Nang Ngaih Hi

Mafaa Hauhnar

Nang Ngaih Hi

Kan inkârah engmah a thleng lo va;
Lâwmna leh lungngaihna mittui 
kan intrâwm zawng zawng te kha

engmah lo mai a lo ni
han tih theih hi ka nuam mang e!

Mahse, thinlung chhungril takah
Ka tan awmze thûk tak an nei si.
Nang nena kan nuih lai ni leh 
Kan ngui lai zan te khàn
thâm ral lo sulhnu min bân a,
nghilh rual loh hniakhnu min chhiah si.

Engah nge i hming an lam rîk hlek pawha
ka thinlung hi a phi buai a, 
ka vân ruai a,
Nun hlui liam hnu-a ka kir leh thuai thin ni?

Tuna hei ang tisa leh thlarauva
tawrhna namen lo ka tawh chang hian
ka lo ngaihzia che hi 
ka hrechhuak thar leh thin.