KA SIANG LEN BUKTHLAM

Elti Muana

Min lo hrethiam mai te'u , a lang laklawh tlat:

KA SIANG LEN BUKTHLAM
Chung tura ni a hrang lua lo a
Khuangruah surin tuan a kham hek lo

A sumtualah zokai siktui a luang dem dem
Thinlai bawmtu sar chhum chhem kianga'n
Zo thlifim a leng vel e
Leng dang pawh loh kei ka siang len bukthlamah.

Rothangpuia lalna piah ramah chuan
Chhak kawlah turni a chhuak ngai lo a
Thlangah a her liam ngai hek lo
Ni leh kar, thla leh kum sul a vei ngai lo a
Mitthi leh mi nung tual kan leng za a
Sirva leng nen hlim zai kan vawr a
Zobawm par nen suihlung kan rual thin

Than leh san inchuhna khuavelah hian
Uan chhan tlak chhuan tur neih reng ka nei lo a
Mahse bukthlam sawngka dawh ler a
Sawmfang hmun ka thlir chang erawh chuan
Angurpui nun ka ngai ngai lo.