DIPUI PAR

 

Lala Anri

  · 

DIPUI PAR

[29 APRIL, 2021]

Tuahpui leh vau vul lai ni,

A her liam par tin vul lai;

Lungchima lungdi nghah lai,

A her thei lo tawn leh ni.

Dipui a par vul lai,

Ka nghak sual em lo ni?

Chhunni thlanglena'n a liam,

Awmhar thinlai a zing riai;

A riang thinlai a hnim riai,

Hlim lai ni tui ang a kiam.

Sam rual loh duhthu leng,

Sam luat vang em lo ni?

I nat leh lungngaih niin,

Awm lai veiin ka vai ruai'

Relthang phurin ka vai ruai,

I sakhming an sel changin.

Nat leh hliama awm hi,

Hmangaih vang em lo ni?

Thinlung keh sawm chauh lo chuan,

A tuam dam zo thei lo che;

A hnem dam zo thei lo che,

Thinlung hliam hnu chauh lo chuan.

Lairil hmangaihna hi,

ka tahna em lo ni?

Nipui leh fur a liam ta,

Thinlai dam ni a awm lo;

A lunglai ka luah zo lo,

Chelh rual lohvin a liam ta.

Dipui a par vul lai,

Ka thlir sual em lo ni?