ZOKHAW DINGDI

ZOKHAW DINGDI  By Mai Fanai

Hmanah sawmfang buk thlám mawi a,
Mual mawi pholêng kara vul hnu,
Thlang sappui par mawi hrân vangin,

Sirah min hnawl, ka riang lua e.

Than ngûr kan hawl zalêng zawng nen,
Zozam chuailo kara vulin,
Lai tual mawiin nuihiau par kan tlan,
Vahkhuai, hmirpa, phengpheleng nen.

Zo zia dang e, thiam fin sang zel,
Vul lai selin sirah min hnawl,
Huléng val rual lenna sang zual,
Ka chan chu e daitam pal kar mawi.

Par mawi vul lai a chuai zo ta maw,
Ka liam ang maw fam run lawi turin,
Maurua iang a dawntuai leh ka nuam,
Parfung chawia vul ni her leh nan.

Vangkhaw mawia hawih té a vul hnu kha,
Dairial changa famkhua ka lawi ni chuan,
Min chhiah nâng che biahzai thu di ti hian -
'Zokhaw Dingdi, a zal e pialleiah'