LUNGNGAIH ṬAH ZAWNG LAWMNA ACHANG LEH ANG

 Valsena Vls Valsena

*LUNGNGAIH ṬAH ZAWNG LAWMNA ACHANG LEH ANG*

_Valsêna Chhangte_

Pâr thing vul chiâi leh damthli leng karah,

Ngui nghiaiin i vangkhua chu ka thlîr a,

Suangtuah hlimthlaah i sakruang châwiin,

Lungrun, vaihna mittui aluang leh ṭhin.

Laikhum bela chhingmit khar rel loin,

Kan tan thangvân chhawrthlà êng si a,

Tuahrem laikhum kan zal loh nan reng a,

Ṭuanna vangkhua adang ka ngai thiam lo.

Lentu, mâwite'n i vangkhua lo bel la,

Dorâl kianga vanpa'n arel tikah,

Piallei ngûr fá thlazar akiang ang a,

Lungngaih ṭah zawng lawmna achang leh ang.

Ka hlimthlâ thlîrin damte'n chhing tawh la,

Lengdang, i sumtual mâwi der te'n lêm rawh,

Nun chhingkhualah pâr ka chhuang dawn nem le,

Lungrun, i ṭang belh thlan ka bang dawn lo.

Ṭahna vangkhuaah siang lawi mah ila,

Tuar har ânnêmpui lung mah phang suh la,

Hmangaihna hrual hrui chhat lo hringfate,

An mâwi hluan ang chatuan vân-khua thlengin.