PIAL RAL DUNG AN THUL

Lalnunchanga Taitea

PIAL RAL DUNG AN THUL

(Khawharna hian hringnun a kaikûn a,
Suangtuahna beidawng kai tho leh tûrin.)

He hmun siamchawp khawpui khawhar tak hi,
Ngui nghiaia a chauhthlâkna zawng zawng hi;
Hringnun ze mawi hmâna Zonun par mawi,
Hunbi thar chhuak hian a liampui kâwlah!
Rangka dâr Rothangpui chungnung lûr e,
Nun mawi a bo Zonun a pamhmai e.

Pârmawi ningzu tlan vahkhuai phengpheleng,
Malsawmtu mal tin sawm an chhiar thiam chuang;
Damna thlifim, harhna thang fâwn ngei hi,
Pialral tian dar em ni, ka lunglam vai,
Hmangaih inrem karah a ni hringnun-
A chawi lai thinlung chawlhna chu hei hi.’

*Chu hmun thuhruk ka thinlung ramah hian,
An leng dial dial nunna hrui khat zawmin;
Van leh boruak, leilung chhul chhuak zawng hi,
Kuam zawl maurua leh luang dam diai fiar tui,
Zuksial leh awnthing zâr awitu lelte,
An dang chuang lo, û leh nau an ni e.

*Chhimlei tual an lenna a mawi ngei mai,
Ramdai lenbuang phulzing khâm râng kârah;
Zonun pâr tlawmngaihna a vul li liai,
Rianghlei ngur nun hleihte’n a dang chuang lo,
Zaleng zawngte’n hmangaihna bân vuanin,
Ngelchet, hlemhlet, elrel reng awm lovin.’

*Lian khua mah suh se thianghlimna mual hlun,
Tlang rihnim thinlai lung hnemtu fáng hmun;
Siktui thiang luangte’n remna zai an awi,
Ramtuan rel an haw thlangtlai tla sen riai,
Tin tiang rêlin murvate’n siang an bel,
Thinlai a nghawr dim pialrâl dung an thûl.’

*Lentu chhawl pal nem dar khaw zo sangah,
Lamtluang chhui dunin lungruk Lengdawni;
Lairil mawinate’n chanvo rawn hlanin
Sakhmel hmuh theih si loh a hlimthla mai,
Ngai r’u, vangpui ni kawl a liam hma hian,
Ram kalsiam a her luai hi hrilh a hai!

*Suangtuahna parthing chuan keimah Vala
Kha tuk kawl eng ka han chhim kher tak kha
(Zingthla pua dâwn khawl mai mah ni i)
Lungloh tui dawn, hawilopartawn ang mai
Zingzin vanzawlah tual ka leng liai liai
Hringnun hrichhe man phak rual ka ni nem
Hmatiangah vân râng chhûm a zám dèl dèl.