TUNLAI MI

Chhakchhuak Lalmuanthanga Muantea
TUNLAI MI

A hawi zik zik,
A thlir den den,
A thlang bawrh bawrh,
A duh ang ang.

Awh zawng a ngah,
Awm awl a thlang,
Awmchin hre lo,
Awm zawng ngen in.

A hai ngei chunnu thlunglu,
A hrai rilru piansual vang,
A zuapa a mualpho fu,
A thalbe chhuak nun hoh vang.

A piang ve si fuke kimin,
A tui tui lah a hre ber ber,
Awmawl a ngeih thau mum kangin,
Aw, chun leh zua lah cher telh telh.

A ngeih lo tharum thawh ngai reng reng chu,
A tlin lo rilru sen ngai hna lah chu,
Aw, engtin hringnun hman zeltum che maw?
Awm lo in mual liam se chun leh zua saw.

I FAM MAI AWM E!

ZH October Renthlei
I FAM MAI AWM E!

Khârtung sâwn lo hian hringnun i chhâwn a,
Ngentu aurâwl chu thlalêr a chang ta!
Ruah mal kârah chuan mittui i thup a,
Thinlung hliam erawh i thup zo si lo.

Hausakna ûmin hmeltha i thlang a,
Tahna ruamah chuan lungawi i zir ta!
Hliampui tuar chungin hringnun i thlir a,
Tap hluanin zai vawr zai i rêl leh thin.

Hawi la thlir vel teh i lenrualte saw,
Mawite'n pâr an vul, hlim lai pâr an tlan;
Nang erawh i nâ duh thlan sual vangin,
Lungawi lo rêng hian i fam mai awm e!

Duhthusam.....

L Vanchiau Thanga
Duhthusam.....

Ngaihruat dawn tisei beiseina mai,
Tin kim kiltang hmuntin leh mualtin reng,
Hrutin a hawl a hawi a dawn chhingmit lo rautha ngaihruatna mit hawngin.

Beiseina hrualhrui anga sei leh dawn tam lunglen in a fan vel,
Ni se, awm se, maw lungkham a dam mai tur.

Ngaihruat tinkim dawnin a hawi ruai ruai,
Tawng silo nise, tihmai maw chantawk a khuarel a chan le,
tawnmang iangin rauthlalengah rial ang a ral leh si thin...

beiseina hi miretheite invenna ngunhnam a ni a,
 beidawnna erawh phuba lakna tura ban vai ang a ni.

TU CHU!

Keimah Sangtea Renthlei

TU CHU!

Sakhmel mah ka hmuh ngailoh;

Tu chu ni a ka hriat mawh.

A lo ni reng si lengher;

Hringnun par chu a chawi vel.

Chu par a tlan lai chu e;

Tu'n nghaka duha hel ve?

Lengza val chhingmit vaihna;

Duh te'n an sam chu mawi na.

-sangtea signature@14.8.2013

ZUN CHHAWL

Khiangte LR Lra

ZUN CHHAWL

Tuahtir lungdi ainawn pari,

A mawi zo ngei e, a khum zo reng hi an awm lo,

A sakruang leh a kimtlang reng a hawih si,

‘Di bu mawi-i’ ti a koh mai che ka lo nuam e,

Nang ang reng renga ka lunglai dumtu hi an awm lo,

Ka tan rinawm min tiam nan i theih tawk maw,

Zun chhawl chu min lo thliah sak tawh si.

Sul ang tum lo tur chuan min ring lo la,

Samang then che hi ka hlau ber mai,

Thenlohna thudi kan tiam zawngte kha,

Nghilh bik che hian kei zawng ka ring mawlh si lo,

Suihlung ruala nau ang kan inlawm lai ni te kha,

Kumtluang atan hmangaihna biahthu min hlan tawh si,

Zun chhawl hlim te'n min thliah ni te kha aw.

Kei zawng vangkhaw perpui-ah arang ka vai e,

Ka ring ngai lo che i tum, valthiang heti'a i chhai !

Val-nala tawnah ngaih lung min her san mai hi,

Kei ariang val chan tur hi dawn ve thin la,

Run lum nuthai chang ve ngei turin,

Thal tui ang ka lo nghak reng che a sin,

Zun chhawl min thliah kha a der mai maw lo ni le !?

LU LATU A TLAWM...

Zira Chhakchhuak Hualngo

LU LATU A TLAWM...

Mihrang rorumna chu chhuhin,

Thruro ze nem zengah i hlan?

Milu lakna hnam aiawh a'n,

A kut i chei rose par varin!

Hmanah rawlral, ralpui a phiar,

Tunah nang vang tlawm bi a chhiar.

Hmelma lu chuana uang thrin kha,

A thlunglu'n sahlam a chuan ta!

HRANSAN THEIIN KA MAWI LOVE

R Lalchanchinmawia Kll
HRANSAN THEIIN KA MAWI LOVE

Nau ang a nuar em ni ka chung vankhua.
Rairah riang thinlai iang rêngin a hnim reng e.
Kawlah lo her chhuak mahse chunga turni.
Sat zai rel loten a duai nghuai e.

Chung khaw duai ianga nguai kei ka thinlung.
Zùlzui khuahril inpenparh zai rel thei lo.
Di zun leh hun hlui zun lêng zam phuar vel.
Engah kohkir rual loha zamual a liam.

Mahriaktea awmhar run nghah laiin.
A lo ri der der e thal khawpui saw hmarah.
Di ngai tinkim dawn tan lunglen a thar leh thin.
Mahten tuar ka zuam love chhingkhual kar hlaah.

Partin chhuah maw e parfung chawitu'n.
Hnahpui chhuang maw e thingtin zarin.
Vul zai an rel law'ng e vanglai chhuahin.
Chawmtu khuangruahpui sur si loh chuan.

Vaiduaina aizar a riang vaihkhu sei nan renga'n.
In khachhuan sang zel e lung ngui nghi nghiai.
Hran san thei rengin ka mawi ne'maw.
Mual liam hnu'n lamang let zai a rel si loh chuan.

Vawiin chu, khaw duai ang angin ka rilru pawh a nguai a. Kan kalsan hnu, ramhlui zia niin, keini ang pachang til tial ruk tawh tan chuan inawmlemna ang chauha lem ni tawh mahse, group nula leh tlangvalte tan ka'n thaikawi ve leh zuai a nih hi...kurpui a mual mual in lo awm tàk mialin...!?