NAUPANG KAWNGDIK KAWHHMUH
Aw! ka nu, min hmangaih em em tu
Saisen tet ata luaithli ka nul phal lotu
I hraileng hian hringnun lamtluang ka chhui ve dawn e
Ṭah leh ngui chang a awm dawn tih min hrilh fo ang che
Mahse chung hun hrehawm thleng thei pawh chu
Chhel leh fing taka paltlang dan min zirtir ṭhin ang che.
Aw! ka pa min hmangaih em em tu
Rual reng ka awh hlau a thawkrim em em ṭhin tu
I hraileng hian hringnun lamtluang ka chhui ve dawn e
Hmangaihna avangin lainatna en kan la
Thawkrim tana hlawhtlinna kawng min kawhhmuh ang che
Mamawh loh it lo turin min venpui la
Ka mamawh neih dan erawh min zirtir tlat ṭhin ang che
Ka nu ka pa min hmangaih em em tu
In hraileng chawi hi ka hlim leh lawmna atan
A ṭul bak bakin ke pen lul suh ang che u aw
Kuttling lo leh dik lo taka sum hailuh ka tum ngai loh na'n
Kuttling lo sum reng reng kan runa'n tlangnel lo se
Dik leh fel taka titu ka nih theih na'n
Kan runa'n diknain thla zar reng rawh se
Chhungkaw ṭha tak ka la din ve ngei theih na'n
Ka tan darthlalang ṭha ber ni reng ṭhin ang che u.
Aw! Ka nu ka pa in hraileng chawi hi
Ram leh hnam tana mi ṭangkai ka nih ve na'n
Kan run-in aṭang ngei hian min chher hriam ang che u
Huaisenna hi hlauh neih lohna a ni lo tih min hriat fiah tir in
A ṭul chuan hlauhna dahṭhat ngam hun a awm tih te
Hrilhin min hriat fiah tir zawk ṭhin ang che u
Ka nu ka pa kan ram leh hnam siamṭhat hi
Chhungtin aṭanga ṭan theih a nih angin
Chhungkua aṭanga bul ṭan turin inpeih ang u.
No comments:
Post a Comment