber bulthut Synod puipate zingah pawh a khaidingpa tih theih hial tur khawpa mi langsar leh mi tangkai lo ni tawh te, Mizoram sawrkara mi pawimawh leh fel tak takte bâkah football lamah phei chuan, a state mai bakah a rampum aiawh phate hial pawh a lo hringchhuak tawh a. Chutiang chuan, nakin lawka mi pawimawh tak tak la ni mai tur eng emaw zat zirlai vengva tak tak an lo awm teuh bawk a. Zoram khuaah hian kan lo tê ber lo tawp a ni tih ka hmuh hian lawmnain ka khat a. Hlaa han chawi ve hi tih màkmawh ka kova tla nia hriain ka'n chhai chhin ve ta a nih hi.

FACEBOOK.

Tza Chongthu
FACEBOOK.

Tun min sel lo u kei lung mawl hi.
Sel zai ka rel leh nang e facebook hi, 
Lanu val rual, a zo a vai, chun leh zua pawh bang chuang lo,
Zankhaw tairek thleng thlengin maw kan fb. 
Zan mu kan chhing thei lo aw FB, 
I sakhming sawi kan bang thei mawlh si lo.
Zofa leng rual thinlai i fan,
Tul dang thawka tuan zai rel thei lovin,
An bel che maw, tuk chhuakin.
Ka ngen a che, aw Facebook.
Zofate thinlai rilah hian,
A tha lam kawnga i tangkaina tal hmuhtir ang che aw..

MUAH...

Zira Chhakchhuak Hualngo
MUAH...

Belmang thianghlim! Nang vang,
Rianga piangin ka lawi siang sang;

Lungngaihna hlimawm mi thlen,
Nang vang ka fawm;nuih,tah,hah nen.

Aw, senmei dai! I tan,
Ka nun, hun neih chhunte ka hlan.

THU MAWI

Khiangte LR Lra

THU MAWI

Lui a luang dem dem,
Thli a thaw heuh heuh;
Pangpar mawi a vul chuk chuk,
Sava te an chiar nak nak.

Dar a ri ral ral,
Kan kal ho dial dial;
Hotu’n min zirtir mawlh mawlh,
Hrethiam si lovin ka thlir doh doh.

Tlai-ni liam tur a eng no ruai ruai,
Lo sul feh an haw hnak hnak;
Naupang riltam an phi cheng cheng,
Chawhmeh bai a thak em em.

Nangin mi’ hlat deuh deuh,
Ka ngaihna che a zual tual tual,
Lunglen mittui far zung zung,
Hnemtu ngaiin ka tap hawm hawm.

Tlawmngaihna a dai riai riai,
Thalai nun a ho tual tual;
Hmeichhia incheina a pan mah mah,
Pawisak reng a tlem tial tial.

Meizial hla.

Kima Tuallawt
Meizial hla.

Zanin maia then che tum ang leh
naktuk maia thlah che tum iang hian.
Chin lem awm lo leh
mawi hawih pawh dawn lo lekin.
Heh nei miah si lo hi
am ten ka lo fawp leh vung2 thin che.

Awmhar min hnem tur leh
chhun ni tawi puia zan khua
min awm tura'n ka thlang fo reng che a.
Pialral lampui pawh zawhin,
lunglohtui dawna Hawilopar thliah hnu paw'n.
Ngai bang che hian ka ring lo
aw Ziala,aw Ziali

Thla khi a mâwi,

Lalrammawia Chhakchhuak
THUPUI A NEILO A -

(Chham zuah zuah ang u aw. . . .)

Thla khi a mâwi,
Nun hi a ngâwi;
Zai in ka châwi,
Siang a'n ka lâwi;
Sual in min dâwi,
Ka hlah, min âwi.
(Ka rût, chaw nâwi.)

Vangkhua a zâwl,
Ruamtin ka hâwl;
Sual rawng ka bâwl,
Thenrual ka pâwl;
Ka chhuah ka râwl.
(Hâwk len chu nâwl).
(I hmu em, Kâwl?)

