Dotu leh ertuten min falak kam

Lalropuia Pachuau‎MIZO POETRY

Member nih ve manah-Nupuite pualin
Dotu leh ertuten min falak kam chemharin,
tukhum min chhawn pawh ni se.
Itsikna kamrel inchhawn vel karah hian;
hringnun ngul a rul chang a,
Hringfa zinga beiseina min petu chu-
Nang i ni.
Ka hlim laia tap a, ka tah laia nuite hian,
ka nihna dik tarlan an lungkham a.
Ka duhzawng lungkham a, ka lawmna zawngtu;
hmangaihna hluma ka mawi lohna char a,
iai leh sit awm lova min tleipuitu chu-
Nang i ni.
Chak lohnaah hian tanpuitu an lang thin a,
bawrhsawmna hian enkawltu kut a ngai thin.
Ka hringnun hi nawp a nih chang leh,
mangchhia ang maia ngaihawm loh a nih chang pawhin;
ka damna tura mahni damna min hlantu chu-
Nang i ni.
Hringnun kawng chhuk chho zawh a,
kham leh suar zel chhuak tur leh;
khualzin kawng zawha ka chelh tur,
sut leh theih tawh loh thutiamin
fam khua lawi thlenga min ngulzempui tur chu-
Nang i ni.
Beiseina hi surha-in hnual chang awm se,
duhaisam chu tui hum angin thamral bawk thin mahse;
lungngaihna chu thuah engzat pawhin thual mahse,
i kiangah tui ang an nem leh thin.
Kei, chak lo peizawn tura Siamtu min pek chu-
Nang i ni