LUNGLEN A PAWIMAWH!

TC Lalrem Siama

LUNGLEN A PAWIMAWH!

Mi lunglêng kal ta Thangzawra khân nuam a chên nge a sa-hâl au râwl zâwk ni ang tih te hi ka ngaihtuah mai mai mauh pek a; a thiam kher êm lehnghâl nên, kan thinlunga famrolungmual remsak hi a phû hliah hliahin ka hre thin! Ni, heti hian a ti:-

“Ka zâl nâ a, Chaltuai zân mû ka chhîng lo,

Sialin tinkim dâwn ve maw laikhum chungah;
Tinkim ka dâwn lai a ni,”

Nia, a zâwltling vawn nat vawng vawng mai a ni tak e; a tân khawvêl hi a va’n hreawm nuam veng veng dâwn tak em!

Mipa te chang hi kan ni bîk hleinêm, sam sei Lianchhiari te kha ngaihtuah ve thin ta che u; hmêlma dorâl hrân vângin a tlangvâl Chawngfianga’n a pêmsan hnû khân an sulhnû a va chhui ngawt pek a, awm ngaihna a hre lo, awm loh ngawt theih lah a ni lawi si lo:-

“Mahriaka ram va tuan,
Lunglai ka mâwl mange;
I zûn ka phur hning hniang,
Chhâwl thing nem hnuaiah e,” 

a ti hlerh hlerh mai nia! Kei pawh ka tel ve duh, ti mai tê hian:-

“Nunrâwng sakhmêltha thlâwn,
Dâwnin chhawrthla êng hnuaiah,
Kan vângkhaw dâi ka hrut;
Zîngtianah hâi ang thang chu,
Mahten ka lo zâl e ramdaia’n mâw!”