Hringnun a tluang,
Mahse a muang;
Hrilin ka puang,
Kei zawng ka uang;
Sâng tak ka zuang,
Tui pawh a luang;
A zawh a kuang,
Lawngah ka chuang.
(Ui chu a buang!).

Virthli a lêng,
Luaithli ka sêng;
Len pawh ka dêng.
(Pawnfen a fêng; )
Sual vang min bêng,
Mahse ka ngêng;
Suala'n ka pêng,
Lalpa'n min vêng;

Engpawh ni sê'ng,
SUIHLUNG A LÊNG!

220520132420
*. . . . . . . . . * . . . . . . . .*

BEISEI BO

Dawithiam Lalruanga

BEISEI BO

Lawmna chu thlaler ram pilril a tuihna ang maiin,

Muanna chu tuipui fawn kara himna ang maiin,

Engthawlna chu thihna hlim ruama nui ri ang maiin,

A vang lua e, ka tawng love.

Kawlngo va iangin kawlva lenchhamah,

Thlawkin zamual liamsan ila,

Chutah chuan hringnun piah ram chu,

Nuam zawk chang tak ang maw?

KA NGAIH LOH CHE RING SUH - III

Zirtei Mangpa
KA NGAIH LOH CHE RING SUH - III

I hlimna thlentu ni tawh lo mah ila,
I thinlung pindan min kharkhum tawh mah la,
I hriatrengna ata mi paih si loh chuan, 
Ih maw, Mate, ka ngaih loh che ring suh! 

I thawnthu ziaktu ni tawh lo mah ila, 
I ziakfung chelhtu pawh lo thlak tawh mah la, 
I thawnthu-a ka hming i paih si loh chuan, 
Ih maw, Mate, ka ngaih loh che ring suh! 

Ka nun thawnthu ziah zawm ve zel mah ila, 
Ka ziah apiang chhiar ve zel tawh lo mah la,
A phek tina i hming a la chuan si chuan, 
Ih maw, Mate, ka ngaih loh che ring suh!

KA CHAN KHUA REL A DAM THEI LO.

Tza Chongthu

KA CHAN KHUA REL A DAM THEI LO.

Mahriaka awm khawhar ni khan,
Ka thinlung kawngkhar i rawn kik a.
Ka han dak a, i sakhmel dar zam a lo lang e..
Kei val lungmawl thinlai rukah.
Sên nau ang ka nui lairilah..
Mahse an sawi khuanu ruat kan ni lo em ni le?
Nge ni hmeltha nunrawng mai zawk le?
Hmangaih biahthu kan inhlan lai a,
Eng vang kher nge ni ang le?
Kumsul pawh vei lo va thenna biahthu min hlan?
Hrilh ka hai, lung ka vai, i dawn ve lo vem ni?
Ka tah khua a van sei dawn em..
Ka dawn ngam lo hmatiang nun,
Ka chan khuarel thinlai a dam thei lo.

FORGET-ME-NOT

Khiangte LR Lra
FORGET-ME-NOT

Kan kawmchar-ah maw,
A par chii chiai e, “forget-me-not”
“Varte” tiin a sakhminga chawi ka lo nuam e,
Leng zawngte ti-hlim tur a’n i lo vul kher chu le.

I par var de thliah thliah mai te,
I rimtuina leng nam chem chem chu hriain,
Zo valrual te’n an pan thin che i zun ngaiin.
Ka ning thei lo i parzu ruia tlai-ni len hi,
Chhu ni leh zankhua pawh var ila nang nen chuan,
Ning thei hian ka inring lo i parzu tlan hi, 
‘Forget-me-not....’ “min nghilh lul suh aw” 'Varte'.

“Varte” nang aia duhawm leh thianghlim,
Partin thang zawng zawng zingah hian e,
Awm tak ang i maw aw, khuavelah hian….! 
‘Forget-me-not’....ka par mawi chii chiai, 
Min nghilh lul suh aw, 'Forget me not' ti chung zelin.

KEI CHUAN E, KEI CHUAN E.......

Khiangte LR Lra

KEI CHUAN E, KEI CHUAN E.......

