March 27, 1998 chu B.A (English) final ka exam ni tawp ber a ni a, paper- VII (criticism) kan exam ni a ni. A hma ni nga vel atangin ka damlo tawh a, exam kim loh ka hreh avangin mahni pawha kal tha theilo chu ka thianten exam hall-ah min kuah lut a (chhungte chu kawlvalenchham ah an awm daih si a), ka lu a haia, ka mit a vai chuai chuai a, tha reng ka nei lova, ka paper chu ka han ziak ta a, word ho te te..."they", "come" tih vel mai mai pawh chu ka ziak sual ta nawk nawk mai a! Eng chin chiah nge ka chhan pawh hre mumal lo chuan ka beidawng lutuk chu thei leh thei lovin exam hall atang chuan ka pai chhuak ta chawn chawn mai a nih kha. Ka zir nasat ve tehreng nen Siamtu chu rilruin ka dem a......he poem hi a lo piang ta a ni.......
KA TAWNG LOVE
Ka thian, kei chu an sawi khuanuleng hian
Hahtidam hlimhmelin mi seih nem le:
Ka tawnah thlangtiang kawlrawn tothli iang
Malsawmtheitu sakhmel a dur tak le!
Hahtidam hlimhmelin mi seih nem le:
Ka tawnah thlangtiang kawlrawn tothli iang
Malsawmtheitu sakhmel a dur tak le!
Tlaikhua varin ziahtial darang ka chhai
Zingtianah bawar lungfing ka chhing ve,
Mahse fang lawr tura tuan ka rellai
Awmlaiin maw khau ang mi lo vuan e.
Zingtianah bawar lungfing ka chhing ve,
Mahse fang lawr tura tuan ka rellai
Awmlaiin maw khau ang mi lo vuan e.
Fangchem huma chhaithluk tawh hnu biahthu
Lamang let'an ka sawm kir lai chuan maw
Laitha ka chham, a hai chuai e thlunglu
Val siar lak rel kalkham reng'an maw!
Lamang let'an ka sawm kir lai chuan maw
Laitha ka chham, a hai chuai e thlunglu
Val siar lak rel kalkham reng'an maw!
Nauang nuar valrethei biahthu chu e,
Khuanu sakhmel nui hiau ka tawng love.
Khuanu sakhmel nui hiau ka tawng love.
No comments:
Post a Comment