A ZAM THUI LUA.

Htluanga Hruaia
A ZAM THUI LUA.

Pârte, kan nun thâm hnu ka chham dawn e,
Mual bâwmin romei a zàm leh tâk chiai hi;
Pârte, kan hun kiam hnu ka chhal dawn e,
Ruam tuamin zochhum a zing leh tâk chiai hi.

Siahthing hring kungin vau a mawi thin a,
Lengdâwn tleitir tuaino zunleng a zâm thui lua!
Siahthing lèr chuanin berhva a zai thin a,
Lengdâwn tleitir tuaino zunleng a zâm thui lua!

Murvâ indi vànzâwl mawi leng der derin e,
Luah loh zun ngaih phurhlàn mi bàn leh tâk hi!
Ki-va di vai thlawhlai bèl hrâm râih râihin e,
Neih loh dâr zâm iang mi hmuhtir leh tâk hi!

Chhimtual bawhtu vut-vai an phu mur mur a,
Hringhniang khua than lawhlei pârte ka ngai che!
Chantual bawhtu hringmi an phu mur mur a,
Thlangtiang khua kuan zopâr bawihte ka ngai che!

(21.02.2012-Ht)