VE SELA CHU...!?

R Lalchanchin Mawia
VE SELA CHU...!?
(Malsawmna inthukru)

Mite angin ka sakhmel neih ve chhun hian. 
Duhawmna khumin puak han ti ve sela chu,
Chhuang takin ka thlalâk neih chhun hi. 
Ka phochhuak fo ngei ang mite hmuh turin.

Mite anga thiam nâlin hmang ve thei ila. 
An sawi thlang sappui tawng mawi,
Intithei takin thu leh hla ziah nan ber.
ka chelek ve fo vang mahni tawng dahthain.

Mite angin ka thiamna beitham tak hi.
Han ni ve sela chhawr nahawm tham.
Mite hmuhah a tam thei ang ber lantirin. 
Hming chherin ropuina ka khum ve ngei ang.

Mite angin ka finna fahrah tak mai hian.
Midangte finna phâkin rual pawl pha ve sela,
Mite chungah lêngin ropuina lallukhum.
Khumin ka hlawh ve ngei ang chawimawina.

Mite phâk ve lo khawpa dawrâwm ka nihna hi,
Sita zahpuiin duhkhawp lo êm êm thin mahila.
Thlirna thinlung mita ka han thlir hnu hian,
Ka hmu thiam ta malsawmna inthukru a ni tih.

Ka duhkhawp loh em em nihna sitawm tak.
Keimaha tlinlohna leh felhhlelhna bet tlat hian,
Chapona tlang atanga min lo hnûkthla thinin.
Tlawmtêa nung turin min lo thunun tlat si a.