RITLENG DARZAM

TC Lalrem Siama

Kal ta Buangi Sailo hriatreng nan:
RITLENG DARZAM

1. Thinlai lungkham thleng tak ang maw,
Thutin di sawi mah la e ngaihzual;

A tak sakruang i tang bei hma chuan,
Thamral biahthu, thamral biahthu chang leh thin.

Thunawn:
Aw ka va han ngai tak che em,
Lairil hmangaihna ka ngen che;
Biak leh ka nuam, engtin mi chhang ang maw,
Chhingmit mengmawi tha chungchuang.

2. Duhber e, chhingmit chem khan maw,
Min zai leh la thinlai min at nawn se;
Chantawk lungkham a kim zawk tur,
Chhaktiang Ainawn, chhaktiang Ainawn chuailopar.

3. Ritleng darzam palai ka rawn tir e,
Lungmuang loten pheilai rawn khawng la;
Lunglawmin ka lo hmuak che ka ngaihzual,
Hlimten kan run, hlimten kan runhliapah aw.

He hla "Ritleng Darzam" tih date 18.6.2012-a kal ta Buangi Sailo (Remsangpuii Nu) phuah a ni a, a phuah chhan ber chu a pasal a ni. Mahse he hla a phuah lai hian a pasal chuan a boralsan tawh a; chuti chung chuan a pasal a hmangaihna leh a ngaih em emna chuan a phuah chhuahtir ta a ni. A mitthla ramah a pasal nena an intawntirh lai hun te, a pasal nen an intawn tirh lai vela khual khuaah ve ve awm an nih dan te thlir kirin leh, a pasal dam lo Mumbai Tata Hospital-a a awm lai hun thleng te suanhgtuaha dawn khawlin, he hla lungrun tak mai hi a lo phuah ta a ni. Amah Padma Shree Buangi Sailo (L) min hrilh dan chuan, 'Ritleng Darzam' hi 'telephone' a sawina a ni bawk.

Buangi Sailo hian Mizo Lengzem hla a phuah nual a, Cable TV lamah te pawh zaithiam ten a hla phuah an sak kan hriain kan hmu thin awm e; a lengzem hla phuah te hi lungrun tak tak a niin nula tlangval inngaihna hla lunglenthlak tak tak te a ni hlawm a. Heng a hlaphuahte hi a lusun khawhar lungleng puak keh a nih thin avangin mi a deh leh fan dan hi a ril thin hle a; tunlai Mizo lengzem hla pawn lawi leh chhungril fan pha fa lua lo te ang hi a ni ve lo! Buangi Sailo lusunna hian Mizo thu leh hla a tihausa hle a, "Keini'n vanduainaah kan ruat, a hmangaihna lantirtu...," tih ang deuh kha a ni awm a sin!

Mahse kan mihrang kungpui miril Padma Shree Buangi Sailo chu a kal ta si!
Mizo, 'amah' chu i theihnghilh phal bik dawn em ni?!