Kei chuan e, kei chuan e,
Ngaihlungrun, ngaihlungrun,
Ngaihlai e, ngaihlai e,
Ban zai hi, ban zai hi,
Rel zai rel, rel zai rel,
Thei lo ve, thei lo ve.

Kei chuan e, kei chuan e,
I tan hian, i tan hian,
Nang vanga, nang vanga,
Tlang rel hi, rel thang hi,
Phur mai pawh, phur mai pawh,
Ka mawi e, mawi hluan e.

Kei chuan e, kei chuan e,
Hlau lua e ,hlau lua e,
Chan mai che, chan mai che,
Chuanin e, chuanin e,
Famkhua e, fam run e,
Thlang zawk e, thlang zawk si.

AWMHAR BIAHZAI

Valpuia Fapa Duat
SONNET

AWMHAR BIAHZAI
Zaleng hlim lai a vul lawm ni chhai in,
In-di hiauvin tahlai ban zai an rel.
Tapin ka zawng 'ngaihlai' ka di tiin,
Tawn ni nei si lo run belh zai ka rel.

Nun thlipui hrâng kan do biahzai rimawi,
Hlanin kan thlir ngaihlai sakhmel tawn hun,
Vangkhaw hran nghak nunnem ka tan i mawi,
Kumtluang ka thai changin luah la kan run.

Mahse sakhmel thapui hmu si lo hian,
Duhaisam val awmhar ka ngui zo va,
Thlehnem bel a 'ngaihlai' ti chung zel hian,
Suihlunglen zai sa in ka tham zo ta.

Luaithli bualin sakhmel a hnim zo, 'di.
Ban zai a rel lo'ng maw, suihlunglen hi. 

*Rhyme- abab, cdcd, efef, gg.
*Metre- Iambic pentametre.

A TEL LOH CHUAN

Pa Marema Thaibawih

A TEL LOH CHUAN

Tùan rêl lâwm lungrual zawng,
An ngîr e chhuahtlângah,
Kei chuan a awm maw tiin ka lo thlîr,
Thliah loha pâr Lawhlêng Ngaihlungdum;
Mahse kan kim lo, 'a' tel ve lo,
Hrilhhaiin Chaltuai ka hawihai e!

Engtin sîr sàwn ang 'i maw,
A TEL LOH CHUAN!

Thlîr teh,
Mual liai luai kan tùanna saw,
Sîr sàwnin thutin biahnêm hrilh a, 
Awmhar champion Vâla'n Siali chhai a,
Sial ang siang lawia riah rûn kan remna;
Sàwmfâng hmun bûkthlâm,
Mahte’n ka bêl ang maw?!

-tc lrs — at Ngaihlungdum Shots & Mizo Poetry Institutes.

MITTUI NEN!!!

Lalthuamkima Khawlhring
MITTUI NEN!!!

Ni chhuahna lamah ka awm a,
Ni tlakna lam ka hawi thung;
Ni vanlai zawl a awmin,
Ka hlimthla a bo a

Kawleng chuan pindan thim-
A hui kiang a,
Thim lam chu ka pan talh talh a;
Ka nui hmel a bo va,

Khawfing chat tur ni lovin,
Thimin khawvel a tuam lai
Chu thlir nitin a,
Mittui nen ka zin kawng a sei lua e.

Ralmuanna hmunah ka piang a,
Doral, sa hrang hmaah ka zam 
Ngai lo tiin ka vo pung a na a;
Tui ang nem vangin ka muttui a ko chhuak ta, Thapuii hnawl chu(h)!

Panlai Nun

Jasiv Lesane Tuallawt
Panlai Nun

Panlai nun, duhawm eng hlo mahin a chiahbuai loh hringnun,
Sualin a ngamloh nun, kir leh thei chuanga mawi twh silo kha a fam ta em ni?,
Kha nun,
Zonun zemawi mi tena chhawmnung tura an beisei thin kha sual chuan a ngam ta em ni?,
a hringnun kha a kham ta em ni?

