Ami'n di ngaih lunglen zai kipin an chawi,

Elti Muana

Ami'n di ngaih lunglen zai kipin an chawi,
Kei zawng nunhlui liam hnu khan suihlung min len e;
Thal bawm romei leh fur khaw hnim te lam hian,
Suihlung nau ang mu tawh hnu an kai tho e.

Sikni eng mawi lo zamin thal khua lo her,
Fur khaw lo ngui leh vangpui khaw thiang zawngte;
Kumpui sula vei thin hun pui tinte hi,
Liam hnu kan nun khuarei hril lo awm lo e.

Par ang chuai hnu hlimlai kan nunhlui zawngte,
Puan ang chul hian an mawi lo e thinlaiah;
Khuanu kut chhuak thilsiam tinrengte hianin,
Ngai ve tak ang maw e, hlim lai khuareiah?

Siamtu ruat hringnun turni a her chhung zawng,
Tun hi hmanlai a chang bang thei lo ang a;
Hring kalsiamah nunhlui ngaih a bang hek lo'ng,
Tahna karchehah tahna a tam mang e.

19.1.2005