Zet Tee Chenkual
ENGTIN NGAI MAW?
Vangkhawpui zawng a zau na a,
A lêng ve si lo lunglâi luahtu,
A lêng lo ve ka lungdî kha.
Khua chuanin ka hawi vêl a,
A lang si lo hermawi ṭuanna,
A lang lo ve siali vangkhua.
Ka zawng ruai a rual zawng zîngah,
Ka tawng si lo thinlâi khamtu,
Ka tawng lo ve ṭhadâng mi u.
A tum em ni sam ang ṭhen zai?
Sam ang ṭhen zawng ka zuam nêm le,
Ka zuam lul lo suihlung mawl hian.
Tuahrem theih loh kan chan ai chuan,
Ṭuan rêl ila lam dang chhuiin,
Lam dang chhuia liam zai rêlin.
Zîng zin lamtluang her sawn ila,
Puini ṭumkawng lamtluang chhuiin,
Lamtluang zawhin, puini ṭumkawng.
Rûn remna riahrûn dang reng si a,
Riahrûn dangah rem zai rêlin,
Rem zai rêlin thuahriat hnuaiah.
Khawzîng chhuahtlâng ka chuan nî chuan,
Engtin ngai maw ka lenrualte'n?
Engtin ngai maw sawilâi mi u'n?
No comments:
Post a Comment