HLUTNA HI

Pa Marema Thaibawih
HLUTNA HI

Hlutna hi,
Inpho langsâr leh pho chhuah loha bîru, 
Mahni’n hlû kan tih leh miten hlû an tih te,
Mahni hlû inti leh miten hlû min tih te;
A eng chi pawh hi keimah leh midangah, 
Engtin emaw nungin hna a thawk thin.

Hlutna hi,
Mahni leh tûte hlutna emaw pawh ni se,
Midang hnuaichhiah nâna hman chuan, 
Hnâwmhnê mai a chang thei thung a;
Mite chaldelh nâna hman a nih tlat chuan,
A hnawksakin a tangkai lo thuai thin.

Hlutna hi,
Midang tâna tangkai leh malsâwmna dawn nân,
Chhûngkua, thenawm khawvêng, khawtlâng, 
Pâwlho, Kohhran, hnathawhna, ram leh hnam; 
Tûemaw leh khawi emawah eng emaw atân tal, 
"I hmang dik a ni," titu che an awm em le?!

-tc lrs — at Ngaihlungdum Shots & Poetry Institutes.

UNKNOWN KID

Masi Naupangsual Luhlul Chhakhhuak
UNKNOWN KID

Mimang piangin
Sialang a lo seilian ve a,
Belh tur chun leh zua neilovin
A vai vel e vankhawsumtul ah
Lengzawngte sukthlek thlirin
Nikhua a chhiarliam e,
Lampui sir hrutvel in
Fam loh khawp fang a chharkhawm e.

Khawngaihtu neilo,tuailai riangte
Aw. . .a riang ngei e
A harsalua e a tan hringnun
Dawn phakloh khawp retheihna phurin
A hrutvel e,kiltin kiltang
Aw. . Khawngaihtu a va vai tak em!

Chun tang bela duhtin lam
A duhsam zawng a ni ngei 
Mahse atan duhsam beidawnthlak
Beiseina beisei phakloh mai a ni si
A tana khuanu ruat hringnun hi
A va harsa tehlul em!
A eng tak tisual bik maw?

Chutin hlawmloh sakruang
Rauthla iang te chu
Lampuisir kilah a let bem e
Leihrehawm tihbuai phaklohin
A kalsan e a hrinlai hun hrehawm
Khawngaihtu Lalpan kuah ngei se
Chatuana a fa ni turin.

ISAM143

RAMTIAM LAM PAN IN

Masi Naupangsual Luhlul Chhakhhuak

RAMTIAM LAM PAN IN

Vullai chuaiin
Hringnun hlutna a bova
Hringnun timawitu leh tinuamtu
Partin leh chhuahtlang ,
Sirva lenthiam leh hringmi zawng pawh
Zunphur lungtileng an chang zo ta

Kan hun a liam a
Rualpui ten piallei an bel e
Hringnun hi enge a nihtak le?
Mi zawng an tam ngei sumtualah
Mahse hriatloh sakhmel a tam ngei
Engah inruala ka liam mai loh
Aw a pawi ngei

Tunah zawng nunkhuain
Awmzia a nei ta lo
Tu leh fa-te tang belh reng ai chuan
Ka D duhlai i lenna ramnuam lam
Ka rawn pan e ka theihna zawng nen
Min lo nghilh lo la vankhaw sumtualah
Chatuan in pa angchhungah
Hmangaihna hruikhat vuanin
In D bang lo'ng aw. . 
A sira kan rualduh te nen
I din thar leh ang kan hlimni.

ISAM143

(THLALA TU: Masi-a chhakchuak.i.e me hahaha)

KA ZAWN KA HMU LO!

Htluanga Hruaia
KA ZAWN KA HMU LO!
(From Zawlkhawpui)

Ka chuan leh e hmâr khua lii liai,
Ka fang leh e hringmi khuai ang rauhna!
Ka zawng leh e zün zâm chii chiai,
Ka phur leh e phurhhlan hlui-thing bitna!

Hei ang hringmi za tam lâwina khuaa’n,
Ka zawng châwn bân vuana rualpui di kha!
Hei ang khua lian hringnun chantual mawia’n,
Ka hloh ka zawng thlangtiang lawhlei seih kha!

