CHHAWRTHLAPUI ENG

Tluanga Chawngthu

‎2012 ARKAIDEN ZAN

Kum eng’emaw zat chhung chu kum khata thla en ber zan nia an sawi October thla bial zan ‘Arkaiden zan’ hi danglam ta bik riauva ngaihna tlat hi ka nei pek a. Hei vawiinah pawh zanin thla en dan tur mawlh lungkhamin ka kiu leh ruai ruai tawh a nih hi. Hla thar han phuah chhuah nan emaw, thla eng hnuai ngeia eng thu thu emaw han thaikawi ve hrim hrim chakna te pawh ka nei thar thut thut a. Amaherawhchu, chuti ang tihmanlo lek chuan ka hun hman dan tur hian zir lohna tam tak a neih palh ka hlau bawk si. Inthlahrun lamah chuan ka inthlahrung hauh lo; khawharna leh lunglenna tam tak min rawn thlen dawn zawk avangin!!!

Koh duat nana ‘Chhawrthlapui’ kan tih ngat mai mawizia leh duhawmzia min theihnghilhtir fotu Electric eng hi zanin hian a ngaite bawkin vawi hnih khat chu a thim leh zuk zuk ngei han beisei phawt mai ila, chu chu remchangah hmangin khi Chhawrthlapui par khi thliah ka’n tum poh a niang chu. Nupui tur hmu zo lo tur an

g hiala inngai, min duhtute duh lova kan duhte min duh loh mah ni ila, he thla eng hrim hrim hi chuan hman ata tawh ka nunah hian thu a sawi thuk ve tawh em mai!

Hmanah ka tleirawl chhuah tirh ti ve khanglang ila, kum tam pawh la liam lovah khan khaw hrana ka ngaihzawng, he October Arkaidenzan ka lawmpui dun theih loh puala ka hla phuah kha khaw’nge ka’n vawrhchhuak leh hrim hrim teh ang:

CHHAWRTHLAPUI ENG

Zantianga chhawrthlapui eng no riai hi,
Tleitir sakhmel no tha a iang mawi e;
Lunglai min dumtu thaleng tleitiri,
Dâwnin zanmu reng ka chhing thei lo ve.

Thangvan kai chhawrthla leh siâr zawngte’n,
Suihlungrual zain sir an sâwn dim a;
Laikhum ka lûm zo thin lo mahriakte’n,
Tlang danga lengi’n lung min len si a!

Lengdang hian zantiang chhawrthlapui eng leh,
An lunglai hnemtu di dâwn ve ang maw;
Kei atan khuanu kutchhuak mawina leh,
Suihlunglen tuar a har, dam ni awm maw.

Aw chhawrthlapui, mawina partin chhuangin,
Di lenna thual la, min dâwn ve turin.
...................