Htluanga Hruaia
KA HMANGAIH I NI ASIN.
* Ka thinlung hian,
Ni chhün awmhar châng hian a lam che a;
Ka hringnun hian,
Lenkâwl liam hian a ngaih che a zual asin!
* Ka tisa hian,
Pâr mawi ianga chuai hun a la nei ve ang a;
Ka tisa hian,
Mawina a neih loh hunah a mamawh che asin!
* Khawvel hi,
Hnâwmhne leh hluihlâwn thilin tuam mah se;
Ka nun hian,
Hlutna pe turin nang hi a mamawh che asin!
* Khawvel hi,
Thim chhahin tuamin, ènna bo hial mah se;
Ka nun hian,
Enna pe leh turin nang hi a mamawh che asin!
* Kei hian,
Nuihna dawhsân lemah i hming ka lam thin a.
Kei hian,
Tahna rün ruakah ka mamawh thin che asin!
* Kei hian,
Thim kâra khâwnvâr mi chhittu hi ka hria che a!
Nang hian,
Hlimna chantual nuamah mi hlâng chho thin asin!
* Nang hi,
Ka duh, ka mamawh, ka engkim chu i ni ngei a.
Nang hi,
I liam a nih chuan ka tân engkim a bo tawh ang.
* Nang hi,
Ka mamawh chu i ni asin!
Nang hi,
Ka hmangaih chu i ni asin!
No comments:
Post a Comment