(Dt. 03.06.2013-Ht

Ka lungrun, ka khawvel

Emmanuel L. Vuite

Ka lungrun, ka khawvel tinuama ti thlahlelawmtu,
I tawnah beisei ka nei tam lua a ni mahna le,
Mahsela ka theihtawpa neih thinlung khawnga hlimna leh lawmna pek che ka zuam asin.
Ka hmangaihna angchhunga chentir che ka duh asin le,
I duhaisam i mangram kha pek che pawh ka tiam che asin le,
Mahsela hringmi zawng e, a ngai rengin kan awm hleinem,
Hmangaihna i tan kha engah nge i thlahthlam leh si le?
Kei a rairah riang tawnah a na em e,
I kam thlum zawngte engah nge anchhhiaah i chantir tak ni?
Keia tan zawng liamsan mai che a tha ber e.
Mangtha mai le

Zal nan laitha a ngai emni?

Muantea Fanai Pakhup

Zal nan laitha a ngai emni?
Chhin har zantiang ririai
Chhuihthang lunghlui kir e
Chhinzai rello bukva iangin

Dawntam zantiang hmang e

KA THINLUNG

Kick Jacob
KA THINLUNG

I bul ah awm lovin hmungai lo che
mah ila,
He ka ngaihtuahna hian kum khua a
daih ang;
Kan mitui tla zawng zawng te kha
ruah ang in ral tawh mahse,
Ka kawng ka hmu leh ang;
I kut ka vawn leh na tur in,
Chumi lo thlen hma chuan;
Hei hi i hria ani
Ka thinlung ah i cham reng tih hi.
Ka lak ata hla takah awm in
Hmun hla tak ah awm mah la
Ka mit ka chhiang a
Chutah chuan ka hmu che
Hun hian thil tha
A her chhuah hun ah engi chuan
I ban ka vuan leh thei ang
Chu mi hun lo thlen hma chuan
Ka thinlung luah tu ini.

S-U-M-Z-U

Laltluangliana Khiangte
S-U-M-Z-U
(Students’ Union Mizoram University)

Sawm vel ila thiam zir zel tur Zo-hrin lanu-valrual zawngte,
Uan zai rel lo, thawhrim lungkham, rual tin chhing zau zela’n,
Malsawm dawng tlak thiam-fin theih tin puntir thiam rual,
Zoram nghahfak thluakfim chet zei khan tin luahlum turin,
U leh nauvah ka thlang Zo-thlawp nun mawi insilh apiang,
S-U-M-Z-U, sumzu, sum zu-ah chantir ngai suh ang che aw.

June 07,2013 : Fakrun : Ltlk........Hei hi vawiin khan MZU zirlaite Parting Social Khuallian (Chief Guest) chuan a chham chhuak a, a thu hi President a pe nghal bawk a, hetiang Khuallianin han chham tak tlat chu.....a nak thin teh e.........MZUSU an ti fo va, ani erawh hi chuan S-U-M-Z-U a ti ve thung tlat a.....

NI LO

Pa Marema Thaibawih
NI LO

I ngawih tâk avânga ngawi dawh ve mai tur ka ni em ni?
I liam tâk avânga kîr ve mai tur ka ni em ni?
I awm tâk loh avânga bo ve mai tur ka ni em ni?

Ni lo;
Mahse i tel loh chuan,
Nang nên a nih loh chuan,
A ruak hiau ang, khawvêl hi!

-tc lrs  at Ngaihlungdum Shots & Poetry Institutes.

JTC

Zira Chhakchhuak Hualngo
Govt. J. Thankima College(JTC)-a zir laia, a puala ka hla phuah. Sonnet ka phuah hmasak ber a ni hial awm e. A sikhaw a sikhaw-in......

JTC

Zawlkhaw chhuah lamthluang sir kawm laian,
Chhak, thlang, chhim, hmar zirmi kan lawi hlimte'n;
Thiamna vanruah a sur ami zawng tan,
Lianchhung leh riangchhung kak hnawl zate'n.

