RAWLLAI RUALHLUI ZAWNGTE KHA

R Lalchanchin Mawia
RAWLLAI RUALHLUI ZAWNGTE KHA

Lêntu zing hnuaiah ka chuan leh kan vangkhua.
Ka thlir vela thingtin hnah nêm leh maurua.
An kûr nghiu nghiau e ramhmul chhawllêng.
Chhem thle nghil nghial e virthli lêngin.

An iang renga hlimlai chen lungtin rualza.
Vangkhaw laitual mawitu rawllai tualchaiza.
Sulhlui chhiah cham e chhingmit thlaah.
Lunghlui a tho leh e dawn lungrùkah.

Hmanah rawllai ka di thlunglu thle nghel nghel.
Tuaitir duahthar bahsam mawi leng siau siau.
Thlir nin loh kei ka lunglawm kimna ber.
Nghilh hnu aiang thar leh e thinlaiah.

Hriat loh hun tam liam kum tam veiin.
Hun thar her chhuaka kar min danin.
Kha chen min chuan tir e tuanna mualdang.
A dang zo ta e maw kan nun zawngte.

Aiang thar ve maw e rualhlui sulhnu zawngte.
Sumtuala tualchaipui thin chhuihthangvala.
Dawn ve maw e tuanna mual chuan leh changin.
Hlimlai sulhlui chhiahpui rairah riang vala. 

Hmanni lawk, Zoram ka rawn chuanchhuaha, kan khua, Khawlailung khuaa ka han chho chu ka mikhual ang reng hle mai a. Thangthar, tu an nih ka hriat lem loh leh min hre lotu an lo ngà tlúrh tawh mai a. Hrilhhaia hawi lawl lawl mai pawh a awl hle a ni. 

Tunhma kan tleirawl chhuah, high school kan kai laia hmeichhe tleirawl duhawm tak tak, chawlhni tlaia fenchhing nena tleh dél dêl thinte khan nuthai an lo chang zo tawh a. Hlim taka kan inlêm kual lai hunte suangtuahnaah a rawn inlar a, lungte pawh a leng ve thelh thelh nia. Chung hun lai chuan, chung tleirawl duhawm tak tak zingah chuan duhawm fal bik a awm a. Tleirawl ngaihzawn chuan enge maw chen chu kan inzui ve a nih kha. Khang hunlaia kan hlimna thianghlim leh pawisawi lo takte kha hmanlai chang zo tawhin tuna kan nun nen chuan a kar a hla ta hlein ka hria a. Khatih hunlaia ka thinlunga Lalduhawmi dinhmun hauh tlattu khan, khang hunte kha a hrechhuak ve thin angem tia ngaihtuahin ka thinlunga thu lo lut ka puang chhuak vel ta mai mai a nih hi.