Kan nun hruaitu thupui pawh 'hma lam pan',
Kan ngai bil lo mitinten khawi hmun dang;
Thiamthu ril min fah min hruaitu a tan,
Sakhming chauh paw'n min muan lairil a fang.

Lenrual zawngten i sakhming sel mah se,
Kei ka tan finna hnarfim ni ang che;
I tawnah hlemhlet inluling lo se,
Ami hneh riang lengten i zar zo rawh se.

Hming mawi hluan JTC a hming kan chawi,
SOAR HIGH tiin a run chhung kan lawi.

MANGTHA HNUHNUNG BER

Pa Marema Thaibawih

MANGTHA HNUHNUNG BER

Ka va'n dâwn sei ngam lo khuarei kumsûl vei tur, 

Famrolungah Rihtlâng kâi si loin;

Dâwnlungah dâwn loh biahthu min remsan,

Do zawh rual loh mangtha hnuhnûng ber chu! — at Ngaihlungdum Poetry Institutes.

DARPUII

Lalthuamkima Khawlhring
DARPUII

Huiva lengin biahnem zawlaidi
An than vel e.
Darpuii lung lai nem ve maw!
Kek darh tak i maw!

Thla khat chhung a tan ni lovin,
Pawlkut thla a tang a pawltlak thla chenin;
Chhim tawp leh hmar tawp ah pawh nise,
Tlang tin hrut vel mah ila e.

An awm chuang lo'nge,
Luahlai ka lungdi iang zo reng;
Zal lai khum a zau,
Dawn ve che maw!

Tiangten kan zal laikhum zawl an,
Lungrun, thinlai a zing;
Dawn di Darpuii -
'Khawnge maw i awm le?'

Sel mah suh, aw, ka lenrual te u.
Chawilai naunawn ka iang e,
Mi ngai lote tual i chaina -
Fam leh ka nuam mual zawng te

Huna kal rawh, kal ta thuai che,
Ka di, Darpuii, pangti reng a bo ta;
Lum hian a chel zo si lo che maw!
Vur aia var, vawt aia vawt...

Ka hmangaih di Darpuii ngei i ni si,
A na em a ni kei zawng;
I zun leng ngaih hi!
Ka ning si lo, Lalpui...

Dawn lung an rem i zalnan,
Hahdam rawh, ka hmangaih...
Chham nga zalin, ram chu kal ta la;
Kei erawh ka zui thuai ang che.

Hmangaih, Darpui, fam ro lungmual ah kan in tawng leh ngei dawn nia....

Duhtak...

Sangtea Blacksmith Chhangte

Duhtak...

I awm dawn lo tih hre chung in,

Ka mit hian a zawng che a.

I hawi dawn lo tih hre chung in,

Ka aw hian a ko che a.

I rawn let ring si lo hian,

Ka thinlung hian a nghak che

MALSÂWMNA LEH ÂNCHHIA KENGTU

Pa Marema Thaibawih

MALSÂWMNA LEH ÂNCHHIA KENGTU

Ka fa, 

Ka hmangaihna zawng zawng i khawrh ruah vek hnu paw’n, 

A dang ka dap ka dapa a bâwm a ruah hiai hnu pawhin;

Nang chu ka la hmangaih fan tho che asin!

Ka fa,

I tân ka hmangaihna ka hlan ral raih hnu pawhin,

Mi beng tla lo tu’n emaw a hringtupa zahpah hauh lo leh,

A paitunu mittui titlatu mai a chang thin ang emaw,

Hreawm nasa tak min tuartîr ve hialtu pawh ni mah la,

Nang chu ka la hmangaih fan tho âwm si che a;

Mahse chû’ng chu kei chuan ka tuar zo lo ang, 

Ka dam zo ve lo ang, a na dâwn êm asin!

Ka fa,

Hmangaihna kan pêk zawh vek hnu che leh,

Hmangaihna ka pêk belh zêl fan lai che hian;

I thlauhthlâk ka nih chuan, a va na dâwn êm!

Ka fa, 

Chutiang chu min tuartîr ve phal hauh suh ang che; 

I tuchhuan thleng atâna malsâwmna leh ânchhia kengtu, 

Nangamah hmangaihtu, i lei pathian ka ni ve miau si a

HARH RU

Bingbii Pa
He hla hi ka post tawh em aw?... Ka hre ta hauh lo mai... Min han sawi zau sak teh u. In hmuh dan leh ngaihdan ka hre chak e. Sawsel luai luai pawh ka phal.

HARH RU

Dt. 25.March. 2010 11:45 Am MZU

Chung chhawrthlapui leh siar te khian,
Lei mawina an chuan thangvanzawlah.
Piallei mawina hian an lung a dum;
Zan tlai tluanin ning lo ten an thlir.

Lei mawina chuan ve turin,
Zingtian bawhar zaiin turnipui a ko,
A lo her chhuak chhaktiang daiah;
Berhva, hramthiam ten zaiin lo chawi.

Hlimin lawmna hla mawi an hlan,
Zuangin an tho an hun lawmin,
Hnutiang ngaiin hmatiang an dawn lo;
An lawm thin, lei pangpar an tlan za.

Ami lengte’n a mawina haiin,
Duat ten a chawi lo hraileng iangin
An lairil a fan zo lo, a malsawmnain;
Lunglai na hian, luaithli nulin ka ring thin.

Dawhthleng leh dawh chho kar cheh,
Tuahthing, senmeiin vuta a chantir angin,
Lei mawina hian chuai ni a tawng thin;
Lungmawl hmatiang dawn lo vangin.

Lungfing a ngai lo, thiamna a ngai lo,
Ngai ni suh se nungchate an pamhmai,
Hmangaihna a tawk duhsak hmangaihna chauh;
Chu chuan damna a thlen, malsawmna nen.

Chunga lengte, hnuaia lengte leh piallei,
Vui leh vaina hi kan tan anchhiaah
A thiang lo, a thiang lo, a thiang lo;
Harh ru, harh ru, harh ru, harh ru.

DAR NGE SAR...?

Zira Chhakchhuak Hualngo
DAR NGE SAR...?

A sakhmelah dar a zam nge,
Sakhmelah sar a zam zawk le?
Tawn thar di-a ka lo chhal lai,
Tawrh har di a chan tak mai!
A mak teh e, tawn tirh di kha,
Tunah tawh khirh di a chang ta.

HMANGAIH LEHKHA THAWN

Zira Chhakchhuak Hualngo
HMANGAIH LEHKHA THAWN

Lenkawl a hnim sen riai,
Zun zai a zam ri riai;
Khawnge thinlai hnemtu,
Lawh loh lawhlei par chu?

Hmanah lungtin rualin,
Tlai dai kan lawm dun thin;
Tunah tuan mual a hrang,
Malin sulhlui ka fang.

Aitenawn suihlung hnem,
Ka va ngai tak che em!
Khual chhawng sakhmel mawite,
Tiamthu vawng reng ang che.

CHEMTAT-RAWTA NEN.

Vltochhawng Vena
CHEMTAT-RAWTA NEN.

Chemtat-rawta'n hmarcha a rawt a
Tochhawngpa in vawktil a siam a,
Cherber hmachhuan a khawn zai relin
Dawhrem tlanga lengleh titi vawrh nen.
Hlim zai lawm zai kan rel, t'r'ah hmachhuan in.

Chhunrawl vai iang di run kan vai,

Lalrinchhana Hmar Hrangchal

Chhunrawl vai iang di run kan vai,
Hmangaih khartung a sawn lo maw lengtuai tirin,
Chorun a'n maw an chhai thaleng valin,
Kan tum loh leng tawnah em ni?
Ni rei cham tum chhingkhual rairah kan lo chan le?

ZOFA LENG TAN

Tza Chongthu
Khawi nge, thiam lo chung chung hian i han thlasik mau puah leh phawng mai teh ang aw..

Zaiin ka hril dawn e lo ngai teh u.. Tu'n min sel lo u kei val lungmawl hi. Thiam tawk thaikawi hian zaleng lung a dum mawlh lo ve..

ZOFA LENG TAN
Rauthlain Zoram dung leh vang ka han thlir vel a, 
An leng e lanu val rual, zaleng zawngten.
Eng dang dawn lovin hlimlai an chen.
Nau ang an nui mahse an dawn a tawi lua e,
A pawi em e tiin luaithli an nul leh si.
Piallei thim an nghak chatuan rorelna nen,
Chatuan nunna nei si lovin maw. 
Lanu val rual Zofa leng tan,
He biahzai nem hian i thinlairil fan se,
I nun kawng khalh ngiltu lo niin
I rauthla tan chatuan pialral kawnga hruaitu lo ni se tiin ZOFA LENG TAN ka rawn hlan e.

Dar fiante nen, 'Hawh awi, Bawihte' a ti,

Elti Muana

Dar fiante nen, 'Hawh awi, Bawihte' a ti,
A hrai dawntuaiin chhunrawl hnawlin a hnar,
'Hawh awi' ti chung zelin lamtluang dung an chhui,
Tuan tul kal lai min kham, dingin ka thlir.

Chu hrai duat laiah chuan ka senlai nun ka tawng thar leh a,
Ka chun nunnemi khan thlan tui luanga a thawh chhuah sa kha,
Vawi tam hnawla ka hnar hnu-ah pawh,
Puar khawp ka ngah loh hlauin vawi eng zat tak mi hnawn thin ang maw?

Ka dawn khawl hian awm chuang hian ka ring lo e,
Chunnu hneha min hmangaihtu hi, kei ang hrai tan hian.

Sumtual ko lerah hawih te'n a lo par chhuak a,

Elti Muana

Sumtual ko lerah hawih te'n a lo par chhuak a,
Dur tin vura duat tea ka zuat chinpar mawi,
Lungkham min chhawka thinlai thawi damtu chu.
Mahse maw, rin loh karin chhimthlipui a lo hrang a,
Ka parmawi kung a thliak min thliahsak ta!
Hriat lawk theih zawng chang se pal ang ka dang tur a,
Dawn tam lungkham tu'n nge min thawi tawh ang a
Lung ngui leh chau tu'n nge dawi ang min dawm ta ang?

Zua awp loh hrai kha chen ka lo awi a,
Hmatiang thlirin duhthu ai ang ka sam thin a,
A tan Khuanu hnenah malsawmna ka dil awl lo.
Hai thangin chun riang thawhrim min chhawk,
Tlei dang zua awt bil loin hmatiang ka thlir a,
Mahse maw, rin loh karin vanduaina thlipui a lo thawk a,
Ka bungdawntuai vullai kung min thliaksak ta,
Hriat lawk theih chang zawng ni se
Kha ang lamtluang chhuiin a liam ka phal lo tur a!
Tu nge phurhhlan min chhawk ang a,
Rual elna khuavelah tu nge ka muan chhan ve tak ang le?

HLIMNA

Pa Marema Thaibawih
HLIMNA

Hlimna hmachhawn turin,
Ka thinlung hian tûmah huat a nei lo;
Mahse rilru manganna hian min tihnual ve fo,
Mâwlmang taka khawsak chu ka nunphung a ni a,
Pe chhuak tlêm hle mah ila dawn chu ka beisei ngai lo!

Ka hlim hi i ring em le?!
Mangan lai paw'n ka huat loh avângin,
Dawng lo mah ila ka khawsak a mâwl tho a,
Ka pêk chhuah chhun chhunah an lâwm miau a;
Chuvângin ka zalên a, ka hlim êm êm a ni, englai paw'n!

KA ZUI, NGAIHLUNGLEN HNIAK

Pa Marema Thaibawih
KA ZUI, NGAIHLUNGLEN HNIAK

An sawi kâwldai mal pâr a thliak,
Ka nghilh loh nâna min thliah.

Kei chuan a bahsama'n ka thiat,
Chuailopâr a tâna ka thliah,
A kau mal chauh a tliak,
Min hriatrengna tur ka ziak;
Tin, ka zui, ngaihlunglên hniak!

-tc lrs — at Ngaihlungdum Shots & Poetry Institutes.